قايرات ساتىبالدى ءىسى: انتيكور 44,6 ميلليارد تەڭگە قاراجاتتى قايتاردى

استانا. KAZINFORM - سىبايلاس جەمقورلىققا قارسى قىزمەت قايرات ساتىبالدى ۇلىنا قاتىستى قىلمىستىق ىستەردى تەرگەۋ شەڭبەرىندە مەملەكەتكە 2024 -جىلدىڭ باسىنان باستاپ قوسىمشا 44,6 ميلليارد تەڭگە قايتاردى.

انتيكور ءتوراعاسى اسحات جۇماعالي ەل پرەزيدەنتى ق.توقايەۆتىڭ ۇكىمەتتىڭ كەڭەيتىلگەن وتىرىسىندا ايتىلعان تاپسىرمالارىن ىسكە اسىرۋ بويىنشا قۇرىلىمدىق جانە اۋماقتىق دەپارتامەنت باسشىلارىمەن جەدەل كەڭەس وتكىزدى.

مەملەكەت باسشىسى اتاپ وتكەندەي، زاڭسىز شىعارىلعان اكتيۆتەردى قايتارۋ ينۆەستيتسيالاردىڭ تاعى ءبىر كوزى بولۋى ءتيىس.

سىبايلاس جەمقورلىققا قارسى قىزمەت قايرات ساتىبالدى ۇلىنا قاتىستى قىلمىستىق ىستەردى تەرگەۋ شەڭبەرىندە مەملەكەتكە 2024-جىلدىڭ باسىنان باستاپ قوسىمشا 44,6 ميلليارد تەڭگە قايتارىلدى.

قازىرگى ۋاقىتتا قاراجات مەملەكەتكە كەلتىرىلگەن زالالدى وتەۋ ەسەبىنەن رەسپۋبليكالىق بيۋدجەتكە جىبەرىلدى.

سونىمەن قاتار، پرەزيدەنت ەكونوميكاعا جاڭا سەرپىن بەرۋ ءۇشىن كاسىپكەرلەرمەن جانە ينۆەستورلارمەن تولىققاندى سەرىكتەستىك قۇرۋ قاجەتتىگىنە نازار اۋداردى.

ءبىر جىل بۇرىن انتيكورمەن بيزنەستى قورعاۋ جۇمىسى اياسىندا «بيزنەسكە جول» جوباسى ىسكە قوسىلدى.

ول جەرگىلىكتى جەرلەردە كاسىپكەرلىكتىڭ دامۋىنا كەدەرگى كەلتىرەتىن جۇيەلى اكىمشىلىك كەدەرگىلەردى جويۋعا ارنالعان.

جوبا ىسكە قوسىلعان ساتتەن باستاپ 600-دەن استام پروبلەمالىق كەيس شەشىلىپ، 30 مىڭعا جۋىق كاسىپكەرگە كومەك كورسەتىلدى.

سونداي-اق، پرەزيدەنت قاسىم-جومارت توقايەۆ ءوز سوزىندە جەمقورلىق ءالى دە ەكونوميكانىڭ دامۋىن تەجەيتىن فاكتورلاردىڭ ءبىرى بولىپ قالا بەرەتىنىن اتاپ ءوتتى. بۇل باعىتتا سيفرلىق تەحنولوگيالاردى، ونىڭ ىشىندە «اقشانى بوياۋ» جانە «سيفرلىق تەڭگەنى» قولدانۋ تەتىكتەرىن ودان ءارى ەنگىزۋ ماڭىزدى بولىپ تابىلادى.

مەملەكەت باسشىسىنىڭ تاپسىرماسىنا سايكەس جانە سىبايلاس جەمقورلىققا قارسى ساياسات تۇجىرىمداماسىن ىسكە اسىرۋ شەڭبەرىندە اگەنتتىك قارجى مينيسترلىگىمەن جانە ۇلتتىق بانكپەن بىرلەسىپ وسى قۇرالداردى ەنگىزۋدى جالعاستىرادى.

قازىرگى ۋاقىتتا «اقشانى بوياۋدى» پيلوتتىق ەنگىزۋ ءۇشىن اۆتوجولدار سالۋ، اۋىل شارۋاشىلىعى تەحنيكاسى مەن جابدىقتارىن ساتىپ الۋ، سونداي- اق الەۋمەتتىك- كاسىپكەرلىك كورپوراتسيالاردىڭ قاراجاتىن پايدالانۋ سالالارى ايقىندالعان. انتيكور باسشىسىنىڭ ايتۋىنشا، پرەزيدەنت تاپسىرماسىنا سايكەس، بۇل پروتسەسس نىسانداردىڭ قۇرىلىس سالاسىنا دا تارالاتىن بولادى.

ا. جۇماعالي: «بيۋدجەتتەن بولىنگەن قارجى تۇپكى ماقساتىنا جەتۋى كەرەك. ءبىزدىڭ سۇيەمەلدەۋىمىزدەگى قۇرىلىستارى ۇزاققا سوزىلعان نىسانداردىڭ ۋاقتىلى بەرىلمەي، ساپاسىز سالىنۋى كوبىنە اقشانى جىمقىرۋ نەمەسە شەنەۋنىكتەرگە ودان ءارى كەرى قايتارۋ سالدارىمەن جانە باسقا دا قۇقىق بۇزۋشىلىقتارمەن بايلانىستى ەكەنىن ءبارىمىز بىلەمىز.

تسيفرلىق تەڭگە قۇرال رەتىندە «اقشانى بوياۋ» ينستيتۋتىن ىسكە اسىرۋعا سەپتىگىن تيگىزەدى. سيفرلىق تەڭگەنىڭ الگوريتمدەرى بولعاندىقتان، ءوزىنىڭ ىزدەرى بار. مىسالى، قاراجات جالاقىعا بولىنسە، باسقا باعىتقا كەتپەي، ەڭبەكاقى، تاۋارلار مەن قىزمەتتەردى ساتىپ الۋ جانە سالىق تولەۋ بويىنشا يگەرىلەدى.

بولىنگەن قارجى قوزعالىسىنىڭ راسىمدەرى اشىق بولىپ، بارلىق اۋدارىم ءوز ماقساتىنا جەتىپ، ءار تەڭگە كوزدەلگەن ماقساتىنا جۇمسالۋى ءتيىس»، - دەدى.

اۆتور

ەربول جانات