قاسىم-جومارت توقايەۆ سيرەك مەتالداردى بارلاۋ مەن وڭدەۋدى كۇشەيتۋدى تاپسىردى
استانا. KAZINFORM - پرەزيدەنت قاسىم-جومارت توقايەۆتىڭ توراعالىعىمەن اسا ماڭىزدى مينەرالدار، سونىڭ ىشىندە سيرەك كەزدەسەتىن مەتالدار سالاسىن دامىتۋ ماسەلەلەرى جونىندە قاۋىپسىزدىك كەڭەسىنىڭ وتىرىسى ءوتتى.
اقوردانىڭ باسپا ءسوز قىزمەتىنىڭ حابارلاۋىنشا، مەملەكەت باسشىسى قازاقستان رەسۋرس جانە ءوندىرىس الەۋەتى جاعىنان ورتالىق ازيادا كوش باستاپ تۇرعانىنا نازار اۋدارىپ، مۇنى مەملەكەت مۇددەسىنە پايدالانۋ قاجەتتىگىن اتاپ ءوتتى.
- قازبا بايلىعى مول ەلدەر ءۇشىن الەمدەگى قازىرگى احۋال ءتيىمدى ءارى بىرەگەي مۇمكىندىكتەرگە جول اشىپ وتىر، - دەدى مەملەكەت باسشىسى.
سونىمەن قاتار پرەزيدەنت دۇنيە جۇزىندە اسا ماڭىزدى ماتەريالدارعا قول جەتكىزۋدە مەملەكەتتەر اراسىنداعى باسەكەلەستىك كۇشەيە تۇسكەنىن ايتتى. بۇل باعىت جوعارى تەحنولوگيالىق سالالاردى دامىتۋ تۇرعىسىنان ستراتەگيالىق ماڭىزعا يە.
وسى ورايدا قازاقستان قولدا بار رەسۋرستار مەن ونەركاسىپ الەۋەتىن ءتيىمدى پايدالانىپ، ءوز مۇمكىندىكتەرى مەن ءوندىرىس تىزبەگىن دايەكتى تۇردە دامىتقانى ءجون.
جيىن بارىسىندا ۇكىمەت مۇشەلەرى سالانىڭ قازىرگى جاي-كۇيى، رەسۋرس قورىن يگەرۋ پەرسپەكتيۆاسى، قايتا وڭدەۋ باعىتىن دامىتۋ جانە كەدەرگىلەر تۋرالى ەسەپ بەردى.
وتىرىس قورىتىندىسى بويىنشا ۇكىمەت پەن ءتيىستى مەملەكەتتىك ورگاندارعا سالانى دامىتۋعا قاتىستى جۇيەلى كوزقاراس قالىپتاستىرۋ، رەتتەۋ تەتىكتەرىن جەتىلدىرۋ، گەولوگيالىق بارلاۋ مەن وڭدەۋ ءىسىن دامىتۋ، تەحنوگەندى مينەرالدىق تۇزىلىمدەردى ەكونوميكالىق اينالىمعا قوسۋ، زەرتحانالار بازاسى مەن كادرلار قۇرامىن نىعايتۋ، سونداي-اق اكىمشىلىك كەدەرگىلەردى جويۋ جونىندە ناقتى تاپسىرمالار بەرىلدى.
ەسكە سالايىق، بۇعان دەيىن قاسىم-جومارت توقايەۆ ت م د- نىڭ 1-ۆولونتەرلەر فورۋمىنا قاتىسۋشىلارعا قۇتتىقتاۋ جولداعان ەدى.
