قاسىم-جومارت توقايەۆ پەن كورەيا پرەزيدەنتى كەڭەيتىلگەن قۇرامدا كەلىسسوز جۇرگىزدى
استانا. KAZINFORM - مەملەكەت باسشىسى قاسىم-جومارت توقايەۆ پەن كورەيا رەسپۋبليكاسىنىڭ پرەزيدەنتى يۋن سوك يەل كەڭەيتىلگەن قۇرامدا كەلىسسوز جۇرگىزدى، دەپ حابارلايدى اقوردانىڭ باسپا ءسوز قىزمەتى.

ەكى ەل دەلەگاتسيالارىنىڭ قاتىسۋىمەن وتكەن كەلىسسوز بارىسىندا مەملەكەت باسشىسى قاسىم-جومارت توقايەۆ پرەزيدەنت يۋن سوك يەلدىڭ قازاقستانعا جاساعان العاشقى مەملەكەتتىك ساپارىن تاريحي وقيعا دەپ باعالادى. سونداي-اق بۇگىنگى كەلىسسوزدەر قازاق-كورەي ىقپالداستىعىنىڭ اياسىن كەڭەيتىپ، ەكىجاقتى بايلانىستى جاڭا بەلەسكە كوتەرەتىنىن ايتتى.
قازاقستان پرەزيدەنتىنىڭ پىكىرىنشە، وڭتۇستىك كورەيا جاھاندىق اۋقىمداعى ناعىز ەكونوميكالىق جانە تەحنولوگيالىق لوكوموتيۆكە اينالدى. ال الەمگە ايگىلى كورەي كورپوراتسيالارى حالىقارالىق ارەنادا ەلدىڭ «نەگىزگى جاھاندىق مەملەكەت» رەتىندەگى پوزيتسياسىن ىلگەرىلەتۋگە ەلەۋلى ۇلەس قوسىپ كەلەدى.
قاسىم-جومارت توقايەۆ ەكىجاقتى قاتىناستاردى دامىتۋ ماسەلەلەرىنە توقتالدى. ونىڭ ايتۋىنشا، سەۋل - قازاقستاننىڭ ازيا-تىنىق مۇحيتى ايماعىنداعى ماڭىزدى ستراتەگيالىق سەرىكتەستەرىنىڭ ءبىرى. كورەيا سىرتقى ساۋدا اينالىمى بويىنشا ءتورتىنشى ورىندا جانە ەلىمىزدەگى ەڭ ءىرى شەتەلدىك ينۆەستورلاردىڭ وندىعىنا كىرەدى.

مەملەكەت باسشىسى قازاقستان مەن كورەيانىڭ وتىز جىلدان استام ۋاقىت ىشىندە جوعارى دەڭگەيدەگى ساياسي ديالوگقا قول جەتكىزگەنىن، تابىستى ەكونوميكالىق ىنتىماقتاستىقتى جانە بەرىك گۋمانيتارلىق بايلانىستاردى جولعا قويعانىن اتاپ ءوتتى. ەكى ەل پارلامەنتارالىق، ۇكىمەتارالىق، ۆەدومستۆوارالىق دەڭگەيدە جانە باسقا دا ءتۇرلى سالالاردا ىقپالداستىق ورناتقان. ىسكەرلىك كەڭەس پەن ساۋدا-ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيا تابىستى جۇمىس ىستەپ جاتىر.
قاسىم-جومارت توقايەۆ ەكى ەل كاسىپكەرلەرى اراسىنداعى تىعىز قارىم-قاتىناستى جولعا قويۋ ىسىندە تۇراقتى بايلانىستار اسا ماڭىزدى ءرول اتقاراتىنىنا توقتالدى. سونداي-اق قازاقستاندا وڭتۇستىك كورەيانىڭ كاپيتالى بار 700-دەن استام كومپانيا جەمىستى جۇمىس ىستەپ جاتقانىن ەرەكشە اتاپ ءوتتى.

بۇدان بولەك، تاراپتار مادەني-گۋمانيتارلىق بايلانىستاردى دامىتۋ ماسەلەسىنە نازار اۋداردى.
- قازاقستاندا تۇراتىن 120 مىڭ ەتنيكالىق كورەي ۇلتىنىڭ وكىلدەرى ەكى ەل اراسىنداعى قاتىناستاردى نىعايتۋدا ماڭىزدى ءرول اتقارادى جانە وعان ولشەۋسىز ۇلەس قوسادى. ءوز كەزەگىندە كورەيادا ءبىلىم الىپ جاتقان مىڭنان استام قازاقستاندىق جاستار مەملەكەتتەر اراسىنداعى «دوستىقتىڭ التىن كوپىرى» سانالادى، - دەدى قاسىم-جومارت توقايەۆ.
پرەزيدەنت يۋن سوك يەل قازاق جەرىندە قۇرمەت كورسەتكەنى ءۇشىن مەملەكەت باسشىسىنا العىس ايتىپ، بيىل كورەيا رەسپۋبليكاسى مەن قازاقستان اراسىندا ستراتەگيالىق سەرىكتەستىك ورناعانىنا 15 جىل تولعانىن اتاپ ءوتتى
- كورەيا رەسپۋبليكاسى ءوزىنىڭ باستى ستراتەگيالىق سەرىكتەسى - قازاقستانمەن بىرگە جارقىن جانە كەمەل كەلەشەككە قاتار قادام باسۋعا نيەتتى، - دەدى كورەيا پرەزيدەنتى.
كەلىسسوز بارىسىندا ەنەرگەتيكا، ينفراقۇرىلىم، ونەركاسىپ، ماشينا جاساۋ، ساۋدا، كولىك- لوگيستيكا، سيفرلاندىرۋ، اەروعارىش ونەركاسىبى، قارجى سەكتورى، ءبىلىم بەرۋ، دەنساۋلىق ساقتاۋ، فارماتسيەۆتيكا، تۋريزم، مادەنيەت، ەكولوگيا جانە باسقا دا سالالارداعى ەكىجاقتى ىقپالداستىقتىڭ پەرسپەكتيۆالارى تالقىلاندى.
كەزدەسۋ سوڭىندا پرەزيدەنت قاسىم-جومارت توقايەۆ مازمۇندى جانە كونسترۋكتيۆتى كەلىسسوز جۇرگىزگەنى ءۇشىن كورەي تاراپىنا ريزاشىلىق ءبىلدىردى.