قاسىم-جومارت توقايەۆ ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى
استانا. KAZINFORM - «اقوردا» رەزيدەنسياسىندا التى مەملەكەتتىڭ توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى.
سەنىم گراموتالارىن مىسىر اراب رەسپۋبليكاسىنىڭ ەلشىسى يبتيسسام راكحا احمەد حاسان، سەربيا رەسپۋبليكاسىنىڭ ەلشىسى ۆلاديمير يوۆيچيچ، ليۋكسەمبۋرگ ۇلى گەرتسوگتىگىنىڭ ەلشىسى توماس رايزەن، اۆستراليا ەلشىسى دجون ۋيليام گيرينگ، كولۋمبيا رەسپۋبليكاسىنىڭ ەلشىسى ەكتور يسيدرو ارەناس نەيرا، سيريا اراب رەسپۋبليكاسىنىڭ ەلشىسى باشار دجافاري تاپسىردى.
مەملەكەت باسشىسى ديپلوماتتاردى ەلىمىزدەگى ميسسيالارىنىڭ رەسمي باستالۋىمەن قۇتتىقتاپ، قازاقستاننىڭ بەيبىت سۇيگىش ءارى كونسترۋكتيۆتى سىرتقى ساياسات ۇستاناتىنىنا نازار اۋداردى.
- ءبىز بارلىق ەلمەن، ەڭ الدىمەن، كورشىلەس مەملەكەتتەرمەن تىعىز ىنتىماقتاستىق ورناتىپ، جاقسى قارىم-قاتىناس جاساعىمىز كەلەدى. بۇل جولدىڭ تابىستى بولاتىنىنا سەنىمدىمىن. ءبىز ءارتۇرلى باعىتتا، سونىڭ ىشىندە ەكونوميكا، ينۆەستيتسيا سالالارىندا جانە ساياسي ديالوگ تۇرعىسىندا ىقپالداستىقتى نىعايتۋ ءۇشىن قولدان كەلگەن شارانىڭ ءبارىن جاسايمىز. قازاقستان سىزدەردىڭ حالىقارالىق ارەناداعى سەنىمدى سەرىكتەستەرىڭىز بولاتىنىنا سەندىرگىم كەلەدى، - دەدى پرەزيدەنت.
قاسىم-جومارت توقايەۆ ەلشىلەرگە تابىس تىلەپ، ولارعا ءوز مىندەتتەرىن اتقارۋ بارىسىندا قازاقستان ۇكىمەتى تاراپىنان بارىنشا قولداۋ كورسەتىلەتىنىن اتاپ ءوتتى. سونداي-اق پرەزيدەنت ولاردىڭ مەملەكەتتەرى باسشىلارىنا ىزگى تىلەگى مەن سالەمىن جولدادى.
اۆتور
ەربول جانات
