22:08, 27 - شىلدە 2024 | GMT +5
قاسىم-جومارت توقايەۆ وليمپيادا چەمپيونى ەلدوس سمەتوۆتى قۇتتىقتادى
استانا. KAZINFORM - پرەزيدەنت قاسىم-جومارت توقايەۆ وليمپيادا چەمپيونى ەلدوس سمەتوۆتى قۇتتىقتادى.
- دزيۋدوشىمىز ەلدوس سمەتوۆتى پاريجدەگى وليمپيادا ويىندارىندا التىن مەدال جەڭىپ الۋىمەن قۇتتىقتايمىن! ونىڭ شەبەرلىگى مەن قايسارلىعىنىڭ ارقاسىندا قازاقستاننىڭ تۋى بيىكتە جەلبىرەدى. ەلدوس مىقتى قارسىلاستارمەن كۇرەستە ءتورتجىلدىقتىڭ باستى دودالارىندا توپ جارىپ، الەمنىڭ ۇزدىگى اتاندى. ءسىزدىڭ جەڭىسىڭىز - ءبىزدىڭ بۇكىل حالقىمىزدىڭ جەڭىسى! - دەپ جازدى مەملەكەت باسشىسى Х پاراقشاسىندا.
ايتا كەتەيىك، بۇگىن قازاق بالۋانى پاريجدەگى ويىنداردىڭ فينالىندا لۋكا محەيدزەدەن (فرانسيا) باسىم ءتۇسىپ، قازاقستان تاريحىنداعى دزيۋدودان العاشقى وليمپيادا التىنىن ولجالادى.
