قارتتار ۇيىنە كەلگەندە ۇلكەندەر ءىشقۇسا بولادى - الەۋمەتتىك ورتالىق قىزمەتكەرى

اقتوبەدەگى №1 الەۋمەتتىك قىزمەت كورسەتۋ ورتالىعىندا 201 تۇرعىن بار. ولاردىڭ 120-سى زەينەتكەر بولسا، وزگەسى 1 جانە 2-توپ مۇگەدەگى. قازاقپارات ءتىلشىسى كۇردەلى جوندەۋ جاسالعان ورتالىقتىڭ تۇرعىندارىمەن كەزدەسىپ، حال- جاعدايىن سۇراپ كەلدى.

老年人口
Фото: Фото:inform.kz

اقتوبەدەگى قارتتار مەن مۇگەدەكتەر مەكەندەيتىن ەكى قاباتتى عيمارات 1973 -جىلى سالىنعان. ءار جىلدارى جوندەۋ جۇمىستارى جۇرگىزىلگەنىمەن، 2021 -جىلى بيۋدجەتتەن 700 ميلليون تەڭگەدەن استام قارجى ءبولىنىپ، شاتىرى اۋىستىرىلدى، قاسبەتى قاپتالىپ، ىشكى ارلەۋ جۇرگىزىلدى. قازىرگى كەزدە ءماجىلىس زالى، اسحاناسى جاڭا كەيىپكە ەنگەن. سونىمەن بىرگە كىتاپحانا، ءتۇرلى ساۋىقتىرۋ، ەمدەۋ بولمەلەرى، مامانداردىڭ كابينەتتەرى مەن پسيحولوگتىڭ ارنايى بولمەسى جاڭاردى.

«بىزدەگى اسحانا 120 ورىندىق. الدىمەن 1- 2- توپ مۇگەدەكتەرى، كەيىن قارتتارىمىز تاماقتانادى. مەرەكەلىك تاعام رەتىندە ءبىرىنشى تاعامعا بورش، ەكىنشى اسقا مانتى دايىنداپ جاتىر. سالات، جەمىستەن بانان مەن اپەلسين بار. سونىمەن بىرگە كىتاپحانامىز جاڭاردى. مۇندا 7 مىڭنان استام كىتاپ قورى بار. ۇلكەندەرىمىز كىتاپتى كوپ وقيدى. بۇرىننان كەلە جاتقان كىتاپتارمەن قاتار دەمەۋشىلەر اكەلىپ بەرگەن جاڭا تۋىندىلار سورەدە تۇر. جوندەۋ جۇمىسى كەزىندە جيھازدارى جاسالىپ، ءورت ءسوندىرۋ جۇيەسى جاڭاردى، - دەدى «№ 1 الەۋمەتتىك قىزمەت كورسەتۋ ورتالىعى» ك م م ديرەكتورىنىڭ الەۋمەتتىك جۇمىس جونىندەگى ورىنباسارى​ ساۋلەحان كۇنتىلەۋوۆا.

 Алтынай Сағындықова/ҚазАқпарат ХАА
Фото: Алтынай Сағындықова/ҚазАқпарат ХАА

 

مۇندا نەگىزىنەن 18 جاستان اسقان، 1 جانە 2- توپتاعى مۇگەدەكتىگى بار جاندار مەن زەينەتكەرلەر كەلىپ، تۇراقتى نەمەسە ۋاقىتشا تۇرادى. الدىمەن جەرگىلىكتى جۇمىسپەن قامتۋ بولىمىنەن جولداما الادى، اكىمدىكتەن قاۋلى شىعادى.

