قاسىم-جومارت توقايەۆ ا و س ش ك- ءنى بىرەگەي حالىقارالىق فورۋم دەپ اتادى
باكۋ. KAZINFORM - مەملەكەت باسشىسى اوسشك VII سامميتىندە ءسوز سويلەدى. قازاقستان پرەزيدەنتى قوناقجايلىق كورسەتكەنى جانە سامميتتى جوعارى دەڭگەيدە ۇيىمداستىرعانى ءۇشىن ازەربايجان پرەزيدەنتى يلحام اليەۆكە العىس ايتتى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ ديالوگتىڭ، سەنىمدى نىعايتۋدىڭ جانە جان-جاقتى ىنتىماقتاستىقتىڭ بىرەگەي الاڭى رەتىندە ا و س ش ك الەۋەتىن كەڭەيتۋگە باعىتتالعان ازەربايجان تاراپىنىڭ بەلسەندى ءتوراعالىعىن وڭ باعالادى.
- قازاقستان ءۇشىن كەڭەستىڭ ماڭىزى ەرەكشە. ەلىمىز وتىز جىلدان اسا ۋاقىت بۇرىن كەڭ بايتاق وڭىردە ءوزارا سەنىمدى ارتتىرۋ جانە قاۋىپسىزدىكتى قامتاماسىز ەتۋگە سەپتىگىن تيگىزۋ ماقساتىندا وسى فورۋمدى قۇرۋ جونىندە باستاما كوتەرگەن بولاتىن. سودان بەرى ا و س ش ك ءوزارا ءتيىمدى ناتيجەگە قول جەتكىزۋ ءۇشىن مۇشە مەملەكەتتەردى ورتاق ىسكە جۇمىلدىرىپ كەلەدى. باستاپقىدا ازياداعى قاۋىپسىزدىكتى ساقتاپ، سەنىمدى نىعايتۋدى كوزدەيتىن جالپىعا ورتاق تىكەلەي ديالوگ فورماتىندا قۇرىلعان بۇل الاڭ بۇگىندە بىرەگەي فورۋمعا اينالدى. ۇيىمعا مۇشە ەلدەر ازيا قۇرلىعىنىڭ شامامەن 90 پايىزىن قامتيدى. مۇندا جەر شارى تۇرعىندارىنىڭ جارتىسىنان استامى ءومىر سۇرەدى. حالىقارالىق ينستيتۋتتاردىڭ كوبىندە مۇنداي الەۋەت جوق، - دەدى مەملەكەت باسشىسى.
قاسىم-جومارت توقايەۆ بۇل فورماتتىڭ اۋقىمى ا و س ش ك- ءنىڭ زور الەۋەتىن تانىتاتىنىن، ال ورتاق بولاشاق قۇرۋعا ۇمتىلعان جالىندى جاستار ونىڭ قوزعاۋشى كۇشى سانالاتىنىن ايتتى.
- قاۋىپسىز ءارى گۇلدەنگەن ازيا قۇرۋعا دەگەن شىنايى نيەتىمىزدى كورسەتەتىن ا و س ش ك رۋحى شىن مانىندە بەلگىلى برەندكە اينالدى. بۇگىن لاوستىڭ وسى ۇيىمعا مۇشە بولعانىنا قۋانىشتىمىن، - دەدى ول.
بۇدان بۇرىن پرەزيدەنت قاسىم-جومارت ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ 7-سامميتىنە قاتىسىپ جاتقانىن جازعانبىز.
