قاڭتار وقيعاسىنان كەيىن قيراپ قالعان الماتى اكىمدىگى قالاي وزگەردى
الماتىدا وتكەن جىلى قاڭتار وقيعاسىنان كەيىن قاتتى زاقىم كەلگەن قالا اكىمدىگىنىڭ عيماراتىن قالپىنا كەلتىرۋ جۇمىستارى اياقتالدى، دەپ حابارلايدى قازاقپارات ءتىلشىسى.
الماتى اكىمدىگى عيماراتىنىڭ تاريحي كەلبەتىن ساقتاي وتىرىپ، قالپىنا كەلتىرۋ جۇمىستارى اياقتالدى. ەسكە سالساق، قالپىنا كەلتىرۋ جۇمىستارى وتكەن جىلى قاڭتار وقيعاسى وتكەن سوڭ، اقپان ايىندا باستالعان ەدى.
ول كەزدە عيماراتقا ورتتەن % 80 زالال كەلگەن ەدى.
6 قابات پەن 4 پاۆيلون وتقا ورانىپ، ورتكە قارسى جۇيەنىڭ ىسكە قوسىلۋى مەن توناۋ سالدارىنان جوعارعى قاباتتان سۋ اعىپ، جەرتولەلەر زارداپ شەككەن بولاتىن.
الماتى اكىمدىگىنىڭ تاريحي كەلبەتى ساقتالىپ، زاماناۋي تەحنولوگيا مەن قۇرىلىس ستاندارتى ەسكەرىلىپ جاڭعىرتىلدى.
«اكىمدىك عيماراتى قالا ءۇشىن ماڭىزدى. ول 1979 -جىلى سالىنعان جانە سول كەزدە قازاقستان بويىنشا ەڭ ءىرى عيمارات سانالدى. سوندىقتان عيمارات ۇلكەن ماڭىزعا يە. ونى قالپىنا كەلتىرۋ كەزىندە ءبىز تاريحي كەلبەتىن ساقتاۋعا تىرىستىق»، - دەيدى الماتى اكىمى اپپاراتىنىڭ باسشىسى بەيبىت شاحانوۆ.
قاسبەتتە جۇلدىزدىڭ ورنىنا بەيبىتشىلىك تۇتاستىعىنىڭ، مەملەكەت پەن وتباسى نەگىزىنىڭ ۇلتتىق سيمۆولى بولىپ تابىلاتىن شاڭىراق بەينەلەنگەن.
رەكونسترۋكسيا كەزىندە ءبىرىنشى كەزەكتە اكىمدىك قىزمەتكەرلەرى مەن كەلۋشىلەرىنىڭ قاۋىپسىزدىگى ەسكەرىلدى. «قازق س ع ز ي» اق ساراپشىلارى عيماراتتى سەيسميكالىق توزىمدىلىككە زەرتتەپ، ۇسىنىستارىن ايتتى، سەيسميكالىق كۇشەيتۋ بويىنشا بارلىق ءىس- شارا تولىق كولەمدە جۇرگىزىلدى، ءورت قاۋىپسىزدىگى شارالارى ساقتالدى.
الماتى اكىمدىگىنىڭ باسپا ءسوز قىزمەتىنىڭ مالىمەتىنشە، عيماراتتىڭ ىشكى بەزەندىرىلۋىندە وتقا ءتوزىمدى جانبايتىن ماتەريالدار پايدالانىلدى، بۇرىن بولماعان جاڭا ءتۇتىن شىعارۋ جۇيەسى، ءورتتى ەسكەرتۋ - مەكەنجاي جۇيەسى ورناتىلدى.
ءورت كەزىندە ءورتتىڭ تارالۋىنا جول بەرمەيتىن ارنايى كلاپاندار اۆتوماتتى تۇردە قوسىلادى.
سونداي- اق عيماراتتىڭ قاۋىپسىزدىك شارالارىن كۇشەيتۋ ءۇشىن عيماراتقا كىرۋدى باقىلاۋ جۇيەسى قولدانىلدى جانە وتقا ءتوزىمدى ەسىكتەر، عيماراتقا ءبىرىنشى قاباتتاردىڭ تەرەزەلەرى ارقىلى رۇقساتسىز كىرۋدى شەكتەيتىن قوسىمشا جاپقىشتار، سونىمەن قاتار ءار قاباتتا جانە پەريمەترى بويىنشا بەينەباقىلاۋ كامەرالارى ورناتىلدى.
قىزمەتكەرلەردىڭ كىرۋى ءۇشىن تۋرنيكەتتە بەت- الپەتتى تانۋ جۇيەسى ورناتىلعان.
