قاسقىر-ءيت نارەستەنى ءولتىردى

ا ق ش- تىڭ الاباما شتاتىندا ءۇش ايلىق نارەستەنى ءۇي جانۋارى - قاسقىر مەن ءيتتىڭ بۋدانى ءولتىردى. Kazinform بۇل تۋرالى BBC- گە سىلتەمە جاساپ حابارلايدى.

بالا بەيسەنبى كۇنى جانۋار سالعان جاراقاتتان قايتىس بولدى. ءۇي جانۋارى سول جەردە جويىلدى.

«چەلسيدەگى بالانى ءۇي جانۋارى ولتىرگەنى جانە ونىڭ العان جاراقاتتان قايتىس بولعانى راستالدى»، - دەدى قالا مەرى.

قۇتقارۋ قىزمەتىنە شامامەن 13:00-دە جانۋاردىڭ شابۋىلى تۋرالى حابارلاما كەلىپ تۇسكەن. ءسابي دەرەۋ اۋرۋحاناعا جەتكىزىلگەنىمەن، ارتىنشا العان جاراقاتىنان كوز جۇمعانى انىقتالدى.

پوليتسيا جانۋاردى قاسقىر مەن ءيتتىڭ بۋدانى دەپ سيپاتتادى. ءسابيدىڭ وتباسى ونى ءۇي جانۋارى رەتىندە ۇستاعان. قالا مەرى وقيعا كەزىندە ۇيدە باسقا دا بالالار بولعانىن ايتتى.

ءدال وسىنداي وقيعا 2018 -جىلى ۆيردجينيا شتاتىندا دا بولعان. ول كەزدە قاسقىر- ءيت گيبريدى سەگىز كۇندىك سابيگە شابۋىل جاساعان.

قاسقىر- ءيت گيبريدى دەگەنىمىز نە جانە ولاردى ا ق ش- تا ءۇي جانۋارى رەتىندە ۇستاۋ زاڭدى ما؟

ميننەسوتاداعى Wolf Center حالىقارالىق ورتالىعىنىڭ مالىمەتىنە سايكەس، بۇل - ءۇي ءيتى مەن قاسقىردىڭ بۋدانى.

«ولار جاقسى ءۇي جانۋارى بولۋى مۇمكىن بە؟» دەگەن سۇراق كوپتەگەن قايشىلىق تۋدىردى. Wolfcenter مالىمەتىنشە، كەيبىر ادامدار قاسقىر مەن ءيت گيبريدىن ءۇي جانۋارى رەتىندە ۇستاي الادى. ءبىراق جانۋارداعى قاسقىردىڭ بەلگىسى نەعۇرلىم جوعارى بولسا، سوعۇرلىم قاۋىپتى.

ا ق ش- تا جىل سايىن مۇنداي مىڭداعان جانۋاردى تاستاپ كەتەدى. ويتكەنى ادامدار ولاردى ساتىپ الادى دا، كۇتىم جاساۋعا دايىن بولماي شىعادى. ا ق ش فەدەرالدى زاڭى قاسقىر مەن ءيت بۋدانىن ءۇي جانۋارىنا جاتقىزادى، بۇل اتالعان جانۋاردى يەلەنۋدى زاڭدى ەتەدى. الايدا، باسقا شتاتتاردىڭ مۇنداي ەكزوتيكالىق جانۋاردى ءوسىرۋ مەن ۇستاۋدى رەتتەيتىن ءوز زاڭى بار.

يللينويس، ميچيگان جانە نيۋ- يورك سياقتى بىرنەشە شتاتتار قاسقىر- ءيت گيبريدىن ءۇي جانۋارى رەتىندە ۇستاۋعا زاڭمەن تىيىم سالدى. ال الابامادا ونى اسىراۋ زاڭسىز ەمەس. ءبىراق ولاردى قالاي ۇستاۋ كەرەكتىگى تۋرالى ارنايى ەرەجەلەر بار.

اۆتور

ەركەجان سماعۇلوۆا