قايرات ساتىبالدى ۇلى مەملەكەتكە تاعى 55,4 ميلليارد تەڭگە قايتاردى

ق ر سىبايلاس جەمقورلىققا قارسى ءىس-قيمىل اگەنتتىگى قايرات ساتىبالدى ۇلىنىڭ ەلدەن زاڭسىز شىعارعان اقشالاي قاراجاتتارىن قايتاردى، دەپ حابارلايدى قازاقپارات.

«سىبايلاس جەمقورلىققا قارسى ءىس-قيمىل اگەنتتىگى قايرات ساتىبالدى ۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەپ-تەكسەرۋ شەڭبەرىندە ەلدەن زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان اقشا قاراجاتىن جانە وزگە دە مۇلىكتى قايتارۋ جونىندە شارالار قابىلداۋدا.

تەك بيىلعى جەلتوقسان ايىندا سىبايلاس جەمقورلىققا قارسى قىزمەت قابىلداعان شارالاردىڭ ناتيجەسىندە ق. ساتىبالدى ۇلىنىڭ جالپى سوماسى 120 ميلليون ا ق ش دوللارىنا، ياعني 55,4 ميلليارد استام تەڭگەگە تەڭ اقشالاي قاراجاتتى قايتارۋدى قامتاماسىز ەتتى.

كورسەتىلگەن قاراجات مەملەكەتكە كەلتىرىلگەن زالالدى وتەۋ ەسەبىنە رەسپۋبليكالىق بيۋدجەتكە جىبەرىلدى»، - دەلىنگەن انتيكوردىڭ باسپا ءسوز حابارلاماسىندا.

ءمالىم ەتىلگەندەي، وسىلايشا كەيىنگى 2 جىلدا بيۋدجەتكە جانە كۆازيمەملەكەتتىك سەكتور سۋبەكتىلەرىنە 912 ميلليارد تەڭگەدەن استام سوماعا مۇلىكتىك اكتيۆتەر مەن اقشالاي قاراجاتتى قايتارۋ قامتاماسىز ەتىلگەن. ولاردىڭ قاتارىندا اكىمشىلىك عيماراتتار، ەكسكليۋزيۆتى زەرگەرلىك بۇيىمدار، ءزاۋلىم ۇيلەر، پاتەرلەر مەن اۆتوموبيلدەر، اكسيالار مەن كومپانيالارداعى ۇلەستەر، تەمىرجول توراپتارى مەن اقشا قاراجاتتارى، سونىڭ ىشىندە شەتەلدەن الىنعان قاراجاتتار بار.

ەسكە سالساق، بىلتىر قايرات ساتىبالدىعا سوت ۇكىمى شىعىپ، ول 6 جىلعا سوتتالدى.

«قازاق تەلەكوم» جانە «كولىكتىك سەرۆيس ورتالىعى» كومپانيالارىنىڭ قاراجاتىن جىمقىردى دەگەن ايىپپەن باس بوستاندىعىنان ايىرىلعان قايرات ساتىبالدى جازاسىن شىعىس قازاقستان وبلىسىندا وتەپ جاتىر. بيىلعى جەلتوقساندا ءوزىن مەرزىمىنەن بۇرىن شارتتى تۇردە بوساتۋ تۋرالى ءوتىنىش جولدادى.

اۆتور

گۇلميرا الياكپاروۆا