قارقىنى جوعارى كولىك وتكىزۋ پۋنكتتەرى تاۋلىك بويى جۇمىس ىستەيتىن بولادى

اۆتوكولىكپەن جۇك تاسىمالداۋشىلار قۇجاتتاردى ءبىر رەت تاپسىرۋى ءۇشىن كورشىلەس ەلدەردىڭ باقىلاۋشى ورگاندارىمەن «ءبىرىڭعاي دەرەكتەر بازاسى» قۇرىلادى. بۇل تۋرالى ۇكىمەت وتىرىسىندا كولىك ۆيتسە- ءمينيسترى ءساتجان ابلاليەۆ ايتتى، دەپ حابارلايدى Kazinform.

«ەلىمىزدەگى وتكىزۋ پۋنكتتەرىنىڭ ءتيىمدى جۇمىسىن قامتاماسىز ەتۋ — ترانزيتتىك الەۋەتتى دامىتۋ جولىنداعى باستى ماسەلەلەردىڭ ءبىرى. جالپى مەملەكەتتىك شەكارادا 52 وتكىزۋ پۋنكتى جۇمىس ىستەيدى. ونىڭ 45-ىندە قايتا جاڭارتۋ جۇمىستارى باستالدى. جۇمىستار كورشى ەلدەرمەن بىرلەسكەن جول كارتاسىنىڭ اياسىندا جۇرگىزىلۋدە»، - دەدى ءساتجان ابلاليەۆ.

ونىڭ اتاپ وتۋىنشە، وتكىزۋ پۋنكتتەرىنىڭ قابىلەتىن ارتتىرۋ ءۇشىن كولىك قۇرالدارىنىڭ قارقىنى جوعارى وتكىزۋ پۋنكتتەرىنىڭ جۇمىسىن تاۋلىك بويىنا كوشىرۋ، باقىلاۋ جانە كەدەندىك راسىمدەردى ەل اۋماعىنا اۋىستىرۋ، ال وتكىزۋ پۋنكتتەردە مينيمالدى راسىمدەر جۇرگىزۋ، تاسىمالداۋشىلار قۇجاتتاردى ءبىر رەت تاپسىرۋ ءۇشىن كورشىلەس ەلدەردىڭ باقىلاۋشى ورگاندارىمەن «ءبىرىڭعاي دەرەكتەر بازاسىن» قۇرۋ شارالارى قولعا الىنباق.

«قابىلدانعان شارالار وتكىزۋ پۋنكتتەرىنىڭ قابىلەتىن 4 ەسەگە ۇلعايتىپ، تەكسەرۋ ۋاقىتىن 20 مينۋتقا دەيىن قىسقارتۋعا مۇمكىندىك بەرەدى»، - دەدى ۆيتسە- مينيستر.

اۆتور

مارلان جيەمباي