پرەزيدەنتكە كوكشەتاۋداعى «كوك شالعىن» جوباسى تانىستىرىلدى
استانا. KAZINFORM - كوكشەتاۋ قالاسىنداعى «كوك شالعىن» ءبىرتۇتاس قوعامدىق كەڭىستىگىن قالىپتاستىرۋ جوباسىنىڭ تۇجىرىمداماسىنا سايكەس، ماڭگىلىك الاۋ، داڭق اللەياسى، تاۋەلسىزدىك الاڭى جانە ساعديەۆ كوشەسى سەكىلدى قالانىڭ ەڭ كورنەكتى جەرلەرىن ۇيلەسىمدى ساۋلەتىمەن جانە ديزاينەرلىك شەشىمدەرىمەن ەرەكشەلەنەتىن ءبىرىڭعاي تۋريستىك باعىتقا بىرىكتىرۋ كوزدەلگەن.
كوكشەتاۋ قالاسىنىڭ اكىمى ءانۋار كۇمپەكەيەۆ جوبا اياسىندا اۋماقتى كوگالداندىرۋ، سونداي-اق اۆتوماتتى سۋارۋ جۇيەسى، قۇرعاق سۋبۇرقاق، دەكوراتيۆتى شامدار مەن ءساندى ورىندىقتار ورناتۋ جۇمىستارى جۇرگىزىلەتىنىن ايتتى. قوپا كولىمەن جانە جاڭا جاعالاۋمەن ۇشتاساتىن كەڭىستىك قالا تۇرعىندارى مەن قوناقتارى ءۇشىن قولايلى ورتاعا اينالادى. جالپى اۋماعى 7,5 گەكتارعا جۋىق جەر اباتتاندىرىلىپ، جاسىل جەلەك وتىرعىزىلماق.
پرەزيدەنتكە «تازا قازاقستان» جالپى رەسپۋبليكالىق اكسياسى اياسىندا كوكشەتاۋدا 7 مىڭنان استام اعاش وتىرعىزىلعانى تۋرالى باياندالدى. جىل سوڭىنا دەيىن ونىڭ سانى 11 مىڭعا جەتكىزىلەدى.
بۇدان كەيىن مەملەكەت باسشىسى بيىل ماۋسىم ايىندا پايدالانۋعا بەرىلگەن جاڭا جاعالاۋمەن تانىستى.
مەملەكەت باسشىسى ساياباقتا جەرگىلىكتى زيالى قاۋىم وكىلدەرىمەن اڭگىمەلەستى.
سونىمەن قاتار اقمولا وبلىسىندا رەنوۆاتسيا باعدارلاماسىمەن جاڭا قونىسقا كوشكەن وتباسىمەن اڭگىمەلەستى.
قاسىم-جومارت توقايەۆ اقمولا وبلىسىندا تۇرعىن ءۇي كەشەنىندەگى پاتەرلەردى ارالاپ كورىپ، رەنوۆاتسيا باعدارلاماسى اياسىندا جاڭا قونىسقا كوشىپ كەلگەن وتباسىلاردىڭ بىرىمەن اڭگىمەلەستى. قاسىم-جومارت توقايەۆقا باس جوسپار اياسىندا جىلۋ ەلەكتر ورتالىعى، وبلىستىق كوپ بەيىندى اۋرۋحانا، ازاماتتىق قورعانىس اكادەمياسى جانە كوپ فۋنكسيونالدى سپورت كەشەنى سالىنىپ جاتقانى جونىندە باياندالدى. بۇدان بولەك، الپىسقا جۋىق ونەركاسىپ كاسىپورنىنا ەسەپتەلگەن يندۋستريالىق ايماقتىڭ نەگىزى قالانىپ جاتىر.
