قاراعاندى وبلىسىندا بەلگىسىز اۋرۋدان جىلقىلار قىرىلىپ قالدى
قاراعاندى. KAZINFORM - قاراعاندى وبلىسى بۇقار جىراۋ اۋدانى تورتكول اۋىلىندا جىلقىلار قىرىلىپ جاتىر. جانۋارلاردا ءىرىڭدى جارا دەرماتيتى پايدا بولىپ، اۋرۋ جىلقىلار كوپ ۇزاماي ءولىپ جاتىر. بەلگىسىز ينفەكسيانى انىقتاۋ ءۇشىن سىنامالار الىندى.
الەۋمەتتىك جەلىلەردە مال ءولىمى تۋرالى روليكتەر پايدا بولدى. بەينەدەگى جىلقى يەسى جانۋارلاردىڭ اياعىنداعى ءىرىڭدى جارانى بايقاعان. بۇل جارالار جىلقىنىڭ بۇكىل دەنەسىنە تاراپ كەتەدى ەكەن. اۋداننىڭ ۆەتەرينارلىق ينسپەكسياسى تالداۋ ءۇشىن سىناما الدى. قازىرگى ۋاقىتتا ماماندار سول سىنامالاردىڭ ناتيجەسىن كۇتىپ وتىر.
«تورتكول اۋىلىنداعى جاعداي بويىنشا ەپيزووتيالىق ليمفانگيتكە ءتان بەلگىلەرى بار ءۇش جىلقىدان سىنامالار الىنىپ، زەرتتەۋ ءۇشىن زەرتحاناعا جەتكىزىلگەنىن حابارلايمىز. اۋرۋدىڭ بۇل تۇرىنە نەگىزىنەن جىلقىلار پەن ەسەكتەر شالدىققىش كەلەدى. بۇل اۋرۋ تەك وسى جانۋارلاردىڭ تۇرلەرىنە ءتان»، - دەدى «قاراعاندى وبلىسىنىڭ ۆەتەريناريا باسقارماسى» م م باسشىسى قايربەك تۇرسىنبەكوۆ.
سونداي- اق، ءوڭىردىڭ ۆەتەرينارلىق قىزمەتى ەپيزووتيالىق ليمفانگيت دياگنوزى راستالسا، تورتكول اۋىلىندا كارانتين رەجيمى ەنگىزىلەتىنىن ءمالىم ەتتى. بەلگىلەنگەن كارانتيندىك رەجيم شەڭبەرىندە اۋرۋ نەمەسە قىرىلعان جانۋارلار تاركىلەنىپ، جويىلادى. سونداي-اق، زاڭناما شەڭبەرىندە قولدانىلاتىن نارىقتىق قۇن مولشەرىندە وتەماقى تولەنەتىن بولادى.
اۋرۋ جانۋارلاردىڭ يەلەرى اتاپ وتكەندەي، مۇنداي ينفەكسيا بۇرىن كورشى اۋىلدا راستالعان. وسى ەكى اۋىلدىڭ مالدارى ءبىر جايىلىمدا جايىلادى ەكەن. ول كەزدە ليمفانگيت دياگنوزى راستالىپ، قىرىلعان جىلقىلاردىڭ يەلەرىنە وتەماقى تولەنگەن.
اۆتور
ايزادا اگيلبايەۆا
