قاي ەلدىڭ شوپىرلارى مادەنيەتتى

 استانا. قازاقپارات - «ءار ەلدىڭ سالتى باسقا» دەيدى قازاق. حالىقتىڭ ءتىلى مەن ءدىنى عانا ەمەس، ونداعى قاراپايىم جۇرگىزۋشىلەردىڭ دە مادەنيەتى بولەك بولادى ەكەن.

اۆستريا. «اسىقپاعان اربامەن قويان الادى» دەگەن ماقال وسى ەلدىڭ تۇرعىندارىنا ارنالعانداي.

كولىك جۇرگىزۋشىلەرى وتە مادەنيەتتى. ءبىر-بىرىنە جول بەرۋدى مارتەبە سانايدى.

وڭ جاقتان باسىپ وزۋ - ولار ءۇشىن ادەپسىزدىك. ەگەر كولىك يەلەرى ەرەجە بۇزسا، پوليسياعا وزدەرى حابار بەرەتىنىنە تاڭدانۋعا بولمايدى.

انگليا. جەرگىلىكتى جۇرگىزۋشىلەرگە قاراعاندا جول ەرەجەسىن سىرتتان كوشىپ كەلگەندەر مەن تۋريستەر ءجيى بۇزادى ەكەن. ەسەسىنە، جول ساقشىلارىن سىيلاي بىلەدى. جالپى، بۇل ەلدە قوعامدىق كولىك جۇيەسى جان-جاقتى دامىعان. سوندىقتان، تۇرعىنداردىڭ باسىم بولىگى جەكە كولىكتەرىن قويىپ، قوعامدىق كولىكتى پايدالانعاندى ءتاۋىر كورەدى.

ماروككو. بۇل ەلدىڭ تۇرعىندارى جۇرگىزۋشى مادەنيەتى تۋرالى ويلانا بەرمەيدى. ەلدە ەسكى كولىكتەر كوپ. جەڭىل كولىككە 5-6 ادامدى كەپتەپ مىنگىزىپ الۋ ۇيرەنشىكتى كورىنىسكە اينالعان. كولىك يەلەرى اسىقپاي جۇرەدى. 80 ك م ساع جىلدامدىقپەن جۇرۋگە رۇقسات ەتىلسە دە، قىرىقتان اسىرمايدى. ءبىر قىزىعى، جۇرگىزۋشىلەر بۇرىلار كەزدە شامدارىن جاقپايدى.

نورۆەگيا، شۆەسيا، فينليانديا. جول ەرەجەسى قاتاڭ، سوندىقتان، ءتارتىپ بار. جۇرگىزۋىشىلەر قىس تۇسپەي تۇرىپ-اق، كولىك دوڭعالاقتارىن اۋىستىرىپ قويادى. تاعى ءبىر ايتا كەتەرلىگى، كولىك يەلەرى جولدا قالىپ كەتكەندەرگە كومەك بەرگىش. الەمدە بىلىكتىلىگى جوعارى جۇرگىزۋشىلەر وسى ەلدەردە دەپ تانىلعان.

تايلاند. جۇرگىزۋشى مادەنيەتى قالىپتاسقان ەل. كولىك يەلەرى قانشا جەردەن سابىرلى، ءتارتىپتى بولعانىمەن، جولدا ءجۇرۋ وتە قاۋىپتى. سەبەبى، جول بويىندا سان مىڭداعان سكۋتەر مەن موتوسيكل ايدايتىندار جۇرەدى. تايلاندقا تۋريستەر كوپ كەلەتىندىكتەن، تەحنيكالىق كولىكتەردى جالعا بەرۋ جولعا قويىلعان. سوندىقتان كەز كەلگەن جۇرگىزۋشى ءوز ومىرىنە اسا ساقتىقپەن قارايدى.

جاپونيا. جەرگىلىكتى جۇرگىزۋشىلەر وتە مادەنيەتتى، مەيىرىمدى. جولدا ماسەلە تۋدىراتىنداردىڭ كوبى - سىرتتان كەلگەندەر. مۇنى شەشۋ ءۇشىن جاپوندار بارلىق جەرگە جول بەلگىلەرىنىڭ اعىلشىن تىلىندەگى نۇسقاسىن ءىلۋدى ءجون دەپ تاپقان.

رەسەي. جۇرگىزۋشىلەر جول ەرەجەسىن ساقتاي بەرمەيدى. دورەكى ايداۋشىلاردىڭ كەسىرىنەن رەسەي جولدارىندا جول اپاتى كوبەيىپ كەتكەن. سوڭعى كەزدە اپاتتىڭ الدىن الۋ ماقساتىندا ءبىرقاتار شارالار قولعا الىنۋدا.

دايىنداعان ايشاگۇل سەيىتمات