قاسىم-جومارت توقايەۆ پەن يۋن سوك يەل شاعىن قۇرامدا كەلىسسوز جۇرگىزدى

استانا. KAZINFORM - قاسىم-جومارت توقايەۆ ءوزىنىڭ شاقىرۋىن قابىل الىپ، ەلىمىزگە ساپارمەن كەلگەنى ءۇشىن كورەيالىق ارىپتەسىنە العىس ايتتى. سونداي- اق مۇنى ەكى ەل اراسىنداعى ىنتىماقتاستىقتى نىعايتۋعا دەگەن شىنايى نيەتتىڭ ايقىن كورىنىسى دەپ باعالايتىنىن جەتكىزدى.

Қазақстан Президенті
Фото: akorda.kz

- بۇگىنگى ساپاردىڭ قوس تاراپ ءۇشىن دە ءمان-ماڭىزى زور. كورەيا رەسپۋبليكاسى - ءبىز ءۇشىن سەنىمدى سەرىكتەس ءارى ستراتەگيالىق ارىپتەس. ەكى ەلدىڭ دوستىق داستۇرگە نەگىزدەلگەن قارىم-قاتىناسى تەرەڭنەن تامىر تارتادى. ءبىز بارلىق دەڭگەيدە تىعىز بايلانىس ورناتتىق. كۇن تارتىبىندەگى ماسەلەلەر ىسكەرلىك رۋحتا جانە سىندارلى نەگىزدە شەشىمىن تاۋىپ كەلەدى. قازىرگى تاڭدا ەكى ەل اراسىنداعى تاۋار اينالىمىنىڭ كولەمى 6 ميلليارد دوللارعا جەتتى. بۇل - ورتاق كۇش- جىگەردىڭ جەمىسى. اۋقىمدى ەكونوميكالىق جوبالاردى ىسكە اسىردىق. ينۆەستيتسيالىق ىقپالداستىق جىلدان-جىلعا نىعايىپ كەلەدى. قازىر قازاقستاندا وڭتۇستىك كورەيانىڭ كاپيتالى بار 700-دەن استام بىرلەسكەن كاسىپورىن جۇمىس ىستەيدى. مادەني-گۋمانيتارلىق بايلانىستارىمىز قارقىندى دامىپ جاتىر. قازاقستانداعى كورەي دياسپوراسى بۇل ۇدەرىستە ماڭىزدى ءرول اتقارادى. ونى ەكى حالىقتىڭ اراسىن جالعاپ وتىرعان التىن كوپىر دەۋگە بولادى. ءبىز وسى جەتىستىكتەردى ەسەلەپ، قازاق-كورەي ىنتىماقتاستىعىن جاڭا دەڭگەيگە كوتەرۋگە مۇددەلىمىز. بۇل ساپار ەكى ەلدىڭ ىنتىماقتاستىعىنا تىڭ سەرپىن بەرەتىنىنە سەنىمدىمىن، - دەدى قاسىم-جومارت توقايەۆ.

Қасым-Жомарт Тоқаев пен Юн Сок Ёль стратегиялық әріптестікті одан ары дамытуға уағдаласты
Фото: Ақорда

يۋن سوك يەل ەكى ەل اراسىنداعى ستراتەگيالىق سەرىكتەستىكتىڭ 15 جىلدىعى قارساڭىندا قازاقستانعا ساپارمەن كەلگەنىنە قۋانىشتى ەكەنىن جەتكىزدى.

- بۇگىندە ەلدەرىمىز اراسىنداعى قارىم- قاتىناس جوعارى دەڭگەيدە دامىپ كەلەدى. كوپتەگەن كورەيالىق كومپانيا قازاقستان ەكونوميكاسىنا ينۆەستيتسيا قۇيىپ، جۇمىس ورىندارىنىڭ اشىلۋىنا جانە ونەركاسىپتىڭ وركەندەۋىنە ىقپال ەتىپ وتىر. بۇدان بولەك، كورەيالىق ينۆەستورلار ۇلكەن الماتى اينالما اۆتوموبيل جولى، بۋ-گاز ەلەكتر ستانسياسىنىڭ قۇرىلىسى سياقتى ءىرى جوبالارعا قاتىسىپ، قازاقستاننىڭ ۇلتتىق ينفراقۇرىلىمىن دامىتۋعا ءوز ۇلەستەرىن قوسىپ كەلەدى. ءبىز اسا ماڭىزدى شيكىزاتتاردى يگەرۋ، اتوم ەنەرگەتيكاسى، جاڭارتىلاتىن ەنەرگيا كوزدەرى سەكىلدى پەرسپەكتيۆتى باعىتتار بويىنشا ىنتىماقتاستىقتى نىعايتۋعا نيەتتىمىز. جالپى، ەكى مەملەكەتتىڭ ىقپالداستىق كوكجيەگىن كەڭەيتەتىن ۋاقىت كەلدى. وسى ساپار الدىندا ۇكىمەت كورەيانىڭ ورتالىق ازيا ەلدەرىمەن ىنتىماقتاستىعى تۋرالى K- Silk Road باستاماسىن جاريالادى. بۇل - كورەيانىڭ ورتا ازياعا قاتىستى العاشقى ديپلوماتيالىق ستراتەگياسى، - دەدى كورەيا رەسپۋبليكاسىنىڭ پرەزيدەنتى.

