قۋاندىق بيشىمبايەۆتى قورعاۋشىلارى قالاي اقتاپ جاتىر

استانا. KAZINFORM - ەلوردادا قۋاندىق بيشىمبايەۆقا قاتىستى قىلمىستىق ءىس جالعاسۋدا. بۇگىنگى سوت وتىرىسىندا ەكس-شەنەۋنىكتىڭ قورعاۋشىلارى ايىپتىنى اقتاۋعا تىرىسىپ جاتىر.

«ق. بيشىمبايەۆ س. نۇكەنوۆانىڭ ولىمىنەن قانداي دا ءبىر پايدا كورۋى ءتيىس؟ بۇل جەردە قانداي پايدا تۋرالى ايتىلىپ تۇر؟ ايىپتاۋ اكتىسىندە بۇل سۇراقتىڭ جاۋابى جوق. اكتىدە «مەن ولتىرگىم كەلدى» دەلىنگەن ءبىراق نە ءۇشىن؟ پروكۋرور بۇل ساۋالعا جاۋاپ بەرمەدى، تەك «نارسيسسيست»، «اگرەسسور» تاعى سول سياقتى بۇلىڭعىر سوزدەرمەن جابىلعان. ەگەر ق. بيشىمبايەۆ كىسى ءولتىرۋدى ويلاسا، ول مۇنى ءوز قولىمەن جاسار ما ەدى؟»، - دەدى ق. بيشىمبايەۆتىڭ ادۆوكاتى ەرلان عازىمجانوۆ.

«كەلتىرىلگەن دالەلدەر قۋاندىقتىڭ ازاپتاۋعا كىناسىز ەكەنىن راستايدى. مۇندا ادۆوكات ۆرانچيەۆ قۋاندىقتى حالىقتىڭ 30 جىلدىق ازابى ءۇشىن قۇرباندىققا شالۋ كەرەك دەدى. وعان نەگە قۋاندىق جاۋاپ بەرۋى كەرەك؟ 30 جىل بۇرىن قۋاندىق 10 جاستا ەدى. ءبىز قۋاندىق بيشىمبايەۆتى ەمەس، زاڭدى قورعايمىز. قۋاندىق ورنىندا كەز كەلگەن ەموتسيونالدى تەڭگەرىمسىز ادام بولۋى مۇمكىن»، - دەدى ايىپتالۋشىنىڭ كەلەسى ادۆوكاتى لەيلا رامازانوۆا.

سونداي-اق، قورعاۋشى ق. بيشىمبايەۆ س. نۇكەنوۆاعا باعالى سىيلىق جاساپ، اي سايىن اقشا اۋدارعانىن ايتتى.

«تەرگەۋ بارىسىندا كۇدىكتى ب. بايجانوۆ سالتانات نۇكەنوۆاعا اقشا اۋدارعانىن ايتتى. سونداي-اق، ب. بايجانوۆتىڭ ايعاقتارىنان قۋاندىق بيشىمبايەۆ سالتاناتقا ەكى رەت ساعات ساتىپ الىنعانى، ونىڭ قۇنى 6-8 ميلليون تەڭگە تۇرعانى ايتىلدى. ق. بيشىمبايەۆ ايتقانداي، ول س. نۇكەنوۆعا اقشا اۋدارعان. ەڭ از سوما «Kaspi» دەرەكتەرى بويىنشا ايىنا 500 مىڭ تەڭگەدەن استام بولدى»، - دەدى ل. رامازانوۆا.

قازىر جارىسءسوز جالعاسۋدا.

ايتا كەتسەك، 29-ساۋىردە ساعات 10:00-دە باستالۋى ءتيىس ەكس- شەنەۋنىك قۋاندىق بيشىمبايەۆقا قاتىستى سوت وتىرىسى تۇستەن كەيىنگە قالدىرىلعان ەدى.

كەشە ىشكى ىستەر ءمينيستردىڭ ورىنباسارى ءساۋىر ايىندا بيشىمبايەۆ سوت وتىرىسىنا نەگە كەلمەگەنىن ءتۇسىندىردى.

اۆتور

داۋلەت ىزتىلەۋ