«ۇيدەن دە، بەيىمدەۋ ورتالىعىنان دا كەلەدى. كوبىنىڭ ءۇيى جوق، كۇيى جوق. كەيبىرىنىڭ بالالارى شەتەلدە تۇرادى. كەيبىرىنىڭ ءبىر- بىرىنە جاعداي جاساۋعا مۇمكىندىگى بولماي كەلەدى. اتا- اناسى 80-دە بولسا، ءوزى 60-تا بولۋى مۇمكىن. وندايدا بارىنە كۇتىم كەرەك. ال شەتەلدە تۇراتىندارى كەيدە اقشا سالىپ جىبەرەدى. گەرمانيا، رەسەيدە تۇراتىن بالالارى اقشا سالسا، قىمبات دۇنيەلەرىنە، كەيدە دارىسىنە جۇمسايدى. تاعى ءبىر ايتا كەتەتىن جايت، جاڭادان كەلگەن ادامدار 14 كۇن كارانتيندە جاتادى. كەيىن وزگە تۇرعىنداردىڭ قاتارىنا قوسامىز. ءۇش ايدان كەيىن ولاردىڭ قولىنا كىرىپ- شىعۋ ءۇشىن قۇجات بەرەمىز. تۇرعىندار ارىز جازىپ، ءۇش كۇننەن ءبىر ايعا دەيىن تۋىستارىنىڭ، جاقىندارىنىڭ ۇيىنە سۇرانادى. وندا دا ءوزى ءجۇرىپ- تۇرا الاتىندارى بارادى. توي، ساداقاعا دا جىبەرىپ تۇرامىز. كەيبىرى بالاسىنا بارىپ، نەمەرەسىن كورگىسى كەلەدى. كەيبىرىنىڭ جولداسى قايتقان بولسا، بەيىتىنىڭ باسىنا بارۋعا سۇرانادى»، - دەدى ساۋلەحان كۇنتىلەۋوۆا.

ونىڭ ايتۋىنشا، مۇندا سان ءتۇرلى تاعدىر توعىسقان. ايەلى قايتىس بولىپ، ءوزى ينسۋلت العان ەر ادامدى قازىر ورتالىق قىزمەتكەرلەرى باعىپ- قاعىپ وتىر. ال مەكتەپ جاسىندا اناسىنان ايىرىلعان ەكى بالاسى قازىر ەر جەتىپ، 19-20 جاسقا كەلگەن. ەكەۋى دە اكەسىنە كەلىپ، جاعدايىن سۇراپ تۇرادى. دەگەنمەن قامقورلىعىنا الىپ كەتۋ ءۇشىن باسپانا كەرەك.

«مۇندا بالا- شاعاسى بار ادامدار دا كەزدەسەدى. ءبىراق كوبى جالعىزباستى. بىزگە كەلگەن كىسىلەر جاستىق شاعىندا بالا- شاعاسىن تاستاپ، قالدىرىپ كەتكەن. بالالارىمەن ارالاسپاي قالعان. جاقىندا ءبىر اعاي و دۇنيەلىك بولىپ كەتتى. 70 جاستان اسقان اعا 8 ايلىعىندا قىزىن، وتباسىن تاستاپ كەتكەن. بالا اناسىمەن قالعان. ءحال ۇستىندە جاتقاندا ءبىز اعانىڭ قىزىن تاۋىپ​ بەردىك. 35 جىل كورمەگەن. العاش حابارلاسقانىمىزدا «ومىرىمدە اكەمدى كورگەن جوقپىن، ەشتەڭە دەي المايمىن» دەگەن ەدى. ءبىراق تەلەفونمەن سويلەستى. قانشا دەگەنمەن قىز بالا عوي... «اپاي، كەلەيىن دەپ ەدىم. كەلىپ، كورسەم بولا ما؟ » دەپ سۇرادى. جاتقان كىسى. كىرگىزدىك. ەكەۋى كەزدەستى. اكەسى ەمىس- ەمىس بىلەدى. ءبىراق قىزى مۇلدە كورمەگەن. كوردى، اكەسى باتاسىن بەردى. «داۋىسىن ەستىمەي قالامىن با دەپ ەدىم» دەدى. داۋىسىن ەستىدى. قىزى اكەسىن كورىپ كەتتى. اكەسى شۇكىرشىلىگىن ايتتى. ءسويتىپ ارمانىن ورىندادىق.

تاعى ءبىر وقيعا بار. جاسى 70-تەن اسقان كىسى قىزىن 28 جىل كورمەگەن. جاقىندا قىزى كەلىپ كەتتى. بيىل تۇرمىسقا شىعايىن دەپ جاتىر. تويىنا بار دەپ ايتىپ وتىرمىز. مۇنداعى قاريالارىمىز ارلانادى، نامىستانادى. سوندىقتان كوپشىلىككە كورىنگىسى كەلمەيدى. ولارمەن پسيحولوگ جۇمىس ىستەيدى. العاشقى كۇندەرى تاماق ىشپەي، جاتىپ قالادى. قۇسا بولادى، قينالادى. اۋىرادى، زاۋقى بولمايدى. كەتەمىن دەپ ايتادى. ۇيىنە، تۋمالارىنا حابارلاسادى. مىنەز- قۇلقى وزگەرەدى. قايدا كەلدىم؟ نە ىستەپ ءجۇرمىن؟ وسى سۇراقتاردى قويادى. ءبىراق ءبارى ءوز ەركىمەن كەلەدى. ەشكىم كۇشتەپ اكەلمەيدى»، - دەيدى «№ 1 الەۋمەتتىك قىزمەت كورسەتۋ ورتالىعى» ك م م ديرەكتورىنىڭ الەۋمەتتىك جۇمىس جونىندەگى ورىنباسارى​ ساۋلەحان كۇنتىلەۋوۆا.

