قاراعاندى وبلىسىندا 80 جاستاعى اجە اۋىل كوشەلەرىن تراكتورمەن تازالايدى
استانا. قازاقپارات - قاراعاندىلىق ءزۇبايرا سىزدىقوۆا ەل تازالىعىنا ۇلەس قوسىپ كەلەدى. زەينەتكەر 80 جاستى القىمداسا دا تراكتور تىزگىندەپ، اۋىل كوشەلەرىندەگى قوقىستى شىعارادى. وسىلايشا، ارداگەر مەحانيزاتور «تازا قازاقستان» باستاماسىن سوزبەن ەمەس، ىسپەن قولداپ ءجۇر.
ءزۇبايرا اجەنىڭ اۋىر تەحنيكانى تىزگىندەپ، ەڭبەك ەتكەنىنە قىرىق جىلدان اسقان. عۇمىرىن ادال ەڭبەككە ارناعان اق جاۋلىقتى انا بۇگىندە بەلسەندىلىگىن جوعالتقان جوق. ءتىپتى ءوزى تۇراتىن اۋلانى جەمىس اعاشتارى جايقالعان جاسىل باققا اينالدىرعان. ءزۇبايرا سىزدىقوۆا ءۇشىن تراكتور جۇرگىزۋ تاڭسىق ءىس ەمەس. ول مەحانيزاتور ماماندىعىن بالا جاسىنان ۋچيليشەدە مەڭگەرگەن. سودان بەرى قىرىق جىلدان استام ۋاقىت تراكتور تىزگىندەپ، جەر جىرتۋ، ءشوپ شابۋ سەكىلدى الۋان جۇمىستى اتقارىپتى. ءتىپتى كومباين جۇرگىزگەن كەزدەرى دە بار.
ارداگەر اپانىڭ تەحنيكا ءتىلىن جەتىك مەڭگەرگەنى سونشالىقتى، بىردە مەحانيزاتورلار اراسىنداعى جارىستا جۇلدە العان. ەندى مىنە، دالا جۇمىستارىنىڭ ورنىنا تۋعان اۋىلى اقمەشىتتىڭ كوشەلەرىن تازالاۋدا. ءالى كۇنگە بەساسپاپ مامان تراكتوردىڭ ءتىلىن تامىرشىداي تانيدى.
ءزۇبايرا سىزدىقوۆا، اقمەشىت اۋىلىنىڭ تۇرعىنى:
- سيليندرلەر بلوگىنىڭ باسىن شەشەمىز. الدىڭعى جانە ارتقى بەلدىكتەردى، ءيىندى بىلىكتى الىپ، مويىنتىرەك ورىندارىن تازالاپ، سىعىلعان اۋامەن ۇرلەپ شىعامىز. ماي جۇرمەسە، مايلاۋ ارناسىندا قوزعالتقىش تۇرىپ قالادى. مويىنتىرەك توسەمدەرىن اۋىستىرامىز. شالمەن ەكەۋمىز اندا-ساندا ءبىر ۇرىسىپ قويامىز، سوسىن ىستەي بەرەمىز. ءوزىم كولىك تە ايدايمىن، ءبىراق ول بۇزىلىپ تۇر. ايتپەسە «دىرىلداتىپ» كەتەمىن، باراتىن جەرىمە بارامىن. قازىر موتوبلوك الدىم، وعان تىركەمە تىركەدىم. سول موتوبلوكپەن ەسىكتىڭ الدىنداعى قوقىستاردى الىپ، تازالايمىن.
وسىلايشا، اۋىلداستارىنا ۇلگى بولعان زۋبايرا اپا ءالى كۇنگە ەڭبەكتەن قول ۇزبەي كەلەدى. ءزۇبايرا سىزدىقوۆانىڭ باقشاسىندا قۇلپىناي، الما، المۇرت پەن ءجۇزىمنىڭ الۋان ءتۇرى جايقالىپ تۇر. ونىڭ اۋلاسى اۋداندىق «ۇزدىك اۋلا» بايقاۋىندا جەڭىمپاز اتانعان. ەڭبەكپەن ەسەيگەن زۋبايرا اپانىڭ ەڭبەكقورلىعىنا اۋىلداستارى دا قۇرمەتپەن قارايدى.
ناسيپ سۇلەيمەنوۆا، اقمەشىت اۋىلىنىڭ تۇرعىنى:
- ءزۇبايرا اپاي بىرنەشە جىلدان بەرى زەينەتكەرلىكتە. مەحانيزاتور بولىپ جۇمىس ىستەگەن. ءالى دە بولسا، قولىنان كەلگەن كومەگىن بىزدەن ايامايدى. ول كىسىنىڭ ءومىر تاريحى ءبىزدىڭ اۋىلىمىزدىڭ، اقمەشىت اۋىلىنىڭ ەنتسيكلوپەدياسىنا جازىلعان. ەگدە تارتقان جاسىنا قاراماي ەڭبەكتەن قول ۇزبەگەن ءزۇبايرا سىزدىقوۆانىڭ تىرلىگى كوپكە ۇلگى.
رەسپۋبليكا كولەمىندە قولعا الىنىپ جاتقان «تازا قازاقستان» اكسياسى التى ميلليوننان استام ادامدى بىرىكتىردى. جىل باسىنان بەرى ەلىمىز بويىنشا 117 مىڭ گەكتارعا جۋىق اۋماق تازارتىلىپ، 813 مىڭ توننادان استام قوقىس جينالعان. سونداي-اق ءبىر ميلليون ەكى ءجۇز مىڭعا جۋىق تال-تەرەك ەگىلىپتى. ورتاق وتانىمىز ءۇشىن اتقارىلىپ جاتقان وسىناۋ يگى شارادا ءزۇبايرا اپانىڭ دا ۇلەسى بار.
24.kz
