قارىزسىز ءومىر: قازاقستاندىقتارعا كونسۋلتاتسيا بەرەتىن كەڭسەلەر اشىلۋدا

несми алу
Фото: Фото: freepik.com

ەلىمىزدىڭ بارلىق وڭىرىندە نەسيە مەن قارجى ماسەلەلەرى بويىنشا حالىقپەن تىكەلەي جۇمىس ىستەيتىن جوبالىق كەڭسەلەر قۇرىلىپ جاتىر. مەكتەپ وقۋشىلارى مەن ستۋدەنتتەرگە قارجى ساۋاتتىلىعى بويىنشا كۋرستار ازىرلەنۋدە.

بۇل تۋرالى پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى Kazinform.

ە. جاماۋبايەۆ پرەزيدەنتتىڭ قازاقستان حالقىنا جولداۋىندا حالىقتىڭ شامادان تىس قارىز الۋ ماسەلەسىنە ەرەكشە كوڭىل بولگەنىن، ۇكىمەتكە «قارىزسىز قوعام» جوباسىن بۇكىل ەلىمىزگە اۋقىمدى ەتۋدى تاپسىرعانىن ەسكە سالدى. بۇل رەتتە ۇكىمەت مۇددەلى مەملەكەتتىك ورگاندارمەن بىرلەسىپ قاجەتتى جۇمىس جۇرگىزۋدە.

«اتاپ ايتقاندا، ارنايى جول كارتاسى ازىرلەنىپ، بەكىتىلدى. ول 6 نەگىزگى باعىت بويىنشا 25 ءىس- شارانى قامتيدى. سونداي- اق بىرىگىپ ءىس- قيمىل جاساۋ ءۇشىن مەملەكەتتىك ورگاندار مەن «Amanat» پارتياسى اراسىندا ىنتىماقتاستىق تۋرالى مەموراندۋم جاسالدى. جول كارتاسىنىڭ ءاربىر باعىتى بويىنشا جۇمىستى ۇيلەستىرۋ ءۇشىن اكىمدىكتەردە جاۋاپتى لاۋازىمدى تۇلعالار بەكىتىلدى. رەسپۋبليكالىق ماڭىزى بار 3 قالادا جانە ەلىمىزدىڭ 17 وڭىرىندە حالىقپەن تىكەلەي جۇمىس ىستەيتىن وڭىرلىك جوبالىق كەڭسەلەر قۇرىلىپ جاتىر»، - دەدى پارلامەنتتىك تىڭداۋدا.

جوبالىق كەڭسەلەردىڭ نەگىزگى مىندەتى - كرەديتتەر بويىنشا مەرزىمى وتكەن بەرەشەكتى رەتتەۋ، قارجى الاياقتارىنان قورعاۋ، ازاماتتاردىڭ بانكروتتىق ماسەلەلەرىن شەشۋگە، جۇمىسقا ورنالاستىرۋعا جاردەمدەسۋ جانە بيزنەستى قولداۋ شارالارىن ۇيىمداستىرۋ.

اكىمدىكتەر جوبالىق وفيستەردىڭ جۇمىسى ءۇشىن قاجەتتى عيماراتتار مەن ماتەريالدىق- تەحنيكالىق بازالاردى بولەدى.

«جوبانىڭ تاعى ءبىر ماڭىزدى باعىتى - ازاماتتاردىڭ، وقۋشىلار مەن ستۋدەنتتەردىڭ قارجى ساۋاتتىلىعىن ارتتىرۋ. بۇگىنگى تاڭدا جوعارى وقۋ ورىندارىنىڭ ستۋدەنتتەرى ءۇشىن قارجى ساۋاتتىلىعى كۋرستارىن ەنگىزۋ پىسىقتالىپ جاتىر. وقۋشىلار ءۇشىن ارنايى كۋرس ازىرلەنۋدە. ول ءۇشىن ادىستەمەلەر مەن وقۋ قۇرالدارى دايىندالادى. ناتيجەسىندە وسى باعىت شەڭبەرىندە 550 مىڭ وقۋشى مەن ستۋدەنتتى وقىتۋ جوسپارلانعان»، - دەدى قارجى ءمينيسترى.

سونىمەن بىرگە اۋىل شارۋاشىلىعى مينيسترلىگى مەن اكىمدىكتەر «اۋىل اماناتى» باعدارلاماسى شەڭبەرىندە نەسيە الۋ ءۇشىن تۇراقتى نەگىزدە كەڭەستەر بەرىپ وتىرادى.

اۆتور

ايجان سەرىكجان قىزى

سوڭعى جاڭالىقتار