قانسىراپ جاتىپ قوڭىراۋ شالعان بالاعا سەنبەگەن «112» قىزمەتكەرى سوتتا جاۋاپ بەرۋدە
اقتوبە قالالىق سوتىندا قىلمىستىق كودەكستىڭ «سالعىرتتىق» بابىمەن توتەنشە جاعدايلار دەپارتامەنتىنىڭ قىزمەتكەرىنە قاتىستى ءىس قارالىپ جاتىر، دەپ حابارلايدى Kazinform.
بۇعان دەيىن جازعانىمىزداي، بيىلعى ناۋرىز ايىندا ەر ادام ۇرلىق جاساۋ ماقساتىندا اشىق تۇرعان بالكون ارقىلى پاتەرگە كىرىپ، وتباسىنىڭ ءۇش مۇشەسىن پىشاقتاپ ءولتىردى. تەك ءبىر بالا امان قالدى. ەندى وسى ءىس بويىنشا تاعى ءبىر قىلمىستىق ءىس قارالىپ جاتىر. سوت الدىندا ت ج د قىزمەتكەرى جاۋاپ بەرۋدە. «112» مامانى قانسىراپ جاتىپ قوڭىراۋ شالعان بالانىڭ سوزىنە سەنبەگەن.
«2023 -جىلدىڭ 29-ناۋرىزى كۇنى كامەلەت جاسقا تولماعان جابىرلەنۋشى پىشاق جاراقاتىن العان سوڭ قۇتقارۋ قىزمەتىنە بىرنەشە رەت قوڭىراۋ شالعان. ال وبلىستىق ت ج د- ءنىڭ قىزمەتكەرى قوڭىراۋعا دۇرىس جاۋاپ بەرمەدى، كومەك كورسەتۋگە اسىقپادى. تەك ءۇشىنشى رەت حابارلاسقاندا عانا جەدەل جاردەم جىبەرگەن. ول ءوز قىزمەتىن دۇرىس اتقارماعان. قىلمىستىق كودەكستىڭ 371-بابى 1-بولىگىمەن سوتقا ارىز ءتۇستى. كىناسىن مويىنداماۋدا. كامەلەت جاسقا تولماعان بالا سول كۇنى ساعات 3:35-تەن 4:25-كە دەيىن حابارلاسقان. ال قىزمەتكەر مۇنى بالانىڭ ويىنى دەپ ويلاعان»، - دەدى اقتوبە وبلىسى پروكۋرورىنىڭ اعا كومەكشىسى اسەل تاناليەۆا.
جابىرلەنۋشى تاراپ كىنالىگە زاڭ اياسىندا قاتاڭ جازا بەرۋدى سۇراپ وتىر.
«قۇتقارۋ قىزمەتى بالا ازىلدەپ تۇر دەپ ويلاپ، سەنبەگەن. ول قايتا-قايتا حابارلاسقانىنىڭ ارقاسىندا ءتىرى قالدى. ول ءۇش رەت تەلەفون شالعان. ءۇشىنشى رەت حابارلاسقاندا عانا كومەك كەلدى. قۇتقارۋ قىزمەتى ىسىنە سالعىرت قاراعانى ءۇشىن قاتاڭ جاۋاپقا تارتىلۋى كەرەك دەپ ەسەپتەيمىن. ونى سوت شەشەدى. ءبىز 5 ميلليون تەڭگە مورالدىق شىعىن سۇراپ وتىرمىز»، - دەدى امان قالعان وقۋشىنىڭ اپاسى ەۆگەنيا كايريس.
اۆتور
التىناي ساعىندىقوۆا
