قاسىم حاننىڭ جارعىسى ادەت-عۇرىپقا نەگىزدەلىپ جاسالعان
استانا. قازاقپارات - قاسىم حان بيلىك قۇرعان سوڭ، قازاق حالقىنىڭ ەتنيكالىق اۋماعىن كەڭەيتۋ بارىسىندا ءبىراز قادامدار جاسادى. ول بۇل جولدا ادەت-عۇرىپتىق زاڭدارعا ارقا سۇيەدى.
ءتىپتى شاريعات قاعيداسىن مىعىم ۇستانعان وتىرىقشى اۋداندار دا قاسىم حاننىڭ قول استىنا وتكەن سوڭ، ادەت-عۇرىپقا سۇيەنگەن قازىلىق بيلىكتەرگە جۇگىنە باستادى.
وسىلايشا قاسىم حان بۇقاراعا قۇران تالاپتارىنا قايشى كەلمەيتىن، قازاقي عۇرىپ ەرەكشەلىكتەرىن ساقتايتىن زاڭ ۇسىنا ءبىلدى. مىسالى، وسى ارقىلى حان جەتى اتاعا دەيىن ۇيلەنبەۋ، امەڭگەرلىك، قۇدالىق جول-جورالار، قازىلىق بيلىك ت.ب. سەكىلدى سالالاردا جەتىستىككە جەتتى.
بۇل زاڭعا ەنگەن ەرەجەلەر مىنالار: مۇلىك زاڭى (جەر داۋى، مال-مۇلىك داۋى)؛ قىلمىس زاڭى (كىسى ءولتىرۋ، تالاۋ، شاپقىنشىلىق جاساۋ، ۇرلىق قىلۋ)؛ اسكەري زاڭ (الامان مىندەتى، قوسىن جاساقتاۋ، قارا قازان، ەردىڭ قۇنى، تۇلپار ات)؛ ەلشىلىك جورالارى (مايتالمان شەشەندىك، حالىقارالىق قارىم-قاتىناستاعى سىپايىلىق، ادەپتىلىك، يبالىلىق)؛ جۇرتشىلىق زاڭى (شۇلەن تارتۋ، اس، توي، مەرەكە، دۋمان ۇستىندەگى ەرەجەلەر، ات جارىس، بايگە ەرەجەلەرى، جاساۋىل، بەكەۋىل، تۇتقاۋىل مىندەتتەرى. بۇل جارعى حالىق اراسىندا ىلتيپاتپەن «قاسىم حاننىڭ قاسقا جولى» دەپ اتالىپ كەتتى.
