قاراعاندى وبلىسىندا ەلۋگە جۋىق جىلقى سۋعا باتىپ كەتتى

قاراعاندى. KAZINFORM - قاراعاندى وبلىسىندا جوعالىپ كەتكەن 47 باس جىلقى سۋدىڭ استىنان تابىلدى، دەپ حابارلايدى Kazinform ءتىلشىسى.

قاراعاندى وبلىسىندا جايىلىمدا جۇرگەن 47 باس جىلقى كولگە باتىپ كەتتى.

- قارقارالى اۋدانىنىڭ پوليتسياسىنا ءبىر اۋىلدىڭ تۇرعىندارى مالدارىنىڭ جوعالعانى تۋرالى ارىز جازدى. جوعالعان جىلقىلاردى ىزدەۋگە پوليتسيا قىزمەتكەرلەرى مەن جەرگىلىكتى تۇرعىنداردان قۇرالعان ەرىكتىلەر جۇمىلدىرىلدى. شامامەن 10 ىزدەستىرۋ توبى قۇرىلىپ، ولار اۋماقتى كولىكتەرمەن جانە اتپەن ارالادى، - دەپ حابارلادى قاراعاندى وبلىسىنىڭ پ د باسپا ءسوز قىزمەتى.

ىزدەۋ شارالارى قارقارالى اۋدانى عانا ەمەس، وبلىستىڭ كورشىلەس اۋداندارى مەن پاۆلودار وبلىسىنىڭ باياناۋىل اۋدانىنا دا جۇرگىزىلدى.

- ىزدەۋ جۇمىستارىنىڭ ناتيجەسىندە كولدەردىڭ بىرىنەن 47 -جىلقىنىڭ ولەكسەسى تابىلدى. جانۋارلاردىڭ يەلەرى ءوز مالدارىن تانىدى، - دەپ قوستى پوليتسەيلەر.

الدىن الا بولجام بويىنشا، تۇندە دالادا جايىلىپ جۇرگەن ءبىر ءۇيىر جىلقى كول بەتىنە شىعىپ كەتكەن. مۇز ايتارلىقتاي قاتپاۋىنا بايلانىستى جانۋارلار سۋعا قۇلاپ كەتكەن.

قاراعاندى وبلىسىنىڭ پوليتسيا دەپارتامەنتى اۋىل شارۋاشىلىعى جانۋارلارىنىڭ يەلەرىنە مالدى باقىلاۋدا ۇستاۋدىڭ ماڭىزدىلىعىن ەسكە سالدى. مالدىڭ وزدىگىنەن جايىلۋى قايعىلى جاعدايلارعا اكەلۋى مۇمكىن: جانۋارلار ۇرلىقتىڭ، جول-كولىك جانە باسقا دا وقيعالاردىڭ قۇربانى بولۋى ىقتيمال.

ەسكە سالساق، قاراعاندى وبلىسىندا مال ۇرلىعىنىڭ الدىن الۋ ءۇشىن 18 بلوك- بەكەت ورناتىلدى.

پوليتسەيلەر 40 باس جىلقى ۇرلاماقشى بولعان بارىمتاشىلاردى ۇستادى.

ايزادا اگيلبايەۆا

اۆتور