قۇرىلىس بارىسىندا ءتيىمدى ەنەرگيا تۇتىنۋ تەحنولوگياسى قولدانىلىپ، جاڭا جىلىتۋ جۇيەسىنە تولىعىمەن اۋىستىرىلدى.
بارلىق ينجەنەرلىك كوممۋنيكاتسيا اۆتوماتتاندىرىلعان جانە ءبىرىڭعاي ديسپەتچەرلىك پۋنكتكە قوسىلعان، بۇل جۇمىستى باقىلاۋعا جانە عيماراتتىڭ ەنەرگيا تيىمدىلىگىن قامتاماسىز ەتۋگە مۇمكىندىك بەرەدى.
ديسپەتچەرلەر وزىق ۇلگىدەگى ستانسيانىڭ كومەگىمەن بارلىق جۇيەنى باسقارادى، توتەنشە جاعداي تۋىنداعان كەزدە جەدەل ارەكەت ەتەدى.
عيماراتتى قالپىنا كەلتىرۋدىڭ تاعى ءبىر ماڭىزدى كريتەرييى ينكليۋزيۆتى شەشىمدەردى ەنگىزۋ ارقىلى ازاماتتاردىڭ بارلىق ساناتى ءۇشىن جايلىلىق پەن كەدەرگىسىز ورتانى قامتاماسىز ەتۋ بولدى.
اتاپ ايتقاندا، ليفتىلەر، ەلەكتر كوتەرگىشتەر، مۇگەدەكتەرگە ارنالعان جۋىناتىن بولمەلەر جانە موبيلدىلىگى تومەن توپتارعا ارنالعان ارنايى قۇرىلعى- بەلگىلەر، پاندۋستار، شاقىرۋ تۇيمەلەرى، برايل ءالىپبيى پايدا بولدى.
اكىمدىكتىڭ ءبىرىنشى قاباتى «Open space Almaty» بولىپ قايتا جاڭارتىلدى. بۇل قابىلداۋ بولمەسى، كۇتۋ ايماعى، كەلىسسوزدەر بولمەسى، حالىقتى قابىلداۋ بولمەسى، انا مەن بالا بولمەسى، بالالارعا ارنالعان ويىن الاڭى بار قوعامدىق قابىلداۋ بولمەسى بولىپ تابىلادى.
«ءۇش كابينەتتى بىرىكتىرىپ، قالا تۇرعىندارى كەلىپ، ءوتىنىش ءبىلدىرىپ، ءوز ماسەلەلەرىن قىسقا مەرزىمدە شەشە الۋى ءۇشىن Open space جاسادىق» ، — دەيدى ATRIX Group قۇرىلىس كومپانياسىنىڭ باس ديرەكتورى ءامىرجان نابيەۆ.
رەكونسترۋكسيادان كەيىن كابينەتتەردىڭ اۋدانى وزگەرمەدى. وتاندىق ءوندىرىستى قولداۋ ءۇشىن نەگىزىنەن قازاقستاندىق ءوندىرىستىڭ ماتەريالدارى، ونىڭ ىشىندە جيھاز جانە ەسىكتەر پايدالانىلدى.
كابينەتتەردىڭ كونفيگۋراتسياسى، ولشەمدەرى، ورنالاسۋى وزگەرىسسىز قالدى. عيماراتتا بارلىعى 700 ورىنعا ەسەپتەلگەن 360 كابينەت ورنالاسقان. نىساننىڭ جالپى اۋدانى 33 مىڭ شارشى مەتردەن اسادى.
عيماراتتا 14 باسقارما مەن اكىمدىك اپپاراتى بولادى.
عيماراتتى قالپىنا كەلتىرۋگە رەسپۋبليكالىق بيۋدجەتتەن 17 ميلليارد تەڭگە ءبولىندى. قالپىنا كەلتىرۋ جۇمىستارىنا مىڭعا جۋىق جۇمىسشى تارتىلدى.
«قوسىمشا قاراجات سۇراعان جوقپىز. بۇل — رەسپۋبليكالىق بيۋدجەت، رەزەرۆتىك قوردان بەرىلەتىن ترانسفەرت» ، — دەدى ءامىرجان نابيەۆ.
بۇگىنگى كۇنى الماتى اكىمدىگىنىڭ عيماراتى قالپىنا كەلتىرىلىپ، پايدالانۋعا دايىن.
جىلدىڭ باسىندا قازاقپارات ءتىلشىسى اكىمدىك عيماراتىندا جوندەۋ جۇمىستارى قالاي ءجۇرىپ جاتقانىن جازعان بولاتىن.
اۆتور
دۋمان ارعىنگەلدى