ورتالىقتا بۇرىن ءىستى بولعان، جازاسىن وتەگەن تۇرعىندار دا بار. ءبىراق ءبارى ورتاق ەرەجەگە باعىنادى. ىشىمدىك ىشۋگە بولمايدى. ىشكى باقىلاۋ ينسپەكتورى مۇنى قاداعالايدى.

تۇرعىن ءارى جۇمىسشى

ورتالىقتا 160-قا جۋىق ادام جۇمىس ىستەيدى. اعاش ەگۋ، گۇل كۇتىمى، تازالىق جۇمىستارىنا تۇرعىندار دا اتسالىسىپ، كومەكتەسەدى. سولاردىڭ ءبىرى - سەيسەنعالي اۋەزوۆ. ول شالقار اۋدانىنىڭ تۋماسى. بۇرىن مال باقتى، تەمىرجولدا ەڭبەك ەتتى.

 Алтынай Сағындықова/ҚазАқпарат ХАА
Фото: Алтынай Сағындықова/ҚазАқпарат ХАА

 

«مۇندا بىلتىر كەلدىم. قازان ايىندا ءبىر جىل تولادى. جاقسى، شۇكىر. باسشىلارعا راقمەت، تاماعىمىز كوپ، كويلەگىم كوك. جاقىندارىم بار. ءوز وتباسىڭ بولماعان سوڭ قيىن ەكەن. بالا- شاعا جوق. اعايىم قايتىس بولعان سوڭ وسىندا كەلدىم. مۇندا جۇمىس تا ىستەيمىن. گۇل سۋارامىن. تاڭەرتەڭنەن تۇسكە دەيىن دالادا جۇرەمىن. جەڭىل جۇمىس. اعاش، گۇل سۋارۋ مەن ءۇشىن تىنىعۋ، دەنە جاتتىعۋى سياقتى»، - دەيدى ول.

سارسەنعالي اۋەزوۆتىڭ ايتۋىنشا، بيىل اۋلاعا جىلىجاي سالىنعان. العاش رەت ءتۇرلى دامدەۋىش ءشوپ ەگىلدى. كەلەر جىلى تاعى دا كۇتىمىن جالعاستىرادى.

تۇراقتى ەم الۋىما كومەكتەستى - مارياش برەكەشوۆا

مارياش برەكەشوۆا - حرومتاۋ اۋدانى ماعادجان اۋىلىنىڭ تۋماسى. قارتتار ۇيىنە 8 جىل بۇرىن كەلگەن. وبىر دەرتىنە شالدىققان قاريا ۇنەمى دارىگەرلەرگە قارالىپ، ەم الۋ ءۇشىن وسى ورتالىق ىڭعايلى بولعانىن ايتتى.

 Алтынай Сағындықова/ҚазАқпарат ХАА
Фото: Алтынай Сағындықова/ҚазАқпарат ХАА

 

«مەنىڭ ءبىر قىزىم بار. ءوزىم اۋىرىپ قالىپ، وبىر دەرتى انىقتالدى. ال قىزىم جۇمىستا، ماعان قاراي المايدى. اۋرۋحاناعا بارۋ، ەم قابىلداۋ قيىن بولعان سوڭ شەشىم قابىلدادىم. العاشىندا رەنجىدى. كەيىن ۇيرەندى. اندا- ساندا كەلىپ تۇرادى. ال ءوزىم بارا المايمىن. ەشتەڭەگە زاۋقىم سوقپاي قالىپ ەدى. «جاتا بەرمە» دەگەن سوڭ، شۇلىق توقىپ وتىرمىن. ونى بالالار ۇيىنە جىبەرەدى. قازىر جاعدايىم جاقسى، ريزامىن. تاعامى ۋاقىتىمەن. اپتا سايىن توسەك جابدىعىن اۋىستىرامىز. تەلەديدار كورەمىن، كينو قارايمىز. جاڭالىقتار دا كورەمىز»، - دەيدى ول.

