قاسىم- جومارت توقايەۆ ق ح ر ءتوراعاسى شي جينپيڭمەن كەلىسسوز جۇرگىزدى
قىتاي ەلىنىڭ باسشىسى قازاقستان پرەزيدەنتىن بەيجىڭدەگى حالىق جينالىسى ۇيىندە قارسى الدى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.

مارتەبەلى مەيماننىڭ كەلۋىنە وراي قۇرمەت قاراۋىلى ساپ تۇزەپ تۇردى. سودان كەيىن مەملەكەتتەر باسشىلارى ءوز دەلەگاتسيالارىمەن بىرگە ۇلكەن شىعىس زالىندا كەلىسسوز جۇرگىزدى.
قاسىم- جومارت توقايەۆ شي جينپيڭنىڭ «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنا قاتىسۋعا شاقىرۋىن زور ىقىلاسپەن قابىل الىپ، قىتايعا تاعى دا ساپارمەن كەلگەنىن اتاپ ءوتتى.

- قازاقستان ءسىزدىڭ وسى جاھاندىق باستاماڭىزعا العاشقى كۇننەن باستاپ قولداۋ ءبىلدىردى جانە ونى ىلگەرىلەتۋگە بەلسەندى اتسالىسىپ كەلەدى. وسىدان تۋرا 10 جىل بۇرىن استانادا سويلەگەن سوزىڭىزدە ءسىزدىڭ وسى باستاما تۋرالى ايتقانىڭىز ەسىمىزدە. ورايلى ءساتتى پايدالانا وتىرىپ، ءسىزدى وسى مەگاجوبانى جۇزەگە اسىرۋ بارىسىندا كەرەمەت ناتيجەگە قول جەتكىزۋىڭىزبەن قۇتتىقتايمىن جانە ايتۋلى شارانىڭ تابىستى وتۋىنە تىلەكتەستىك بىلدىرەمىن. سونداي- اق ءسىزدى قىتاي حالىق رەسپۋبليكاسىنىڭ قۇرىلعانىنا 74 جىل تولۋىمەن جانە حاڭجوۋدا وتكەن XIX جازعى ازيا ويىندارىنداعى قىتاي كومانداسىنىڭ زور جەتىستىگىمەن قۇتتىقتايمىن. ءبىز قىتايدىڭ قارقىندى دامۋىن ەرەكشە ىقىلاسپەن باقىلاپ وتىرمىز. ءسىزدىڭ دانا باسشىلىعىڭىزبەن قىتاي الەمدىك جەتەكشى دەرجاۆاعا اينالۋدى كوزدەگەن اسقاق مۇراتىنا جەتۋگە باتىل قادام جاساپ كەلەدى، - دەدى پرەزيدەنت.
مەملەكەت باسشىسى جان- جاقتى ءارى ماڭگىلىك ستراتەگيالىق سەرىكتەستىككە نەگىزدەلگەن قازاق- قىتاي قاتىناستارى قارقىندى دامىپ كەلە جاتقانىنا نازار اۋداردى.

