قاسىم-جومارت توقايەۆ پەن گۋربانگۋلى بەردىمۇحامەدوۆ ونەركاسىپ كورمەسىن ارالاپ كوردى
استانا. KAZINFORM - قازاقستان پرەزيدەنتى مەن تۇرىكمەنستان حالك ماسلاحاتىنىڭ ءتوراعاسى SPK Turkistan يندۋستريالدى پاركىنە باردى، دەپ حابارلايدى اقوردانىڭ باسپا ءسوز قىزمەتى.
قازىرگى تاڭدا مۇندا جالپى قۇنى 36,5 ميلليارد تەڭگە بولاتىن 6 ينۆەستيتسيالىق جوبا جۇزەگە اسىرىلىپ جاتىر. جاڭبىرلاتىپ جانە تامشىلاتىپ سۋارۋ جۇيەلەرىنىڭ، اۋىل شارۋاشىلىعى تراكتورلارى، ءبىلىم مەن مەديتسينا مەكەمەلەرىنە ارنالعان جيھازدار، ەسىكتەر جانە وندىرىستىك توڭازىتقىشتار ءوندىرىسى جولعا قويىلعان.
ءوندىرىس پاركىن دامىتۋدىڭ كەلەسى كەزەڭىندە 70 گەكتار اۋماققا 112 عيمارات سالۋ، سونداي-اق جالپى سوماسى 39,7 ميلليارد تەڭگە بولاتىن 13 جاڭا جوبانى ىسكە قوسۋ جوسپارلانعان.
قاسىم-جومارت توقايەۆ پەن گۋربانگۋلى بەردىمۇحامەدوۆ عارىش سالاسىندا، ماشينا جاساۋ، مەتاللۋرگيا، قۇرىلىس يندۋسترياسى، جەڭىل، تاماق جانە حيميا ونەركاسىبىندە قىزمەت ەتەتىن قازاقستاندىق وندىرۋشىلەردىڭ كورمەسىمەن تانىستى.
ەكسپوزيتسياعا وتاندىق كاسىپورىندار شىعاراتىن اۆتوكولىكتەر، اۋىل شارۋاشىلىعى تەحنيكالارى، تۇرمىستىق تەحنيكا، مەديتسينالىق قۇرىلعىلار، وندىرىستىك اككۋمۋلياتورلار، جيھازدار، تەكسيل، كيىم جانە تاعى دا باسقا تاۋار تۇرلەرى قويىلعان.
قاسىم-جومارت توقايەۆ پەن گۋربانگۋلى بەردىمۇحامەدوۆ وتاندىق كاسىپورىنداردىڭ وكىلدەرىمەن بىرگە سۋرەتكە ءتۇستى.
وسىعان دەيىن قاسىم-جومارت توقايەۆ گۋربانگۋلى بەردىمۇحامەدوۆپەن بەيرەسمي كەزدەسۋ وتكىزگەنى تۋرالى جازدىق.