كەلىسسوز بارىسىندا قاسىم-جومارت توقايەۆ پەن يۋن سوك يەل وسىدان ءۇش جىل بۇرىن قازاقستان پرەزيدەنتىنىڭ كورەياعا ساپارى كەزىندە ەكى ەل اراسىنداعى قارىم-قاتىناس كەڭەيتىلگەن ستراتەگيالىق سەرىكتەستىك دەڭگەيىنە كوتەرىلگەنىن تاعى دا راستادى. سونداي-اق وسى بايلانىستاردى ساياسي، ساۋدا-ەكونوميكالىق جانە مادەني- گۋمانيتارلىق ىنتىماقتاستىقتىڭ ناقتى باعىتتارى بويىنشا ودان ءارى نىعايتا تۇسۋگە ءوزارا نيەت ءبىلدىردى.

پرەزيدەنتتەر وڭىرلىك جانە جاھاندىق كۇن تارتىبىندەگى ماسەلەلەر جونىندە جان-جاقتى پىكىر الماستى. قاسىم-جومارت توقايەۆ قازاقستان مەن كورەيانىڭ حالىقارالىق دەڭگەيدەگى كوپتەگەن ماسەلەلەرگە قاتىستى ۇستانىمى ۇقساس ەكەنىن اتاپ ءوتىپ، الەمدەگى گەوساياسي قايشىلىقتاردىڭ شەشىلۋىنە ەكى ەل ورتا دەرجاۆالار رەتىندە ءوز ۇلەستەرىن قوسا الاتىنىن مالىمدەدى.

«بۇگىن قازاق- كورەي دوستىعى جىلناماسىنداعى ايتۋلى كۇن دەۋگە تولىق نەگىز بار. ءبىز كورەيا باسشىسىنىڭ وسى مەملەكەتتىك ساپارىنا ايرىقشا ءمان بەرەمىز. بۇل ەكىجاقتى قارىم- قاتىناستىڭ دەڭگەيى جوعارى ەكەندىگىن كورسەتەدى. مەن ەلدەرىمىز اراسىنداعى ىنتىماقتاستىقتى جوعارى باعالايمىن. بۇگىن ءبىز كەڭەيتىلگەن ستراتەگيالىق ارىپتەستىگىمىزدى ودان ارى دامىتۋعا ۋاعدالاستىق. ءوزارا ىقپالداستىقتىڭ جاڭا باعىتتارىن ايقىندادىق. ەڭ باستىسى ءبىر- بىرىمىزگە ءارقاشان تىلەۋلەس ەكەندىگىمىزدى تانىتتىق»، - دەدى مەملەكەت باسشىسى اقوردادا وڭتۇستىك كورەيا پرەزيدەنتى يۋن سوك يەلمەن كەلىسسوزدەردەن كەيىنگى بىرلەسكەن مالىمدەمە بارىسىندا.

قازاقستان پرەزيدەنتى ساۋدا- ەكونوميكا جانە ينۆەستيتسيا سالالارىنا باسا ءمان بەرىلگەنىن اتاپ ءوتتى.

«كورەيا قازاقستاننىڭ ەڭ ءىرى بەس ينۆەستورىنىڭ ءبىرى. بىلتىرعا دەيىن وسى ەلدەن تارتىلعان ينۆەستيتسيا كولەمى 9,6 ميلليارد دوللارعا جەتتى. بۇل كورسەتكىشتى ۇلعايتۋعا ەكى تاراپ تا مۇددەلى. قازاقستاندا كورەي كاپيتالى بار 700-دەن استام كومپانيا قىزمەت ەتەدى. مىسالى، Samsung ،Hyundai، كيا، Doosan ،Cosco سياقتى الپاۋىت كورپوراتسيالاردى اتاپ وتۋگە بولادى. ولار ەلىمىزدە تابىستى جۇمىس جۇرگىزىپ جاتىر»، - دەدى قاسىم- جومارت توقايەۆ.

ايتا كەتەيىك، بۇگىن مەملەكەت باسشىسى قاسىم- جومارت توقايەۆ قازاقستانعا ءۇش كۇندىك مەملەكەتتىك ساپارمەن كەلگەن وڭتۇستىك كورەيا پرەزيدەنتى يۋن سوك يەلدى قارسى الدى.

اۆتور

مارلان جيەمباي

سوڭعى جاڭالىقتار