توقايەۆ پەن ب ا ءا دەلەگاتسياسى كولىك-لوگيستيكا سالاسىنداعى ىنتىماقتاستىقتى دامىتۋدى تالقىلادى
استانا. KAZINFORM - مەملەكەت باسشىسى ب ا ءا ەنەرگەتيكا جانە ينفراقۇرىلىم ءمينيسترى سۋحەيل ءال-مازرۋي مەن ابۋ دابي امىرلىگى دەنساۋلىق ساقتاۋ دەپارتامەنتىنىڭ ءتوراعاسى، G42 International كومپانياسىنىڭ باس ديرەكتورى مانسۋر ءال-مانسۋريمەن كەزدەستى.
️پرەزيدەنت بەرىك دوستىق بايلانىسقا، ءوزارا سەنىمگە، ستراتەگيالىق سەرىكتەستىككە نەگىزدەلگەن قازاقستان مەن بىرىككەن اراب امىرلىكتەرى اراسىنداعى قارىم-قاتىناس ەرەكشە سيپاتقا يە ەكەنىن اتاپ ءوتتى.
️سونىمەن قاتار ب ا ءا قازاقستاننىڭ ءىرى شەتەلدىك ينۆەستورلارىنىڭ وندىعىنا كىرەتىنىن ايتتى. 2025 -جىلى ەلىمىزگە امىرلىكتەردەن 1,64 ميلليارد دوللار تىكەلەي ينۆەستيتسيا تارتىلىپ، بۇل كورسەتكىش 3,5 ەسە ۇلعايعان.
️قاسىم-جومارت توقايەۆ ورايلى ءساتتى پايدالانا وتىرىپ، ب ا ە پرەزيدەنتى شەيح مۇحاممەد بەن زايد ءال ناھايانعا، ب ا ءا ۆيتسە-پرەزيدەنتى، پرەمەر-ءمينيسترى، دۋباي ءامىرشىسى شەيح مۇحاممەد بەن راشيد ءال ماكتۋمعا، ب ا ءا ۆيتسە-پرەزيدەنتى شەيح مانسۇر بەن زايد ءال ناھايانعا ىستىق ىقىلاسىن جولدادى.
️كەزدەسۋدە كولىك- لوگيستيكا سالاسىنداعى ىنتىماقتاستىقتى دامىتۋعا باسا ءمان بەرىلدى. بۇدان بولەك، AD Ports Group كومپانياسىمەن بىرلەسكەن جوبالاردى ىسكە اسىرۋ، كاسپي تەڭىزىندە پورتتى ينفراقۇرىلىم مەن فلوتتى دامىتۋ، سونداي- اق ورتا ءدالىزدى نىعايتۋ ماسەلەلەرى تالقىلاندى.
️سونىمەن قاتار ترانساۋعان ءدالىزىنىڭ پەرسپەكتيۆاسى مەن تەڭىز، تەمىرجول، اۆتوكولىك جانە اۋە تاسىمالى باعىتتارىنداعى ۇزاقمەرزىمدى سەرىكتەستىكتى قالىپتاستىرۋ جايى قاراستىرىلدى.
جاساندى ينتەللەكت پەن سيفرلاندىرۋ سالالارىنداعى سەرىكتەستىك تە اڭگىمە ارقاۋىنا اينالدى.
مەملەكەت باسشىسى Presight AI كومپانياسىمەن سۋپەركومپيۋتەر ينفراقۇرىلىمى جوبالارىن ىسكە اسىرۋ، Smart City جانە كولىك قوزعالىسى بەينەمونيتورينگىنىڭ ۇلتتىق جۇيەسىن قۇرۋ بويىنشا ىقپالداستىقتى جوعارى باعالادى.
️قاسىم-جومارت توقايەۆ پەن ب ا ءا دەلەگاتسياسى G42 كومپانياسىنىڭ ەكىباستۇزدا «دەرەكتەردى وڭدەۋ ورتالىقتارىنىڭ القابى» اۋقىمدى ەكوجۇيەسىن قۇرۋعا قاتىسۋ مۇمكىندىگىن قاراستىردى.
