قايتارىلعان اكتيۆتەرگە قۇنى 30 ميلليارد تەڭگە بولاتىن ينۆەستيتسيالىق جوبالاردى ىسكە اسىرۋ باستالدى
استانا. KAZINFORM - قايتارىلعان اكتيۆتەرگە قۇنى 30 ميلليارد تەڭگە بولاتىن ينۆەستيتسيالىق جوبالاردى ىسكە اسىرۋ باستالدى. بۇل تۋرالى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتوراعاسى نۇرداۋلەت سۇيىندىكوۆ ايتتى.
«اكتيۆتەردى قايتارۋ پروتسەسىنىڭ تاعى ءبىر ماڭىزدى بولىگى - قاراجاتتى قازاقستان ەكونوميكاسىنا قايتا ينۆەستيتسيالاۋ. كوميسسيا ماقۇلداعان كەلىسىمدەر بويىنشا زاڭ سۋبەكتىلەرىمەن جالپى سوماسى 30 ميلليارد تەڭگە بولاتىن ينۆەستيتسيالىق جوبالاردى ىسكە اسىرۋ باستالدى. ولاردىڭ ىشىندە حيميالىق، تاماق ونىمدەرىن جانە باسقا دا تاۋارلاردى شىعاراتىن وندىرىستىك وبەكتىلەردى سالۋ جانە جاڭعىرتۋ بار. مۇنىڭ بارلىعى مەملەكەتىمىز بەن حالقىمىزدىڭ يگىلىگى ءۇشىن جۇمىس ىستەيتىن بولادى. مىسالى، وندىرىستىك جەلىنى اشۋ تۋرالى جوبالاردىڭ ءبىرى بويىنشا 100 جۇمىس ورنىن قۇرۋ، جىل سايىن 500 ميلليون تەڭگەگە سالىق تۇسىمدەرى، ءونىمنىڭ كەمىندە 20 پايىزدىق ەكسپورتى كوزدەلگەن»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى بريفينگتە.
وسى رەتتە ول مەملەكەت باسشىسى قازاقستان حالقىنا جولداۋىندا زاڭ سۋبەكتىلەرىنىڭ الەۋمەتتىك-مادەني نىسانداردى سالۋعا ات سالىسۋىنىڭ قاجەتتىلىگىن اتاپ وتكەنىن ەسكە سالدى.
«بۇل باعىت بويىنشا دا جۇمىس جۇرگىزىلىپ جاتىر. كوميتەتپەن 12 ميلليارد تەڭگەگە الەۋمەتتىك جوبالاردى ىسكە اسىرۋ تۋرالى كەلىسىمدەر جاسالدى. زاڭ سۋبەكتىلەرى زاماناۋي مادەني-ءبىلىم بەرۋ ورتالىعىن، سپورت مانەجىن، تۇرعىن ءۇي كەشەنىن سالادى، سونداي-اق مۇقتاج جانداردى وڭالتۋ جانە الەۋمەتتەندىرۋ باعدارلامالارىن قارجىلاندىراتىن بولادى. وسىلايشا، كوميتەتتىڭ اكتيۆتەردى ەرىكتى قايتارۋ باعىتى بويىنشا جۇمىسى ءتورت نەگىزگى كومپونەنتتى قامتيدى. ولار: رەسپۋبليكالىق بيۋدجەتتى تولىقتىرۋ؛ اكتيۆتەردى زاتتاي قايتارۋ؛ كاپيتالدى قايتا ينۆەستيتسيالاۋ جانە الەۋمەتتىك جوبالاردى ىسكە اسىرۋ»، - دەدى نۇرداۋلەت سۇيىندىكوۆ.
ارناۋلى مەملەكەتتىك قورعا 176,3 ميلليارد تەڭگە ءتۇستى. بۇل تۋرالى قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ ءتوراعاسى باقىتبەك تاشەنوۆ ايتتى.
«2024 -جىلعى 9 -قىركۇيەكتەگى جاعداي بويىنشا ارناۋلى مەملەكەتتىك قور تۇسىمدەرى - 176,3 ميلليارد تەڭگە. باسقارۋشى كومپانيادان تۇسكەن قاراجات - 5,7 ميلليارد تەڭگە، ونىڭ ىشىندە اكتيۆتەردى ساتۋدان 5,559 ميلليارد تەڭگە جانە اكتيۆتەردى باسقارۋدان - 141 ميلليون تەڭگە. ارناۋلى مەملەكەتتىك قوردىڭ قاراجاتىن ءبولۋ ورتالىق مەملەكەتتىك ورگانداردىڭ ۇسىنىستارىن مىندەتتى تۇردە بيۋدجەت كودەكسىنە سايكەس رەسپۋبليكالىق بيۋدجەت كوميسسياسىندا قاراۋمەن جۇزەگە اسىرىلادى. قور قاراجاتى الەۋمەتتىك جانە ەكونوميكالىق جوبالاردى قارجىلاندىرۋعا جۇمسالاتىن بولادى»، - دەدى كوميتەت ءتوراعاسى ورتالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، قور قاراجاتى ەسەبىنەن قارجىلاندىرۋ ءۇشىن جوبالاردى ىرىكتەۋ جانە ولاردىڭ ولشەمشارتتارىن ايقىنداۋ ءتارتىبى الەۋمەتتىك جانە ەكونوميكالىق جوبالاردى ىرىكتەۋ جانە ولشەمشارتتارىن ايقىنداۋ قاعيدالارىندا ايقىندالعان. وسى قاعيدالارعا سايكەس مەملەكەتتىك ورگاندار ازىرلەگەن جوبالار ۇلتتىق ەكونوميكا مينيسترلىگىنىڭ ەكونوميكالىق ساراپتاماسىنا جاتاتىن بولادى. بۇدان ءارى جوبالاردى قور قاراجاتى ەسەبىنەن قارجىلاندىرۋ ماسەلەسىن قارجى مينيسترلىگى رەسپۋبليكالىق بيۋدجەت كوميسسياسىنىڭ قاراۋىنا شىعارادى.
«ارناۋلى مەملەكەتتىك قور قاراجاتىن پايدالانۋ جانە مونيتورينگىلەۋ ءتارتىبى قور قاراجاتىن پايدالانۋ جانە مونيتورينگىلەۋ قاعيدالارىندا ايقىندالعان»، - دەدى باقىتبەك تاشەنوۆ.
اۆتور
مارلان جيەمباي
