«قارمەتتىڭ» جاڭا يەسىنە قاتاڭ تالاپ قويىلادى - قاسىم-جومارت توقايەۆ

قاراعاندى مەتاللۋرگيالىق كومبيناتىنىڭ جاڭا يەسىنە قاتاڭ تالاپ قويىلادى. بۇل تۋرالى «التىن ساپا» جانە «پارىز» سىيلىقتارىنىڭ يەگەرلەرىن ماراپاتتاۋ راسىمىندە پرەزيدەنت قاسىم-جومارت توقايەۆ ايتتى، دەپ حابارلايدى Kazinform.

«جاقىندا مەنىڭ تاپسىرماممەن قاراعاندى مەتاللۋرگيالىق كومبيناتىن قازاقستاندىق كومپانيانىڭ مەنشىگىنە بەرۋ ماسەلەسى ءساتتى شەشىلدى. جۇمىستىڭ باستاپقى كەزەڭىندە كومپانياعا كومەكتەسۋ - ۇكىمەتتىڭ ەندىگى مىندەتى. سودان كەيىن كاسىپورىننىڭ جاڭا يەسىنە قاتاڭ تالاپ قويىلادى. كەيبىر وڭىرلەردەگى حالىقتىڭ تىنىس-تىرشىلىگىن قامتاماسىز ەتەتىن ماڭىزدى نىسانداردا اپاتتاردىڭ جيىلەپ كەتۋى بۇكىل ەلىمىزدەگى ينجەنەرلىك جانە ەنەرگەتيكالىق ينفراقۇرىلىمداردى جاڭعىرتۋ اسا قاجەت ەكەنىن ايقىن كورسەتتى»، - دەدى قاسىم- جومارت توقايەۆ.

پرەزيدەنتتىڭ اتاپ وتۋىنشە، بۇل ماسەلە ونداعان جىل بويى نازاردان تىس قالىپ، شەشىمىن تاپپاي كەلەدى.

«مەملەكەت قىسقا مەرزىمدە رەۆيزيا جۇرگىزىپ، قولدانىستاعى گەنەراتسيالاۋشى قۋات كوزدەرىن جوندەۋدە، جاڭا نىسانداردى ىسكە قوسۋدا، جىلۋ جانە باسقا دا ينجەنەرلىك جەلىلەردى جاڭارتۋدا جۇيەلى جۇمىستارعا كىرىستى. اتاپ ايتقاندا، بيىل ەلىمىزدىڭ باتىسىندا ەلەكتر جەلىلەرىنىڭ وتكىزۋ مۇمكىندىگىن ەكى ەسەدەن استام ارتتىرۋعا ىقپال ەتكەن اۋقىمدى جوبا جۇزەگە اسىرىلدى»، - دەدى مەملەكەت باسشىسى.
بيىل ەلىمىزدە 850 شاقىرىمنان استام جول سالىندى.
«قازاقستان ەۋرازيا قۇرلىعىنىڭ ءدال ورتاسىندا ورنالاسقان. باتىستان شىعىسقا باراتىن نەگىزگى جولدار ءبىزدىڭ ەلىمىز ارقىلى وتەدى. وسى مۇمكىندىكتى ءتيىمدى پايدالانۋ كەرەك»، - دەدى قاسىم- جومارت توقايەۆ.
بۇل تۇرعىدا پرەزيدەنت ساپالى جول ەل ەكونوميكاسىنىڭ كۇرەتامىرى ەكەنىن قاداپ ايتتى.
«ءبىز اۆتو جانە تەمىر جول جەلىلەرىن تۇراقتى دامىتىپ كەلەمىز. بيىل 850 شاقىرىمنان استام جول سالدىق. الداعى ءۇش جىلدا 1300 شاقىرىم تەمىر جول ىسكە قوسىلادى»، - دەدى مەملەكەت باسشىسى.

بۇدان بۇرىن حابارلانعانداي، پرەزيدەنت ءۇش جىلدا اگروونەركاسىپ كەشەنىندەگى وڭدەلگەن ءونىم ۇلەسىن 70 پايىزعا جەتكىزۋدى تاپسىردى.
رۋسلان عابباسوۆ