- ءبىز بارلىق باعىت بويىنشا ءتيىمدى مەملەكەتارالىق ىقپالداستىقتى جولعا قويدىق. ءسىزدىڭ بىلتىر قىركۇيەك ايىندا قازاقستانعا جاساعان مەملەكەتتىك ساپارىڭىز ءوزارا بايلانىستاردىڭ بارىنشا نىعايۋىنا تىڭ سەرپىن بەردى. ساپار اياسىندا ەلدەرىمىز اراسىنداعى ىنتىماقتاستىقتىڭ جاڭا «التىن 30 جىلدىعى» باستالدى. مەملەكەتتەرىمىز اراسىنداعى ساۋدا- ساتتىق تابىستى دامىپ كەلەدى. ايتارلىقتاي ءوسىم بار. ينۆەستيتسيانىڭ جالپى كولەمى 21 ميلليارد دوللار بولاتىن 52 بىرلەسكەن جوبا جۇزەگە اسىرىلىپ جاتىر. 2024 -جىل قىتايدا قازاقستان تۋريزمى جىلى بولىپ جاريالاندى. بۇل وسى سالا ءۇشىن مول مۇمكىندىكتەرگە جول اشادى. ءوزارا مادەني- گۋمانيتارلىق بايلانىستار ءۇشىن قولايلى جاعداي جاسالۋدا. مەملەكەتارالىق قارىم- قاتىناستاردى مۇلدەم جاڭا دەڭگەيگە شىعارۋ ءۇشىن قازاقستاننىڭ دا، قىتايدىڭ دا وراسان زور الەۋەتى بار دەپ سانايمىن. وسى مۇمكىندىكتى پايدالانىپ، قۇرمەتتى ءتوراعا شي جينپيڭ، ءسىزدى كەلەسى جىلى قازاقستانعا مەملەكەتتىك ساپارمەن كەلۋگە شاقىرامىن، - دەدى قاسىم- جومارت توقايەۆ.
ق ح ر ءتوراعاسى شاقىرۋىن قابىل العانى ءۇشىن مەملەكەت باسشىسىنا العىس ايتىپ، ءوزارا ءتيىمدى ىنتىماقتاستىقتى نىعايتۋ ماڭىزدى ەكەنىن اتاپ ءوتتى.
- جوعارى دەڭگەيدەگى «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنا قوش كەلدىڭىز. ورنىقتى ءارى قارقىندى قازاق- قىتاي قاتىناستارى ەكى ەل اراسىنداعى ءوزارا سەنىمدى نىعايتىپ، بەيبىتشىلىك پەن تۇراقتىلىقتى قولداۋ ىسىندە باتىل ارەكەت ەتۋگە سەپتىگىن تيگىزەدى. حالىقارالىق جاعدايدىڭ قالاي قۇبىلاتىنىنا قاراماستان، قىتاي مەن قازاقستان وزدەرىنىڭ باستاپقى ۇستانىمدارىنان اينىماي، ءبىر- بىرىنە جاردەمدەسەدى. ەلدەرىمىز اراسىندا دوستىق قاتىناستار ورناعان جىلدار ىشىندە ءبىز ماڭگىلىك ءارى جان- جاقتى ستراتەگيالىق سەرىكتەستىك قالىپتاستىرا الدىق. «ءبىر بەلدەۋ، ءبىر جول» جوباسىن 10 جىل بۇرىن قازاقستاندا كوتەرگەن ەدىم، - دەدى شي جينپيڭ.
ق ح ر ءتوراعاسىنىڭ ايتۋىنشا، قىتاي قازاقستاننىڭ ەگەمەندىگى مەن اۋماقتىق تۇتاستىعىن، سونداي- اق قاسىم- جومارت توقايەۆتىڭ باستاماسىمەن جۇزەگە اسىرىلىپ جاتقان اۋقىمدى رەفورمالاردى تولىقتاي قولدايدى.
كەلىسسوز بارىسىندا تاراپتار ساۋدا- ەكونوميكا، مۇناي- گاز، مۇناي حيمياسى، ەنەرگەتيكا، قارجى، كولىك- ترانزيت، اتوم ونەركاسىبى، ماشينا جاساۋ، تۋريزم، ەلەكتروندى كوممەرتسيا جانە جوعارى تەحنولوگيا سالالارىنداعى جان- جاقتى ىقپالداستىقتى دامىتۋ ماسەلەلەرىن تالقىلادى. مەملەكەتتەر باسشىلارى بىرلەسكەن ينۆەستيتسيالىق جوبالاردى جۇزەگە اسىرۋ، سونداي- اق مادەنيەتارالىق بايلانىستارعا جاعداي جاساۋ ماڭىزدى ەكەنىنە نازار اۋداردى.
بۇدان بولەك، مەملەكەتتەر باسشىلارى حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
اۆتور
ايدار وسپاناليەۆ