قاسىم-جومارت توقايەۆ بولگاريا پرەزيدەنتىن قارسى الدى
استانا. KAZINFORM - مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن بولگاريا پرەزيدەنتى رۋمەن راديەۆتى قارسى الدى.
الدىمەن قاسىم-جومارت توقايەۆ پەن رۋمەن راديەۆ ءبىر بىرىنە رەسمي دەلەگاتسيا مۇشەلەرىن تانىستىردى. وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى. پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.
ءانۇرانداردى تىڭداپ بولعاننان كەيىن قاسىم-جومارت توقايەۆ پەن رۋمەن راديەۆ كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەيمان مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى. قۇرمەتتى قاراۋىل باستىعىمەن قوشتاستى.
جوعارى دەڭگەيدە وتەتىن كەلىسسوزدەر بارىسىندا قازاق-بولگار ساۋدا-ەكونوميكالىق جانە ينۆەستيتسيالىق ىنتىماقتاستىعىنىڭ پەرسپەكتيۆاسى تالقىلانباق.
