قارشاداي قىز لوندوندا شەتەلدىكتەرگە قازاق ءتىلىن ۇيرەتىپ ءجۇر
لوندوندا شەتەلدىكتەر قازاق ءتىلىن ۇيرەنىپ جاتىر. ولاردىڭ ۇلتتىق داستۇرلەرىمىزگە دەگەن قىزىعۋشىلىعى دا ەرەكشە، دەپ حابارلايدى Kazinform ءتىلشىسى.
قازاقستاننىڭ ەلشىلىگىنە جينالعان نازىكجاندى قاۋىم - لوندونداعى شەتەلدىك ديپلوماتتاردىڭ ايەلدەرى.
يسلانديا، كاتار، پاكىستان، مالايزيا جانە باسقا دا مەملەكەت وكىلدەرى ۇلى اباي ءتىلىن ۇيرەنگىسى كەلەدى. سوزدىك قورى 2,5 ميلليون سوزدەن تۇراتىن قازاق ءتىلىن ءبىر مەزەتتە مەڭگەرۋ مۇمكىن ەمەس ەكەندىگىن ولار مويىندايدى. ءبىراق العاشقى قادامدارىن جاساپ ۇلگەردى.
«سالەمەتسىز بە؟ قالايسىز؟ مەن جاقسىمىن. بۇگىن وسىنداي قازاق سوزدەرىن ۇيرەندىم. سالەمدەسۋدەن بولەك مۇعالىمنەن قازاقتىڭ ۇلتتىق تاعامدارى قالاي اتالاتىنىن ءبىلدىم»، - دەيدى پاكىستاننىڭ ۇلى بريتانياداعى ەلشىسىنىڭ جۇبايى سارا نايم.
مۇعالىمنىڭ ەسىمى - كاۋسار عالىمجان قىزى. جاسى 11-دە. قارشاداي قىز اتا-اناسىنىڭ قىزمەت بابىمەن لوندوندا ۋاقىتشا تۇرىپ جاتىر.
وقۋدان قولى قالت ەتكەندە شەتەلدىكتەرگە قازاق ءتىلىن ۇيرەتەدى. ۇستىندە ۇلتتىق كيىم، باسىندا ساۋكەلە، قوس بۇرىمىنىڭ تۇبىندە شاشباۋ. ساباقتارىن انمەن ارلەپ، بيمەن كوركەمدەيدى.
بۇدان بولەك شەتەلدىكتەرگە قازاق مادەنيەتىنىڭ اجىراماس بولىگى ءشاي ءىشۋ ءراسىمى كورسەتىلدى. كەلىن وبرازىنداعى ەلشىلىك قىزمەتكەرى ءشايدى قالاي دەمدەۋدەن باستاپ، قانداي كولەمدە قۇيۋ كەرەكتىگى تۋرالى اقپارات بەردى.
داستارحاندا ۇلتتىق تاعامداردىڭ ءتۇر- ءتۇرى تۇر. قۇرت، ىرىمشىك، تارى، جەنتتى بۇرىن-سوڭدى جەپ كورمەگەن قوناقتار دامىنە ءدان ريزا.
«ءشاي قۇيۋ ءراسىمى وتە قىزىق ءوتتى، مەن ءۇشىن ۇلكەن جاڭالىق بولدى. مادەنيەتتەرىڭىز وتە باي ەكەن. بۇگىن شاعىن ءبىر بولىگى عانا كورسەتىلدى دەپ ويلايمىن»، - دەيدى مالايزيانىڭ جوعارى كوميسسارىنىڭ جۇبايى نور ايني ابدۋل راحمان.
«ۇلتتىق قۇندىلىقتارىڭىز تۋرالى ءبىلىپ، رۋحاني سۋسىندادىق. ابىسىنداردىڭ تاتۋلىعى، جاڭادان كەلىن تۇسكەندە بەرىلەتىن ءشاي — ءبارى-ءبارى ءبىز ءۇشىن قىزىق بولدى. ءشاي قۇيعاندا كەسەلەردى شاتاستىرىپ الماۋ دا ۇلكەن ونەر دەپ بىلەمىن»، - دەيدى كاتاردىڭ ۇلى بريتانياداعى ەلشىسىنىڭ جۇبايى رايا ءالحاليفا.
شارا بارىسىندا قازاق ايەلدەرىنىڭ وتباسىنداعى عانا ەمەس قوعامداعى ءرولى تۋرالى دا ايتىلدى. مەملەكەت گەندەرلىك تەڭدىكتى ساقتاۋعا، ايەلدەر قۇقىعىن قورعاۋعا جانە وتباسى قۇندىلىقتارىن نىعايتۋعا ءاردايىم باسا ءمان بەرەدى، دەدى ۇيىمداستىرۋشىلار.
«قازىرگى قازاق ايەلىنىڭ بەينەسى ءوز وشاعىنىڭ بەرەكەسىن كەلتىرىپ، جولداسىن ءسۇيىپ، بالالارىن تاربيەلەۋمەن قاتار بەلگىلى ءبىر سالادا جۇمىس اتقارىپ، قوعامىنا پايدا اكەلەتىن تۇلعا رەتىندە كورىنەدى. ءبىز سول تۋرالى ايتقىمىز كەلدى»، - دەيدى قازاقستاننىڭ ۇلى بريتانياداعى ەلشىسىنىڭ جۇبايى اقمارال ايداربەكوۆا.
شارا ەلشىلىكتەگى نازىكجاندى قىزمەتكەرلەردىڭ كۇشىمەن وتكىزىلدى.
داستارحاندى دا جايدى، كونسەرتتىك باعدارلامانى دا وزدەرى ۇيىمداستىردى. مۋزىكالىق اسپاپتاردا ويناپ، ءان سالدى، مىڭ بۇرالا بي بيلەدى.
اۆتور
عالىمجان قارامان ۇلى