 Алтынай Сағындықова/ҚазАқпарат ХАА
Фото: Алтынай Сағындықова/ҚазАқпарат ХАА

 

قوي باعىپ ءجۇرىپ، ساۋساقتارىمدى ءۇسىردىم - ورال قوسىبەكوۆا

ورال قوسىبەكوۆا №1 الەۋمەتتىك قىزمەت كورسەتۋ ورتالىعىنا 2016 -جىلى كەلگەن. ال 2018 -جىلى بۇزاقىلىق جاساپ، شىعىپ كەتكەن. ارادا ءبىر جىل وتكەندە قايتا ورالىپ، قازىر وسىندا تۇرىپ​ جاتىر.

«قولىم 2014 -جىلى ءۇسىپ كەتتى. تەمىر اۋدانىنىڭ باشەنكول، قوجاساي دەگەن اۋىلدارىندا مال باقتىم. تۇستەن كەيىن مال جايۋعا شىعىپ، سودان مەنى ءتورت كۇننەن سوڭ تاپتى. اياعىمدى ءشوپتىڭ اراسىنا تىعا بەرگەنمىن. ال قولىم قاپ- قارا بولىپ كەتتى. كىر دەپ ويلاپ جۇرسەم، ءۇسىپ كەتكەن ەكەن. ەكى قولىمنىڭ باس بارماعى عانا قالدى. 2015 -جىلى الەۋمەتتىك بەيىمدەۋ ورتالىعى بار ەكەنىن ەستىدىم. سول جەردەن قۇجاتتارىمدى جاساتتىم. ءبىر جىلدان استام ۋاقىت سوندا جاتىپ، 2016 -جىلى وسىندا كەلدىم. قازىر ءبارى جاقسى. ​ وسىندا كەلگەن سوڭ عانا جاعدايىم جاقسى بولدى. ءبارى باۋىرىنا تارتىپ جاتىر. وعان دەيىن قاتتى قينالدىم. ءار جەرگە قوناتىن ەدىم»، - دەيدى ورال قوسىبەكوۆا.

ول بوس وتىرمايدى. مادەني ءىس- شارالارعا بەلسەندى قاتىسىپ، ءان ايتادى. مونشاق تىزەدى. العاشىندا قولى يكەمگە كەلمەي قينالعانىمەن، ءبارىن تاباندىلىعىنىڭ ارقاسىندا جەڭدى.

ال كەنجالى دوسماعامبەتوۆ قارتتار ۇيىنە ارباعا سۇيەنىپ كەلگەن. ەكى اياعى باستىرماي، قاتتى قينالدى. ءتىپتى، قايتا اياققا تۇرامىن دەپ ويلاماعان، تەك ارمانداعان.

Алтынай Сағындықова/ҚазАқпарат ХАА
Фото: Алтынай Сағындықова/ҚазАқпарат ХАА

«تۋىپ- وسكەن جەرىم قوبدا اۋدانى تەرىساققان اۋىلى. جاسىم 71-دە. وسىندا كەلگەنىمە 4 جىل بولدى. مۇندا كەلگەن ۋاقىتتا جۇرە المادىم. ءتورت وپەراتسيادان ءوتتىم. 9 ايدىڭ ىشىندە اياعىمنان تۇردىم. باسشىلارى، دارىگەرلەر كومەكتەستى. قازىر جاقسى. ءوزىم جۇرەمىن»، - دەيدى ول.

زەينەتكەر سپورتپەن شۇعىلدانادى، اۋلا ءىشىن سىپىرۋعا كومەكتەسەدى. قولونەر بولمەسىنە دە بارادى.

 Алтынай Сағындықова/ҚазАқпарат ХАА
Фото: Алтынай Сағындықова/ҚазАқпарат ХАА

 

«توسەك تارتىپ جاتقان كەزدە قايتا تۇرامىن دەپ ويلامادىم. ءبىراق ارماندادىم. ارمانىما جەتتىم. وسىنداعى ادامداردىڭ كوپ پايداسى ءتيدى. قازىر تەك ءبىر تاياققا سۇيەنەمىن»، - دەيدى كەنجالى دوسماعامبەتوۆ.

دارىگەرلەر ەم- شارا جۇرگىزسە، پسيحولوگتار مەن الەۋمەتتىك قىزمەتكەرلەر كۇڭىل كۇيىن اۋلاپ، قولقابىس ەتەدى. شاشتاراز بولمەسىنىڭ قىزمەتى دە تەگىن. الداعى ۋاقىتتا مۇندا مودۋلدى مونشا سالىنادى.

اۆتور

ەلميرا ورالبايەۆا

سوڭعى جاڭالىقتار