قاسىم- جومارت توقايەۆ ءبىر قاتار جەتەكشى كومپانيالاردىڭ باسشىلارىن قابىلدادى

قاسىم- جومارت توقايەۆ HMS Bergbau AG كومپانياسىنىڭ باسقارما ءتوراعاسى دەننيس شۆيندتى قابىلدادى، دەپ حابارلايدى قازاقپارات.

кездесу
Фото: Ақорда

كەزدەسۋ بارىسىندا مەملەكەت باسشىسى قازاقستاننىڭ شەتەلدىك ينۆەستورلاردى قولدايتىنىن جانە جوبالاردى تابىستى ىسكە اسىرۋ ءۇشىن قولايلى جاعداي جاسايتىنىن اتاپ ءوتتى.

پرەزيدەنت الەمنىڭ دامىعان ەلدەرىنىڭ ەكونوميكاسى تاراپىنان ليتييگە سۇرانىس ارتىپ كەلە جاتقانىنا نازار اۋدارىپ، سيرەك كەزدەسەتىن مەتالداردى ءوندىرۋ جانە قايتا وڭدەۋ ىنتىماقتاستىقتى دامىتۋدىڭ اسا ماڭىزدى باعىتتارىنىڭ ءبىرى ەكەنىن ايتتى.

مەملەكەت باسشىسى تاۋ- كەن ءوندىرۋ ونەركاسىبىنە قولايلى رەتتەۋ ەكوجۇيەسىن قالىپتاستىرۋ ءۇشىن قازاقستان بار كۇش- جىگەرىن جۇمسايتىنىن جەتكىزدى.

HMS Bergbau AG باسشىسى شىعىس قازاقستان وبلىسىندا ليتي وندىرەتىن جانە ونى قايتا وڭدەيتىن كەن بايىتۋ كومبيناتىن سالۋ جوباسىن تانىستىردى. ونىڭ ايتۋىنشا، جوسپارلانعان ينۆەستيتسيانىڭ جالپى سوماسى - 500 ميلليون دوللار.

قاسىم- جومارت توقايەۆ مۇنداي ينۆەستيتسيالىق جوبالاردىڭ ەل ەكونوميكاسى مەن ونىڭ الەمدىك ارەناداعى باسەكەگە قابىلەتتىلىگىن قولداۋ ءۇشىن ماڭىزدى ەكەنىن اتاپ ءوتتى.

HMS Bergbau AG - گەرمانياداعى قاتتى پايدالى قازبالاردى بارلاۋمەن جانە وندىرۋمەن اينالىساتىن جەتەكشى تاۋەلسىز كومپانيالاردىڭ ءبىرى. بۇل كومپانيا ا ق ش، سينگاپۋر، و ا ر، يندونەزيا، پولشا، ب ا ءا، بوتسۆانا مەملەكەتتەرىندە شيكىزات ءوندىرۋ جۇمىستارىن بەلسەندى جۇرگىزەدى. سونداي- اق ونىڭ قىتايدا، ءۇندىستاندا، كەنيادا، مالايزيادا، پاكىستاندا، شري- لانكادا، بانگلادەشتە جانە ۆەتنامدا وكىلدىكتەرى بار.

**

مەملەكەت باسشىسى قاسىم- جومارت توقايەۆ HHLA كومپانياسىنىڭ باسقارما ءتوراعاسى انگەلا تيتسراتپەن كەزدەستى، دەپ حابارلايدى قازاقپارات.

HHLA (Hamburger Hafen und Logistik) كومپانياسىنىڭ باسشىسىمەن كەزدەسۋ بارىسىندا قازاقستان مەن گەرمانيانىڭ كولىك- لوگيستيكا سالاسىنداعى ىنتىماقتاستىعىن نىعايتۋ پەرسپەكتيۆالارى تالقىلاندى.

مەملەكەت باسشىسى گەرمانيانىڭ كولىك جانە لوگيستيكا سالاسىن دامىتۋدا اتالعان كومپانيانىڭ ماڭىزدى ءرول اتقاراتىنىن ايتا كەلە، ونىڭ ەلىمىزدە فيليال اشۋ تۋرالى شەشىمىن قۇپتادى.

قاسىم- جومارت توقايەۆ بۇل سالانىڭ قازاقستان ءۇشىن ستراتەگيالىق ماڭىزى زور ەكەنىن ايتتى. ويتكەنى ەلىمىز ەۋرازياداعى باستى ترانزيت تورابى رەتىندە ءوز پوزيتسياسىن كۇشەيتۋگە نيەتتى.

اڭگىمەلەسۋ بارىسىندا قازاقستان قۇرعاق جانە سۇيىق جۇكتەردى تاسىمالداۋعا ارنالعان جاڭا تانكەرلەر ساتىپ الۋ، سونداي- اق كاسپي تەڭىزىندەگى اقتاۋ جانە قۇرىق پورتتارىن جاڭعىرتۋ ءۇشىن قارجى تارتۋعا مۇددەلى ەكەنى اتاپ ءوتىلدى.

HHLA - جەتەكشى ەۋروپالىق لوگيستيكالىق كومپانيا. كاسىپورىن گامبۋرگ، ودەسسا، تاللينن، تريەست قالالارىنداعى تەڭىز پورتى تەرمينالدارىنا، سونداي- اق ولارمەن بايلانىستىرىلعان ورتالىق جانە شىعىس ەۋروپاداعى ينتەرمودالدىق توراپتار جەلىسىنە يەلىك ەتەدى.

**

قازاقستان پرەزيدەنتى قاسىم- جومارت توقايەۆ Euler Hermes اگەنتتىگىنىڭ باسقارما مۇشەسى ەدنا شيەنەنى قابىلدادى، دەپ حابارلايدى قازاقپارات.

كەزدەسۋ بارىسىندا ەكونوميكالىق ىنتىماقتاستىقتى ودان ءارى نىعايتۋ، سونىڭ ىشىندە قارجىلىق ساقتاندىرۋ سالاسىندا بىرلەسكەن جوبالاردى ازىرلەۋ، تاجىريبە الماسۋ جانە وقۋ باعدارلامالارىن ۇيىمداستىرۋ مۇمكىندىكتەرى قاراستىرىلدى.

مەملەكەت باسشىسى Euler Hermes اگەنتتىگىنىڭ قازاقستان ءۇشىن ماڭىزدى سەرىكتەس ەكەنىنە نازار اۋداردى. كومپانيا كرەديتتى ساقتاندىرۋ ىسىندە جاھاندىق كوشباسشى سانالادى جانە كەشەندى قارجىلىق شەشىمدەر جاسايتىن الەمدەگى ەڭ ءىرى كومپانيالاردىڭ ءبىرى - Allianz Group توبىنىڭ قۇرامىنا كىرەدى.

قاسىم- جومارت توقايەۆقا قازاقستان دامۋ بانكى مەن Helaba بانكى اراسىندا قارجىلىق ىنتىماقتاستىق تۋرالى كەلىسىمگە قول قويىلعانى جونىندە مالىمەت بەرىلدى. اتالعان كەلىسىمگە سايكەس AltynAlmas Reagents كومپانياسىنىڭ سيانيد ناتريي وندىرەتىن حيميالىق زاۋىتىنىڭ قۇرىلىسىنا 100 ميلليون ەۆروعا دەيىن قارجى ءبولۋ قاراستىرىلعان.

اۆتور

اسحات رايقۇل

سوڭعى جاڭالىقتار