قارالى كۇنگى ۆيدەوسىنان كەيىن پەتروپاۆلدا بلوگەر قاماۋعا الىندى

الەۋمەتتىك جەلىلەردە تاراعان ۆيدەودا يرينا انتونەنكو قايتىس بولعان اسكەري قىزمەتشىلەردى جەكە تانىمايتىنىن، تۋىستىق جاقىندىعى بولماعاندىقتان ازا تۇتۋعا مىندەتتى ەمەس ەكەنىن جانە ءوزىنىڭ كۇندەلىكتى ءومىرىن جالعاستىرا بەرەتىنىن ايتقان.

جازبا كوپ ۇزاماي وشىرىلگەنىمەن، ونىڭ كوشىرمەلەرى TikTok جانە Instagram جەلىلەرىندە تارادى. كوپشىلىك بلوگەردىڭ بۇل ارەكەتىنە نارازىلىق ءبىلدىردى. جەلى قولدانۋشىلارى ونىڭ ءسوزىن قازا تاپقان اسكەري قىزمەتشىلەردىڭ وتباسىلارىنا قۇرمەتسىزدىك رەتىندە قابىلداپ، قۇقىق قورعاۋ ورگاندارىنان وقيعاعا قۇقىقتىق باعا بەرۋدى سۇرادى.

پوليتسيا قىزمەتكەرلەرى بلوگەردىڭ جەكە باسىن انىقتاپ، 42 جاستاعى پەتروپاۆل تۇرعىنىمەن پروفيلاكتيكالىق اڭگىمە جۇرگىزىپ، ەسكەرتۋ جاساعان. كەيىن انتونەنكو الەۋمەتتىك جەلىدە كەشىرىم سۇراپ، بولعان جاعدايعا بايلانىستى وكىنىش ءبىلدىردى. الايدا قوعامدا رەزونانس تۋدىرعان ونىڭ ارەكەتىنە قاتىستى پىكىرتالاس جالعاستى.

بۇگىن يرينا انتونەنكو 10 تاۋلىككە قامالدى. بۇل تۋرالى سولتۇستىك قازاقستان وبلىسى پوليتسيا دەپارتامەنتىنىڭ باسپا ءسوز قىزمەتى مالىمدەدى.

- پوليتسيا 25-قىركۇيەكتە، جالپىۇلتتىق ازا تۇتۋ كۇنى الەۋمەتتىك جەلىلەردەگى تىكەلەي ەفير بارىسىندا ارەكەتتەرىنە قۇقىقتىق باعا بەرىلگەن پەتروپاۆلدىڭ 42 جاستاعى تۇرعىنى يرينا انتونەنكونى انىقتادى. وسى فاكتى بويىنشا پوليتسيا تەكسەرۋ جۇرگىزىپ، ماتەريالدار جيناقتاپ، سوتقا جولدادى.

29 قىركۇيەكتە سوت ايەلگە ۇساق بۇزاقىلىق جاساعانى ءۇشىن 10 تاۋلىك اكىمشىلىك قاماۋ تاعايىندادى. فاكتىگە زاڭدا بەلگىلەنگەن تارتىپپەن قۇقىقتىق باعا بەرىلدى. «زاڭ مەن ءتارتىپ» قاعيداتى بارشاعا ورتاق، - دەلىنگەن ۆەدومستۆو حابارلاماسىندا.

بۇعان دەيىن TikTok-تاعى بالاعات ءسوز ايتقانى ءۇشىن شىمكەنتتە ءتورت بلوگەر قاماۋعا الىنعانىن جازعان ەدىك.

اۆتور

اقەركە داۋرەنبەك قىزى