قار 4 وبلىستا نورمادان ارتىق تۇسكەن
استانا. KAZINFORM - ەكولوگيا جانە تابيعي رەسۋرستار مينيسترلىگى Kazinform ساۋالىنا جولداعان جاۋاپتا قار قالىڭ ءتۇسىپ جاتقان وڭىرلەردى اتادى.

- «قازگيدرومەت» ر م ك باقىلاۋ بەكەتتەرىنىڭ 2025 -جىلعى 10-قاڭتارداعى مالىمەتتەرى بويىنشا 2024-2025 -جىلعى سۋىق كەزەڭدە، ياعني قارلى كەزەڭدە جينالعان ىلعال قورى (تومەندەگى كەستەدە كورسەتىلگەندەي) رەسپۋبليكانىڭ شىعىس (ش ق و، اباي وبلىستارى)، ورتالىق (اقمولا وبلىسى) جانە وڭتۇستىك (تۇركىستان وبلىسى) وڭىرلەرىندە نورمادان 16-دان %38- عا دەيىن جوعارى بولىپ قالىپتاستى، - دەپ جازىلعان جاۋاپتا.

ال الماتى، جەتىسۋ، قاراعاندى، پاۆلودار، سولتۇستىك-قازاقستان وبلىستارىندا تۇسكەن قاردىڭ كولەمى وسى مەرزىمدىك نورماعا ساي كورىنەدى. اقتوبە، اتىراۋ، باتىس قازاقستان، قوستاناي جانە ۇلىتاۋ وبلىستارىندا جاۋعان قاردىڭ كولەمى مەرزىمدىك نورمادان تومەن.
بۇعان دەيىن حابارلاعانىمىزداي، الداعى ءۇش كۇندە رەسپۋبليكا بويىنشا تەمپەراتۋرانىڭ ودان ءارى تومەندەۋى بولجاندى. كەي وڭىردە 40 گرادۋسقا دەيىنگى قاتتى اياز قىسۋى مۇمكىن.
اۆتور
ەسىمجان ناقتىباي