قاتەرلى ىسىك اۋرۋىن جەڭگەندەر كەڭەس بەرۋ جوباسىن باستادى

استانا. قازاقپارات - بۇل تۋرالى بەلسەندىلەر الماتىدا وتكەن باسپا ءسوز ءماسليحاتىندا ايتتى. تىڭ جوبا ەلدە العاش رەت قولعا الىنىپ وتىر. كەڭەس بەرۋشىلەر الدىمەن ەكى ايلىق دايىندىقتان ءوتتى.

كۋرسقا قاتىسقان 17 ادامنىڭ بارلىعى وبىردى جەڭىپ شىققاندار. ولاردىڭ اراسىندا الماتىمەن قوسا، استانا جانە پاۆلودار قالاسىنىڭ تۇرعىندارى بار. كەڭەس بەرۋ مەكتەبى قاشىقتان جۇمىس ىستەيدى. وعان ەلىمىز بويىنشا ءار ايماقتان حابارلاسۋعا بولادى.

ىلكىمدى شارا قاتەرلى ىسىكتەن ەمدەلىپ جاتقان ناۋقاستاردى جىگەرلەندىرىپ، دۇرىس تاماقتانۋ مەن ەمگە قاتىستى ويلارىمەن بولىسەدى. اقپاراتتىق جانە پسيحولوگيالىق قولداۋ كورسەتەدى. وسىنىڭ ءبارى جوبا اياسىندا تەگىن جاسالادى.

پولينا يۋرچەنكو، تەڭ كەڭەسشى:

- ونكولوگيالىق دياگنوز قويعان كەزدە، بارىندە قورقىنىش بولادى. بۇگىن، ەرتەڭ ومىرمەن قوشتاساتىنداي كۇيگە تۇسەدى. ارينە بۇل ادامي قۇبىلىس. ءبىراق ءبىز سونداي ناۋقاستارعا ءۇمىت بەرگىمىز كەلەدى. ماسەلەن، مەن ءوزىم دە وسىنىڭ ءبارىن باستان كەشتىم. اۋىرعان كەزدە شىنىمدى ايتسام كىمنەن كەڭەس الارىمدى بىلمەدىم. سوندا دا بار كۇش جىگەرىمدى سالىپ اۋرۋدى جەڭىپ شىقتىم. ارينە دارىگەرلەردىڭ ەڭبەگى زور. ءبىز دارىگەر، پسيحولوگ نەمەسە الەۋمەتتىك قىزمەتكەر ەمەسپىز. ءبىراق سولاردىڭ اراسىن جالعاپ، قىزمەتتى قولجەتىمدى ەتۋگە كومەك بەرەتىن تەڭ كەڭەسشىمىز.

24.kz