قۋاندىق بيشىمبايەۆقا تۇرمەدە ايرىقشا جاعداي جاسالعان با – ءى ءى م جاۋابى
استانا. KAZINFORM - ىشكى ىستەر ءمينيسترى ەرجان سادەنوۆ قۋاندىق بيشىمبايەۆتىڭ تەرگەۋ يزولياتورىندا قانداي جاعدايدا وتىرعانىن ايتتى.
«ارينە، ەشكىمدە دە ايرىقشا جاعداي جوق. بارلىعى دا زاڭناماعا سايكەس وتىر»، - دەدى مينيستر ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.
وسى رەتتە تىلشىلەر كۇدىكتىنىڭ ءبىر ادامدىق نە جالپى كامەرادا وتىرعانىن سۇراعان ەدى.
«بارىمەن بىرگە وتىر. بىزدە تۇرمەلەر كامەرالىق ۇلگىدە. وندا ادامدار وتىر، كامەرالار ءارتۇرلى»، - دەدى ول.
سونىمەن قاتار ول قۋاندىق بيشىمبايەۆقا ايرىقشا جاعداي جاسالماعانىن باسا ايتتى.
«جالپى كامەرادا وتىر، قاسىندا كامەرالاستارى بار. ءبارى زاڭ بويىنشا. ماعان سەنىڭىزدەر، ەشقانداي ارتىقشىلىعى جوق. ءبارىن باقىلاپ وتىرمىن»، - دەدى مينيستر.
ايتا كەتەيىك، ايەلىن ءولتىردى دەپ ايىپتالعان ق. بيشىمبايەۆتىڭ باستى سوتى 27-ناۋرىزعا بەلگىلەندى. سوت القابيلەر قاتىسۋىمەن وتەدى.
اۆتور
مارلان جيەمباي