قاراعاندى وبلىسىنداعى ۇشاق اپاتى: قازا بولعاندار - اسكەري كۋرسانت پەن پيلوت
ازاماتتىق اۆياتسيا كوميتەتى قاراعاندى وبلىسىندا ۇشاق اپاتىنان قازا بولعانداردىڭ اتى- ءجونىن جاريالاپ، اتقارىلىپ جاتقان شۇعىل شارالار جونىندە ءمالىم ەتتى، دەپ حابارلايدى قازاقپارات.

اۋە اپاتىنان قازا تاپقاندار: 1097 ساعات ۇشۋ تاجىريبەسى بار اۋە كەمەسىنىڭ كومانديرى (ۇشقىش- نۇسقاۋشى)، اۋە قورعانىسى كۇشتەرى اسكەري ينستيتۋتىنىڭ كۋرسانتى.
ءمالىم ەتىلگەندەي، پيلوتتىڭ 2019 -جىلدىڭ 28 -قاراشاسىندا بەرىلگەن №000012 CPL (A) سەرتيفيكاتى بار. نۇسقاۋشى پيلوتتىڭ ارنايى بەلگىسى «كاما» زاڭدى تۇلعالار بىرلەستىگىنە ەنگىزىلگەن جانە ول 2026 -جىلدىڭ 1 -شىلدەسىنە دەيىن جارامدى.
«كولىك مينيسترلىگىنىڭ ازاماتتىق اۆياتسيا كوميتەتى مەن قازاقستاننىڭ اۆياتسيا اكىمشىلىگى اۋە اپاتىندا قازا بولعان ازاماتتاردىڭ جاقىندارى مەن تۋىستارىنا كوڭىل ايتادى.
قازاقستاننىڭ اۆياتسيا اكىمشىلىگىنىڭ باس ديرەكتورى كاتالين رادۋ P2002-JF- پەن بولعان اپاتقا بايلانىستى وپەراتسيالىق ورتالىقتىڭ شۇعىل وتىرىسىن وتكىزدى.
وپەراتسيالىق ورتالىق قازاقستاننىڭ اۆياتسيا اكىمشىلىگىنىڭ اۆاريالىق جوسپارىن ىسكە اسىرا باستادى، ۇشۋ قاۋىپسىزدىگىن قامتاماسىز ەتۋ ماسەلەسى تالقىلاندى جانە تەرگەۋ جۇرگىزۋ ءۇشىن قۇجاتتار دايىندالدى»، - دەلىنگەن حابارلامادا.
اقپاراتقا سۇيەنسەك، ۇشاق «اۆياتسيالىق وقۋ- جاتتىعۋ ورتالىعى» ج ش س- عا تيەسىلى. كومپانيا 2022 -جىلعى 25 -قاراشادا «قازاقستاننىڭ اۆياتسيالىق اكىمشىلىگى» ا ق بەرگەن سەرتيفيكات نەگىزىندە اۆياتسيالىق پەرسونالدى كاسىبي دايارلاۋ جونىندەگى قىزمەتتى جۇزەگە اسىرىپ كەلەدى. سەرتيفيكاتتىق تەكسەرۋدى «قازاقستاننىڭ اۆياتسيالىق اكىمشىلىگى» ا ق اۆياتسيالىق ينسپەكتورلارى 2022 -جىلعى 21 -قاراشا مەن 25 -قاراشا ارالىعىندا جۇرگىزدى.
اپاتقا ۇشىراعان UP- LA286 اۋە كەمەسىنىڭ ۇشۋعا جارامدىلىق سەرتيفيكاتى 2020 -جىلعى 4 -ماۋسىمدا بەرىلدى. شىعارىلعان جىلى - 29.07.2011 جىل. قازاقستان رەسپۋبليكاسىنىڭ ازاماتتىق اۋە كەمەلەرىنىڭ مەملەكەتتىك تىزىلىمىندە 2020 -جىلعى 13مامىردا تىركەلگەن.
اۆياتسيالىق وقۋ ورتالىعىنىڭ پاركى 15 (11 ۇشاق جانە 4 تىكۇشاق) اۋە كەمەلەسىنەن تۇرادى.
ەسكە سالايىق، قاراعاندى وبلىسىنىڭ بالاپان الاڭىندا وقۋ- جاتتىعۋ جاساپ جۇرگەن P2002 ۇلگىسىندەگى UPLA286 ۇشاعىمەن ۇشىپ شىققان ۋاقىتى 07.46-دان كەيىن بايلانىس ۇزىلگەن. اۋە كەمەسى جەرگىلىكتى ۋاقىتپەن ساعات 08.44-تە قاراعاندى وبلىسىنىڭ دوسكەي اۋىلىنان 5 ك م جەردە قۇلادى.
ىزدەستىرۋ جۇمىستارى بارىسىندا قيراعان ۇشاق پەن ەكى ادامنىڭ دەنەسى تابىلدى.