قاي جىلدارى ۆيتسە-پرەزيدەنت بولعانىن ۇمىتىپ قالعان: بايدەننىڭ ەستە ساقتاۋ قابىلەتى ناشار ما؟

استانا. قازاقپارات- ا ق ش- تا پرەزيدەنت دجو بايدەننىڭ بىلتىر قۇپيا قۇجاتتاردى ساقتاۋىمەن بايلانىستى جۇرگىزىلگەن تەرگەۋ اياقتالدى.

ارنايى پروكۋرور روبەرت گۋر ماسەلەگە قاتىستى بايانداما جاساپ، اق ءۇي باسشىسى تەرگەۋگە كومەكتەسكەنى ءۇشىن قىلمىستىق ءىس قوزعالمايتىنىن مالىمدەدى. كەيىن بايدەننىڭ ءوزى دە باسپا ءسوز ءماسليحاتىن وتكىزىپ، ءمان-جايدى ءتۇسىندىردى.

دجو بايدەن 2017-جىلى ۆيتسە-پرەزيدەنتتىكتەن كەتكەن كەزدە قۇپيا قۇجاتتاردى ادەيى الىپ تاستاعانى ءۇشىن ايىپقا تارتىلمايدى. بۇل تۋرالى ارنايى پروكۋرور روبەرت گۋر مالىمدەدى. سونداي-اق، بايدەننىڭ 2024-جىلعى پرەزيدەنتتىك سايلاۋىنداعى باستى قارسىلاسى دونالد ترامپتان ايىرماشىلىعى، اسا قۇپيا قۇجاتتاردى دۇرىس پايدالانباعانى ءۇشىن تۇرمەگە قامالمايتىنى بەلگىلى بولدى.

ءبىراق بايدەندى «ەستە ساقتاۋ قابىلەتى ناشار ەگدە ادام» دەپ سيپاتتادى. بۇل ا ق ش- تىڭ 81 جاستاعى ەڭ قارت پرەزيدەنتىنىڭ شامىنا ءتيدى. ول سايلاۋشىلاردى تاعى ءتورت جىل قىزمەت ەتە الاتىنىنا سەندىرۋگە تىرىستى.

دجو بايدەن، اقش پرەزيدەنتى:

- ارنايى ادۆوكات بۇل ءىس پەن ترامپ مىرزانىڭ اراسىنداعى ايىرماشىلىقتى ايقىنداپ بەردى. مەن ونىڭ ءسوزىن كەلتىرەمىن، «بايدەن قۋدالانباۋ ءۇشىن قۇپيا قۇجاتتاردى قايتاردى، ال ترامپ كەرىسىنشە جاسادى.» ايىپتاۋ قورىتىندىسىنا سايكەس، ول بىرنەشە اي بويى قۇجاتتاردى قايتارۋدان باس تارتىپ قانا قويماي، دالەلدەمەلەردى جويۋ ءۇشىن باسقالاردى جالداپ، كەيىن وتىرىك ايتىپ، سوت تورەلىگىنە كەدەرگى كەلتىرگەن. مەنىڭ قۇپيا قۇجاتتاردى ۇلتتىق مۇراعات پەن ادىلەت مينيسترلىگىنە تاپسىرعانىم، ءۇيىمدى قوسا العاندا تىنتۋگە كەلىسىم بەرگەنىم، ءوز ەركىمەن جاۋاپ الۋعا (دوپروس) كەلىسكەنىم جانە تەرگەۋشىلەرمەن ىنتىماقتاسقانىم تۋرالى ايتىلدى.

الايدا ارنايى پروكۋرور گۋردىڭ ايتۋىنشا، بايدەننەن سۇراق-جاۋاپ العاندا ول قاي جىلدارى ۆيتسە- پرەزيدەنت بولعانىن، ءتىپتى تۋعان ۇلكەن ۇلى قاي جىلى قايتىس بولعانىن ۇمىتىپ قالعان.

پرەزيدەنتتىڭ زاڭگەرلەرى ونىڭ ەستە ساقتاۋ قابىلەتىندەگى كەمشىلىكتەر تۋرالى ەسكەرتۋلەردى سىنعا الدى. ال قارسىلاستارى كوپ ۇزاماي پىكىرلەرىن ءبىلدىردى. مىسالى، وكىلدەر پالاتاسىنىڭ سپيكەرى مايك دجونسون X الەۋمەتتىك مەديا پلاتفورماسىندا «باسپا ءسوز كونفەرەنسياسى ارنايى پروكۋروردىڭ بايانداماسىنداعى سوزدەردى راستادى. ول پرەزيدەنتتىك قىزمەتكە جارامسىز ەكەنىن» جازدى. دەگەنمەن ساياساتكەر اقىل-ەسى دۇرىس ەكەنىن شەگەلەپ ايتتى.

دجو بايدەن، ا ق ش پرەزيدەنتى:

- مەنىڭ نيەتىم تۋزۋ، مەن قاريامىن، نە ىستەپ جاتقانىمدى بىلەمىن. مەن پرەزيدەنتپىن، بۇل ەلدى اياعىنا تۇرعىزدىم. وسى لاۋازىمعا كەلگەننەن بەرى قانداي ىستەر اتقارعانىمنان-اق، ەستە ساقتاۋ قابىلەتىمنىڭ جاقسى ەكەنىن كورە الاسىزدار.

امەريكالىقتاردىڭ كۇدىگىن دجو بايدەن دە راستاي ءتۇستى. ول بايقاۋسىزدا مىسىر باسشىسى ابدۋل فاتتاح ءال-سيسيدى «مەكسيكا پرەزيدەنتى» دەپ سالدى. ساۋالناما بويىنشا پرەزيدەنتتىڭ جاسى قاراشا ايىندا وتەتىن ساياسي دودا قارساڭىندا ا ق ش سايلاۋشىلارىن الاڭداتىپ وتىرعانىن كورسەتتى.

www.24.kz