قاسىم-جومارت توقايەۆقا يوردانيانىڭ ەڭ جوعارى مەملەكەتتىك ناگراداسى بەرىلدى

- مەن ءۇشىن يوردان حاشيميت كورولدىگىنىڭ جوعارى ناگراداسىنا يە بولۋ - زور مارتەبە. بۇل وردەن ءسىزدىڭ تەكتى اۋلەتىڭىزدىڭ ابىرويىن اسىرعان تۇلعانىڭ ەسىمىمەن اتالادى. ونىڭ ار-وجدانى، سەنىمى مەن نانىمى، تۋعان ەلىنە ادال قىزمەتى ۇرپاققا ۇلگى بولىپ كەلەدى. وسى جوعارى ناگرادانى ەڭبەگىمنىڭ باعالانۋى عانا ەمەس، ەڭ الدىمەن، حالىقتارىمىز اراسىنداعى بەرىك دوستىق پەن ءوزارا قۇرمەتتىڭ بەلگىسى دەپ سانايمىن. بۇل قازاقستان مەن يوردانيا اراسىنداعى بايلانىستاردىڭ تىعىز ءارى دايەكتى تۇردە نىعايىپ كەلە جاتقانىن ايعاقتايدى. ءسىزدىڭ ەكىجاقتى ىنتىماقتاستىقتى ودان ءارى ىلگەرىلەتۋ نيەتىڭىزدى جوعارى باعالايمىن، - دەدى مەملەكەت باسشىسى.

Al-Hussain ibn Ali وردەنىن 1949 -جىلى يوردانيا كورولى ى ابداللا بەن ءال-حۋسەين اكەسى - مەككە ءشاريفى حۋسەين بەن ءاليدىڭ (1853- 1931 ج ج) قۇرمەتىنە تاعايىنداعان. ول حاشيميتتەر اۋلەتىنىڭ اسا كورنەكتى وكىلدەرىنىڭ ءبىرى بولعان.

وردەندى تابىستاۋ يوردانيا كورولى تاراپىنان كورسەتىلگەن ايرىقشا قۇرمەتتىڭ بەلگىسى ءارى جوعارى دەڭگەيدەگى ساياسي سەنىمنىڭ ايعاعى سانالادى.

بۇعان دەيىن مەملەكەت باسشىسى قاسىم-جومارت توقايەۆ يوردانيا كورولىن Al-Farabi وردەنىمەن ماراپاتتاعان ەدى.

قاسىم-جومارت توقايەۆ اقابا پروتسەسىن جوعارى باعالايتىنىن جانە الداعى سەسسيانىڭ جاساندى ينتەللەكت سالاسىنداعى قاۋىپسىزدىك تاقىرىبىنا ارنالاتىنىن دا حابارلادى.

بۇگىن پرەزيدەنت قاسىم-جومارت توقايەۆتىڭ شاقىرۋىمەن قازاقستانعا يوردان حاشيميت كورولدىگىنىڭ كورولى II ابداللا بەن ءال-حۋسەين رەسمي ساپارمەن كەلدى. استانا اۋەجايىندا يوردانيا كورولىن مەملەكەت باسشىسىنىڭ ءوزى كۇتىپ الدى.

سونداي-اق اقوردادا قازاقستان پرەزيدەنتى قاسىم-جومارت توقايەۆ پەن يوردانيا كورولى ⅱابداللا بەن ءال-حۋسەين كەلىسسوز جۇرگىزدى.