قارىز الۋشىلاردىڭ قۇقىعىن قورعاۋ ءۇشىن زاڭنامالىق تۇزەتۋلەر ەنەدى - مينيستر

قارىز الۋشىلاردىڭ قۇقىعىن قورعاۋدى كۇشەيتۋ بويىنشا زاڭنامالىق تۇزەتۋلەر پىسىقتالىپ جاتىر. بۇل تۋرالى ق ر پرەمەر- ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ايتىپ بەردى، دەپ حابارلايدى Kazinform.

ءمينيستردىڭ ايتۋىنشا، حالىقتىڭ شامادان تىس نەسيە الۋىن تومەندەتۋ كەشەندى شارالاردى كوزدەيدى، اسىرەسە بانكتەر مەن ميكروقارجىلىق ۇيىمداردىڭ پرۋدەنتسيالدىق رەتتەۋىن قايتا قاراۋدى تالاپ ەتەدى. بۇل تۇرعىدا قارىز الۋشىلاردىڭ قۇقىعىن قورعاۋدى كۇشەيتۋ بويىنشا زاڭنامالىق تۇزەتۋلەر پىسىقتالىپ جاتىر.

«اتاپ ايتقاندا، تۇزەتۋلەر توپتاماسى حالىقتىڭ شامادان تىس نەسيە الۋىن تومەندەتۋگە جانە بورىشتىق جۇكتەمەنىڭ ءوسۋىن شەكتەۋگە، الاياقتىققا قارسى ءىس- قيمىلعا جانە قارجىلىق قىزمەت تۇتىنۋشىلاردىڭ قۇقىعىن قورعاۋعا؛ بانك ومبۋدسمانىنىڭ قىزمەتىن كۇشەيتۋگە باعىتتالعان. سونداي- اق كەپىلسىز ونلاين- كرەديتتەۋ سەگمەنتىندە تاۋەكەلدەردى ازايتۋ ماسەلەلەرى پىسىقتالىپ جاتىر»، - دەدى قارجى ءمينيسترى پارلامەنت تىڭداۋىندا.

اتالعان پروبلەمالاردى شەشۋ تەتىكتەرىنىڭ ءبىرى - جەكە تۇلعالاردىڭ بانكروتتىعى مەن تولەم قابىلەتىن قالپىنا كەلتىرۋ ءراسىمىن قولدانۋ بولىپ وتىر. ءقازىر ءتيىستى زاڭ نورمالارى كۇشىنە ەنىپ، جۇمىس ىستەپ جاتىر.

«ونىڭ ىشىندە نەعۇرلىم سۇرانىسقا يە بولعانى - سوتتان تىس بانكروتتىق ءراسىمى. ونى تەك بانكتەر، ميكروقارجى ۇيىمدارى جانە كوللەكتورلىق اگەنتتىكتەر الدىنداعى قارىزدار بويىنشا عانا قولدانۋعا بولادى. ازاماتتار وتىنىشتەردى حالىققا قىزمەت كورسەتۋ ورتالىقتارىندا، ەلەكتروندى ۇكىمەت پورتالى ارقىلى (eGov.kz.) ، سونداي- eGov Mobile موبيلدى قوسىمشالارى ارقىلى بەرە الادى»، - دەدى ە. جاماۋبايەۆ.

جەكە تۇلعالاردىڭ بانكروتتىعى بويىنشا «Qoldau» اتتى جاڭا اقپاراتتىق جۇيە ىسكە قوسىلعان. بۇل اقپاراتتىق جۇيە ارقىلى ءوتىنىش بەرۋ مۇمكىندىگىن جانە ءوتىنىش بەرۋشىنىڭ ءتيىستى كريتەريلەرگە سايكەستىگىن 24 مەملەكەتتىك ورگان مەن ۇيىمداردىڭ بازالارى ارقىلى اۆتوماتتى تۇردە تەكسەرۋگە بولادى.

ايتا كەتەيىك، بۇگىن ماجىلىستە «حالىقتىڭ شامادان تىس كرەديت الۋىن ازايتۋ جانە قارجىلىق ساۋاتتىلىقتى ارتتىرۋ» تاقىرىبىندا پارلامەنت تىڭداۋى ءوتتى.

اۆتور

ايجان سەرىكجان قىزى