قاسىم-جومارت توقايەۆ اقوردادا موڭعوليا پرەزيدەنتىن قارسى الدى
استانا. KAZINFORM - مەملەكەت باسشىسى قاسىم-جومارت توقايەۆ ەلىمىزگە مەملەكەتتىك ساپارمەن كەلگەن موڭعوليا پرەزيدەنتى ۋحنااگين حۋرەلسۇحتى قارسى الدى.
الدىمەن مەيماننىڭ كولىگى پرەزيدەنت سارايىنىڭ ورتالىق باسقىشىنا كەلىپ، ۇزىن كىلەمشەنىڭ جيەگىنە توقتادى. ول جەردە مەيماندى قازاقستان پرەزيدەنتى پروتوكول قىزمەتىنىڭ قىزمەتكەرى كۇتىپ الدى. اقوردادا ۋحنااگين حۋرەلسۇحتى قاسىم-جومارت توقايەۆ قارسى الدى. ءوزارا سالەمدەسكەننەن كەيىن مەيمان مەن پرەزيدەنت ءبىر- بىرىنە دەلەگاتسيالارىن تانىستىردى.
وسىدان كەيىن مارتەبەلى مەيماننىڭ ساپارىنا وراي سالتاناتتى راسىمدەر زالىندا ساپ تۇزەگەن قۇرمەت قاراۋىلىنىڭ باستىعى مەملەكەت باسشىلارىنا سالەمدىك بايانات بەردى.
پرەزيدەنت وركەسترى ەكى ەلدىڭ مەملەكەتتىك ءانۇرانىن ورىندادى.
ءانۇرانداردى تىڭداپ بولعاننان كەيىن قاسىم-جومارت توقايەۆ پەن موڭعوليا پرەزيدەنتى كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
ونىڭ الدىنا كەلگەندە مەيمان توقتاپ، باسىن ءسال ءيىپ، ءوزىنىڭ قۇرمەتىن ءبىلدىردى. سونان سوڭ مەملەكەت باسشىلارى قۇرمەت قاراۋىل ساپىنىڭ بويىمەن ءجۇردى. قۇرمەت قاراۋىلى باستىعىمەن قوشتاستى.
جوعارى دەڭگەيدەگى كەلىسسوزدەر بارىسىندا ەكى ەلدىڭ ساياسي، ساۋدا-ەكونوميكالىق جانە مادەني- گۋمانيتارلىق ىنتىماقتاستىعىن نىعايتۋ پەرسپەكتيۆاسى تالقىلانادى.
