قاراعاندىدا مەكتەپكە بارىپ، وقۋشىلاردى اتامىن دەپ قورقىتقان 13 جاسار بالا بولىپ شىقتى

قاراعاندى. KAZINFORM - قاراعاندى وبلىسىنىڭ پوليتسەيلەرى تەرروريزم تۋرالى حابارلاما تاراتقان ادامدى ۇستادى. جالعان حاباردى 13 جاسار جاسوسپىرىم تاراتقان.

قاراعاندى وبلىسى پوليتسيا دەپارتامەنتى ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى وبلىس مەكتەپتەرىندە وقۋشىلاردى اتامىن دەپ حابارلاما تاراتقان Telegram ارناسىنىڭ اكىمشىسىن ءارى اۆتورىن ۇستادى.

بەلگىلى بولعانداي، 13 جاسار قاراعاندى تۇرعىنى الەۋمەتتىك جەلىدەن تەرروريزم تاقىرىبىنداعى اقپاراتتى كورىپ، «وچيشەنيە كاراگاندى» دەگەن اتاۋمەن ءوز ارناسىن اشقان.

وسىدان كەيىن ۇستالعان ازامات وبلىس توڭىرەگىندەگى مەكتەپتەردە تەرروريزم اكتىسى دايىندالىپ جاتقانى جايلى اقپارات تاراتقان.

«قازىرگى ۋاقىتتا Telegram ارنا ءوشىرىلدى. پوليتسيا قىزمەتكەرلەرى بۇل قىلمىسقا شەتەلدە جۇرگەن ادامداردىڭ قاتىسى بار-جوعىن تەكسەرىپ جاتىر. پوليتسيا ورگاندارى شۇعىل قىزمەتتەردىڭ شىعىنىن وتەۋ بويىنشا سوتقا تالاپ ارىز بەرەدى. بالانىڭ اتا-اناسى قازاقستان زاڭناماسىنا سايكەس جاۋاپكەرشىلىككە تارتىلادى. تەرگەۋ ءجۇرىپ جاتىر»، - دەپ حابارلادى قاراعاندى وبلىسىنىڭ پ د باسپا ءسوز قىزمەتى.

ەسكە سالساق، كەشە 12-اقپاندا الەۋمەتتىك جەلىدە قاراعاندى مەكتەپتەرىندە لاڭكەستىك ارەكەت دايىندالىپ جاتقانى تۋرالى حابارلاما تاراپ كەتكەن بولاتىن. حابارلاما تاراتۋشى كەم دەگەندە 700 وقۋشى زارداپ شەگەدى دەپ قورقىتتى.

پوليتسيا قىزمەتكەرلەرى وقۋ ورىندارىنىڭ ماڭىندا باقىلاۋدى كۇشەيتتى.

اۆتور

ايزادا اگيلبايەۆا