قاسىم-جومارت توقايەۆ ەلىمىزدەگى رەفورمالاردىڭ باستى ەرەكشەلىكتەرىن اتادى

استانا. KAZINFORM - اۋقىمدى وزگەرىستەر مەن ءۇستىرت كوزقاراس ەشقاشان بىرگە جۇرمەيدى، ءبىر-بىرىنە كەدەرگى بولادى.

Казахстан подошел к 35-летию независимости с высоким международным авторитетом — Токаев
Фото: Акорда

بۇل تۋرالى III ستراتەگيالىق سەرىكتەستەر فورۋمىندا مەملەكەت باسشىسى قاسىم-جومارت توقايەۆ ايتتى.

- رەفورمالارىمىزدىڭ ەڭ باستى بولىگى - بۇل كونستيتۋتسيانىڭ قابىلدانۋى. ازاماتتارىمىز جالپىۇلتتىق رەفەرەندۋمعا بەلسەندى قاتىسىپ، ءوز تاڭداۋىن جاسادى. قازاقستاننىڭ جاڭا كونستيتۋتسياسى زاڭدى كۇشىنە ەندى. كونستيتۋتسيادا ەلىمىزدىڭ ماقسات-مۇراتى مەن بولاشاقتاعى بەينەسى ايقىن كورىنىس تاپتى. قازاقستاننىڭ ەگەمەندىگى مەن تاۋەلسىزدىگى، جەرىمىزدىڭ تۇتاستىعى، ازاماتتارىمىزدىڭ زاڭدى قۇقىقتارى مەن بوستاندىقتارى مەملەكەتتىڭ قاستەرلى قۇندىلىعى دەپ تانىلدى، - دەدى مەملەكەت باسشىسى.

قاسىم-جومارت توقايەۆتىڭ ايتۋىنشا، قوعامدا زاڭ مەن ءتارتىپتى ورنىقتىرۋ، جالپى ۇلتتىق بىرلىكتى بەكەمدەۋ، حالىقتىڭ ءال-اۋقاتىن ارتتىرۋ بۇلجىماس قاعيدات رەتىندە بەكىتىلدى. ادام كاپيتالىن، ءبىلىم مەن عىلىمدى، يننوۆاتسيانى دامىتۋ ستراتەگيالىق مىندەت دەپ بەلگىلەندى.

- كونستيتۋتسيا اۋقىمدى وزگەرىستەردىڭ جاڭا شەشۋشى كەزەڭىنە جول اشتى. ەلىمىزدە مەملەكەتتىك باسقارۋ جۇيەسى تۇبەگەيلى جاڭعىردى. قوس پالاتالى پارلامەنتتىڭ ورنىنا ءبىر پالاتالى قۇرىلتاي كەلىپ، قازىرگى تاڭدا زاڭ جوبالارىمەن اينالىسۋدا. جاڭا مەكەمە - قاۋىپسىزدىك كەڭەسىنىڭ اپپاراتى قۇرىلدى. ەڭ جوعارى كونسۋلتاتيۆتىك ورگان - قازاقستان حالىق كەڭەسى ءوز جۇمىسىن باستادى،- دەدى پرەزيدەنت.

مەملەكەت باسشىسىنىڭ اتاپ وتۋىنشە، تۇبەگەيلى وزگەرىستەر قوعامنىڭ بارلىق سالاسىندا جۇرگىزىلەتىن بولدى.

- ازاماتتارىمىز قازىردىڭ وزىندە رەفورمالاردىڭ وڭ ىقپالىنا، يگىلىگىنە كوز جەتكىزدى. قازاقستان رەفورمالارىنىڭ ەرەكشەلىگى - بۇل الدىن الا دايىندالعان جوسپارعا سايكەس ىشكى تەمىردەي لوگيكانىڭ بولۋى، ياعني ناقتى ءتارتىپ پەن ساباقتاستىقتىڭ ساقتالۋى. سەبەبى اۋقىمدى وزگەرىستەر مەن ءۇستىرت كوزقاراس ەشقاشان بىرگە جۇرمەيدى، ءبىر-بىرىنە كەدەرگى بولادى. بۇل - زاڭدى نارسە. وسىلايشا، تۇبەگەيلى رەفورمالار جۇرگىزۋ ارقىلى قازاقستان جاڭا تاريحي ءوسۋ، ورلەۋ داۋىرىنە قادام باستى،-دەدى پرەزيدەنت.