قاسىم-جومارت توقايەۆ ادامدارعا كوزقاراسى قالاي قالىپتاساتىنىن ايتتى
استانا. KAZINFORM - اۋىل شارۋاشىلىعى ەڭبەككەرلەرىنىڭ Ⅲ فورۋمىندا مەملەكەت باسشىسى قاسىم-جومارت توقايەۆ ادامدارعا كوزقاراسى قالاي قالىپتاساتىنىن ايتتى.
- ەشقانداي جوعارى ناگرادا، كەرەمەت ءبىلىم جانە مول تاجىريبە زاڭعا قايشى ارەكەت جاساعان كەزدە كەشىرىم جاساۋعا نەگىز بولمايدى. كەشەگى تابىسىڭ ەمەس، بۇگىنگى جۇمىسىڭ باعالانادى. سول ورىنعا قانشالىقتى لايىق ەكەنىڭدى ناقتى ناتيجە جانە ىسىڭە جاۋاپكەرشىلىكپەن قاراۋ ارقىلى كورسەتە الاسىڭ. پرەزيدەنت رەتىندە مەنىڭ ادامدارعا كوزقاراسىم اتقارعان ىسىنە قاراي قالىپتاسادى. مەنىڭ تاراپىمنان ەشقانداي ارتىق نەمەسە شامادان تىس تالاپ قويىلمايدى: ءتارتىپتى بۇزباساڭ، ادال بولساڭ، جيناقى ءجۇرىپ، مەملەكەت مۇددەسىنە قيانات جاساماساڭ بولعانى، - دەدى قاسىم-جومارت توقايەۆ.
پرەزيدەنتتىڭ ايتۋىنشا، بۇل - بارلىق لاۋازىمدى تۇلعالارعا قويىلاتىن قاراپايىم، ورىندى تالاپ. ونى مۇلتىكسىز ورىنداۋ قاجەت.
- تالاي رەت ايتتىم، تاعى دا ەسكە سالامىن: كونستيتۋتسيادا «زاڭ مەن ءتارتىپ» بۇلجىماس قاعيدات رەتىندە بەكىتىلدى جانە اتاق-ابىرويىنا، قوعامداعى ورنىنا قاراماستان ازاماتتاردىڭ بارىنە بىردەي قولدانىلادى. بارلىق دەڭگەيدەگى باسشىلار كونستيتۋتسيالىق قۇندىلىقتاردى تەرەڭ ءتۇسىنىپ، ونى ءىس جۇزىندە ۇستانۋعا ءتيىس، سونداي-اق ادىلەتتى قازاقستان قۇرۋ يدەياسىن شىنايى نيەتپەن قابىلداعانى ءجون، - دەدى مەملەكەت باسشىسى.