قاسقىر سارقىراماسى مەن مىلقاۋ اۋىل: اقتوبەدە ەكوتۋريزم دامىپ كەلەدى
اقتوبە. KAZINFORM - اقتوبە وبلىسى قارعالى اۋدانىنداعى قاسقىر سارقىراماسىنا كوكتەمدە تاۋلىگىنە 500، كەيدە 1000 ادام بارىپ، تىنىعادى. جەرگىلىكتى اكىمدىك الداعى ۋاقىتتا «قارعالى اۋدانىنىڭ 7 كەرەمەتى» تۋرمارشرۋتىن جاساۋدى جوسپارلاپ وتىر.
قارعالى اۋدانى قازىر كەلۋشىلەرگە ارناپ مىلقاۋ اۋىل دا دايارلاپ قويعان.
مۇندا كەلۋشىلەر تاۋ-تاس پەن ونىڭ ەتەگىنە جينالعان سۋدى تاماشالاپ، تابيعات اياسىندا تىنىعا الادى. جەرگىلىكتى تۇرعىندار بۇرىن مۇندا كورىپكەل تۇرعانىن، ول ءوزى سويلەمەسە دە ايتپاق ويىن ءبىر ايەل ارقىلى جەتكىزەتىنىن اڭىز ەتىپ ايتادى.
تاعى ءبىر نۇسقادا اۋىلدان ادامدار كوشكەندە، تەك باقتاشى راتاي عانا قالعان. ال ول بولسا مىلقاۋ بولعان. سودان بۇل ماڭ مىلقاۋ اۋىل اتانىپ كەتكەن.
اشىلىساي اۋىلدىق وكرۋگىنە قاراستى قاسقىر سارقىراماسى بولسا، اقتوبەلىكتەر مەن كورشى رەسەيلىكتەر ءجيى تىنىعاتىن ورىنعا اينالدى.
- قارعالى شاعىن اۋدان بولعانىمەن، تابيعاتى ەكوتۋريزمگە سۇرانىپ تۇر. قازىرگى كەزدە «قارعالىنىڭ 7 كەرەمەتى» دەپ ءتىزىم جاساپ جاتىرمىز. وعان قاسقىر سارقىراماسى، مىلقاۋ اۋىلى، ەلىمىزدىڭ باتىسىنداعى ەڭ ۇلكەن قارعالى سۋ قويماسى كىرەدى. سونىمەن بىرگە كيەلى جەرلەردى دە وسى قاتارعا قوسامىز. قازىر نەگىزگى ۇسىنىستارى قارالىپ، تالداۋ جاسالىپ جاتىر، - دەدى قارعالى اۋدانى اكىمىنىڭ ورىنباسارى بەكزات باداقوۆ.
ايتا كەتەيىك، وسىدان ەكى جىل بۇرىن اۋماق شارۋا قوجالىعىنا بەرىلدى. «بيزنەستىڭ جول كارتاسى-2025» باعدارلاماسى اياسىندا جالپى سوماسى 49,4 ميلليون تەڭگەگە ينفراقۇرىلىمدى دامىتۋ جۇمىسىن جۇرگىزىلدى. وسى مەملەكەتىك باعدارلاما اياسىندا «بايقۇلا» ش ق جالپى سوماسى 5 ميلليون تەڭگەگە گرانت تا ۇتىپ الدى. وعان كيىز ءۇي، 2 گلەمپينگ، كاتاماران جانە قايىق ساتىپ الدى. سارقىراماعا باقىلاۋ كوپىرى سالىندى. مۇندا مونشا دا بار.
- نەگىزى 1-10-مامىر ارالىعىندا سارقىرامانىڭ قۋاتى كۇشتى بولادى. سول كەزدە وبلىستان كوپ ادام كەلەدى. شامىمەن تاۋلىگىنە 500-1000 ادام بولادى مۇندا. رەسەيدەن، ەلىمىزدىڭ وزگە وبلىسىنان دا كەلىپ جاتىر. قازىرگى كەزدە دە باسقا قالالاردان ادامدار ءجيى ات باسىن بۇرادى. جۇما-جەكسەنبى كۇندەرى ارالىعىندا بۇل ورىندار بوس بولمايدى. ءبىر ايتارىمىز، تۋريستەردىڭ مادەنيەتى تۇزەلسە دەيمىز. ادامدار اكەلگەن سۋسىندارىنىڭ قۇتىسىن تاستاپ، قوقىستى شاشىپ كەتەدى. وسى اۋماقتا جاۋاپتى شارۋا قوجالىعىنىڭ قىزمەتكەرلەرى بولسا كۇن سايىن جيناپ، تازالىق ساقتاپ وتىر، - دەدى بەكزات باداقوۆ.
قاسقىر سارقىراماسى اقتوبە قالاسىنان 120 شاقىرىم قاشىقتىقتا ورنالاسقان. مۇندا ادامداردى تۋروپەراتورلار اكەلەدى، كوبى ءوز كولىگىمەن قاتىنايدى. ەگەر تۋرمارشرۋت ازىرلەنسە، كەلۋشىلەردىڭ باعىتتى تاڭداپ، قىزمەت ءتۇرىن ىرىكتەۋىنە مۇمكىندىگى بولادى.
ستاتيستيكاعا سۇيەنسەك، بىلتىر اقتوبە وبلىسىنا 185 مىڭنان استام ادام كەلدى. ونىڭ 23 مىڭنان استامى شەتەلدىك. ال بيىل ءۇش ايدا 5 مىڭ شەتەلدىك تۋريستىڭ كەلگەنى تىركەلدى.
اۆتور
التىناي ساعىندىقوۆا
