قاراقشىلىق شابۋىل جاسادى دەپ سوتتالعان ەكى اقتوبەلىك اقتالىپ شىقتى

اقتوبە. KAZINFORM - قاراقشىلىق شابۋىل جاساپ، سوتتالىپ كەتكەن ەكى اقتوبەلىك وزدەرىنىڭ جانىندا تاعى ەكى ادام بولعانىن ايتىپ، قىلمىستىق ءىس تەرگەلدى. 2019 -جىلى باستالعان تەرگەۋدەن سوڭ بىلتىر تاعى 2 اقتوبەلىك 4 جىل 6 ايعا باس بوستاندىعىنان ايىرىلىپ، بۇگىن قايتا اقتالىپ شىقتى.

قىلمىستىق وقيعا 2016 -جىلى بولدى. ءىس ماتەريالىنا سۇيەنسەك، اقتوبەنىڭ 2 تۇرعىنى جارناما سايتىنداعى حابارلاما ارقىلى كولىكتى ساتىپ الۋعا كەلىسىپ، كەزدەسۋگە بارادى.

ءبىر كۇننەن سوڭ كولىكتى قايتا قاراۋعا كەلىسىپ، ولاردىڭ جىلجىمالى مۇلىكتى ساتىپ الماي، قاراقشىلىق شابۋىل جاساعانى بەلگىلى بولدى. قۇنى 9 ميلليون تەڭگە بولاتىن كولىكتى زاڭسىز يەمدەنۋدى ماقسات ەتىپ، ساتۋشى اكەلى- بالالى ەكى ادامدى ۇرىپ- سوعادى.

وسى قىلمىستىق ىستەن سوڭ ا جانە ب ەسىمدى ەكى اقتوبەلىك سوتتالىپ، 2016 -جىلى 10 جانە 12 جىلعا باس بوستاندىعىنان ايىرىلادى.

ارادا 3 جىل وتكەندە، ياعني، 2019 -جىلى بۇل وقيعاعا تاعى ەكى ادامنىڭ قاتىسى بار ەكەنىن ايتىپ، پوليتسيا تەرگەۋ جۇرگىزەدى.

- سوت القاسى قىلمىستىق ءىس ماتەريالدارىن قايتا قاراپ، كۋاگەرلەردى تىڭداپ سوتتالۋشىلاردى اقتاۋ تۋرالى ۇيعارىمعا كەلدى. تەرگەۋ كەزىندە ى جانە ن ەسىمدى ەكى سوتتالۋشىنىڭ كىناسى تولىق دالەلدەنبەدى. سونىمەن بىرگە قىلمىستىق- پروتسەستىك زاڭناما تالاپتارى ساقتالماعان. سوت اقتوبە وبلىستىق پوليتسيا دەپارتامەنتى مەن اقتوبە وبلىستىق پروكۋراتۋراسىنا جەكە قاۋلى شىعاردى، - دەپ حابارلادى اقتوبە وبلىستىق سوتىنىڭ باسپا ءسوز قىزمەتى.

ايتا كەتەيىك، ى جانە ن ەسىمدى ەكى اقتوبەلىك 2023 -جىلى 4 جىل 6 ايعا باس بوستاندىعىنان ايىرىلعان.

اۆتور

التىناي ساعىندىقوۆا