قاراقالپاق ءانشىسى استانادا كونسەرت وتكىزدى
استانا قالاسىنداعى ءال- فارابي اتىنداعى وقۋشىلار سارايىندا ءانشى، وزبەكستان مەن قاراقالپاقستان رەسپۋبليكالارىنىڭ ەڭبەك سىڭىرگەن ءارتىسى ماحسەتباي وتەمۇراتوۆ «مەن اۋىلدى ساعىندىم» اتتى كونسەرت بەردى، دەپ حابارلايدى Kazinform.
ءان كەشىندە ماحسەتباي وتەمۇراتوۆ ءوز شىعارماشىلىعىنداعى حالىق اراسىنا كەڭ تاراعان تۋىندىلاردى ورىندادى. قازاق اندەرىن دە ناقىشىنا كەلتىرە شىرقادى.
كونسەرتتە استاناداعى «جايحۋن» قاراقالپاق ەتنومادەني بىرلەستىگىنىڭ بيشىلەرى ونەر كورسەتتى. سونداي- اق «Qazaqstan داۋىسى» جوباسىنىڭ II ماۋسىمىندا فينالدا باق سىناپ جاتقان قاراقالپاقستاندا تۇراتىن تالانتتى قانداسىمىز، باريتون داۋىستى مۇسا مارات ءان ايتتى. ماحسەتباي وتەمۇراتوۆ مۇسا ماراتقا ءوزىنىڭ ايتۋلى كەشتەردە كيگەن كوستيۋمىن تارتۋ ەتتى.
ايتا كەتەيىك، ماحسەتباي وتەمۇراتوۆ 2001 -جىلى وزبەكستان رەسپۋبليكاسى پرەزيدەنتىنىڭ جاس تالانتتارعا ارنالعان «نيحول» سىيلىعىنىڭ لاۋرەاتى اتاندى. 2005 -جىلى «قاراقالپاقستان رەسپۋبليكاسىنىڭ ەڭبەك سىڭىرگەن ءارتىسى» اتاعىن السا، 2011 -جىلى «وزبەكستان رەسپۋبليكاسىنىڭ ەڭبەك سىڭىرگەن ءارتىسى» اتاندى. ول كوپتەن حالىقارالىق ساحنالاردا ونەر كورسەتىپ ءجۇر. كۇنى كەشە عانا قازاق ادەبيەتىنىڭ كورنەكتى وكىلى، جازۋشى كەمەل توقايەۆتىڭ 100 جىلدىق مەرەيتويى اياسىندا حالىقارالىق ءىس- شارالارعا قولداۋ كورسەتىپ، باۋىرلاس ەلدەردە ونىڭ شىعارمالارىن كەڭىنەن ناسيحاتتاۋعا، ەكىجاقتى مادەني بايلانىستاردى نىعايتۋعا قوسقان ۇلەسى ءۇشىن قازاقستان پرەزيدەنتىنىڭ العىسحاتىمەن ماراپاتتالدى. سونداي- اق الماتىدا وتكەن «جىل ادامى» بايقاۋىندا «التىن ادام» اتالىمىن يەلەندى. ءانشى بۇگىندە نوكىس قالاسىنداعى قاراقالپاقستان كوركەمونەر سارايىنىڭ ديرەكتورى.
بۇل كەش ەلوردادا 2016 -جىلى اشىلعان «جايحۋن» قاراقالپاق ەتنومادەني بىرلەستىگىنىڭ ۇيىمداستىرۋىمەن ءوتىپ وتىر. اتالعان بىرلەستىك قاراقالپاق مادەنيەتىن ناسيحاتتاۋ ماقساتىندا ءتۇرلى مادەني، قايىرىمدىلىق ءىس- شارالارىن وتكىزىپ كەلەدى. بىرلەستىك قۇرامىنداعى «جايحۋن» بي ءانسامبلى مەن جاس انشىلەر دە ءتۇرلى ساحنالاردا ونەر كورسەتىپ ءجۇر.
«جايحۋن» قاراقالپاق ەتنومادەني بىرلەستىگىنىڭ ءتورايىمى تازابيكە ساليەۆا قوس حالىقتىڭ دوستىعى جايلى جىلى پىكىر ءبىلدىردى.
«بىزدە ءاندى «قوسىق» دەپ ايتادى. دومبىرامەن ءان ايتۋدى دۋتارمەن باقسىلاردىڭ ءان ايتۋىمەن سالىستىرۋعا بولادى. باتىرلاردىڭ جىر- ەپوسىن قوبىزبەن ورىندايدى»، - دەدى ول.
كونسەرتكە وزبەكستان رەسپۋبليكاسىنىڭ قازاقستانداعى ەلشىلىگى قىزمەتكەرلەرى دە قاتىستى.
اۆتور
بەگابات ۇزاقوۆ
