قارمەت كومبيناتى 1 ميلليون توننا بولات ءوندىردى

Qarmet
Фото: primeminister.kz

استانا. قازاقپارات - قازاقستاننىڭ ءىرى مەتاللۋرگيالىق Qarmet كومبيناتىنىڭ جۇمىسىن جاڭعىرتۋ جوسپارى بۇگىندە ءوز جەمىسىن بەرىپ وتىر. ويتكەنى جىل باسىنان بەرى زاۋىتتا بولاتتىڭ العاشقى 1 ميلليون تونناسى ءوندىرىلدى.

قۇرىش قۇيۋشى مەتاللۋرگتەر 1 ميلليون توننا بولاتتى نەبارى 3,5 اي ىشىندە وندىرگەن. وسىلايشا، ورتاشا ايداعى ءوندىرىس كولەمى 300 مىڭ تونناعا دەيىن ءوستى. بۇل وتكەن جىلعى كورسەتكىشتەن 50 مىڭ تونناعا ارتىق.

اندرەي بەرگ، Qarmet بولات دەپارتامەنتىنىڭ ديرەكتورى:

- 2024 -جىلدىڭ سوڭىنا دەيىن 3,5 ميلليون توننا قۇرىش قۇيۋ باعدارلاماسى قابىلداندى. جوندەۋ جۇمىستارىن جۇرگىزۋ بويىنشا كەڭ اۋقىمدى باعدارلاما دا قولعا الىندى. جوسپار مۇنىمەن شەكتەلمەيدى. ماسەلەن، بيىل مامىر ايىنداعى كورسەتكىشتى 326 مىڭ تونناعا دەيىن ارتتىرۋ كوزدەلگەن. ويتكەنى قازىر بارلىق 3 كونۆەرتەردىڭ جۇمىسى قالىپقا كەلتىرىلىپ جاتىر.

اقان ەسپوتايەۆ، Qarmet قىزمەتكەرى:

- كومپانيامىزدىڭ العا قويعان ماقساتى مەن تالابى بيىك. ءبىز وزىمىزگە بەرىلگەن تاپسىرمالاردى بۇلجىتپاي ورىنداپ كەلەمىز. قويماداعى قورىمىز دا جەتكىلىكتى. جوسپارلى جانە جوسپاردان تىس جوندەۋ جۇمىستارىن ۋاقىتىلى وتكىزىپ وتىرامىز. ءوندىرىس كولەمىمەن بىرگە سۇرانىس تا ارتىپ جاتىر.

مامانداردىڭ ايتۋىنشا، قازىر ءبىرىنشى كەزەكتە ىشكى سۇرانىستى قامتاماسىز ەتۋ تاپسىرماسى تۇر. اسىرەسە پوليمەر جابىنعا جانە مىرىشپەن قاپتالعان ونىمگە سۇرانىس كوپ.

نازاري مارەنكو، Qarmet كومپانياسىنىڭ ساتۋ جانە ماركەتينگ جونىندەگى ديرەكتورى:

- قاڭتار ايىندا «لوكاليزاتسيا» اتتى ستراتەگيا قابىلداندى. باعدارلاما ءبىرىنشى كەزەكتە قازاقستاننىڭ مەتالعا دەگەن ىشكى سۇرانىسىن تولىق قامتاماسىز ەتۋگە باعىتتالعان. بيىل 4 اي ىشىندە ساتۋ كولەمى بىلتىرعى كەزەڭمەن سالىستىرعاندا %8- كە وسكەن. كەلەسى نارىعىمىز - ورتالىق ازيا. مۇنداعى ساتۋ كولەمى %15- كە ارتىپ وتىر.

بۇگىندە Qarmet كومپانياسىندا 35 مىڭ مامان قىزمەت ەتەدى. ءوندىرىس كولەمى مەن تىڭ جوسپارلار سانى ۇلعايعان سايىن بىلىكتى ۇجىم جۇدىرىقتاي جۇمىلا جاڭا قارقىنمەن دامي بەرمەك.

24.kz

سوڭعى جاڭالىقتار