قانداستاردى قولداۋعا ارنالعان جوبا قولعا الىندى

استانا. KAZINFORM - شەتەلدەردە تۇراتىن قانداستارىمىز ەلگە قونىس اۋدارماس بۇرىن ءۇي الىپ، جۇمىسقا تۇرا الادى، دەپ حابارلايدى 24KZ.

بۇل جاڭا ءتارتىپ اياسىندا 6 مىڭنان استام ارىز قابىلداندى. جالپى ەلىمىزدە جىل سايىن تاريحي وتانىنا ورالۋشىلار سانى ارتىپ كەلەدى. بىلتىر 21 مىڭ ادامعا «قانداس» مارتەبەسى بەرىلدى. ولار ءتۇرلى جەڭىلدىكتەر مەن ارنايى كومەك الدى. ەندى شىعىس پەن پاۆلودارعا كوشىپ كەلەمىن دەۋشىلەرگە جەكە كومەكشى تاعايىندالادى. كومەكشى نە ءۇشىن كەرەك؟

جاقىندا شىعىس قازاقستان جانە پاۆلودار وبلىستارىندا پيلوتتىق جوبا جۇزەگە اسىرىلا باستادى. ونىڭ اياسىندا 242 وتباسىعا جەكە كومەكشى تاعايىندالدى. سول كومەكتى العاندار قاتارىندا موڭعوليادان كەلگەن ءابي جىرعاۋ بار. ءوزى مۇعالىم بوپ ەڭبەك ەتەدى. ال جولداسىنىڭ جەكە كاسىبى بار. بيىل اتا-اناسىن قازاقستانعا كوشىرىپ اكەلمەك. مەملەكەتتەن قارجىلاي كومەك الىپ، ءۇي قۇرىلىسىن باستاپ كەتكەن.

ءابي جىرعاۋ، قالا تۇرعىنى:

- وسىندا كەلىپ، جەر الىپ، قونىستانىپ جاتىرمىز. كۆوتانىڭ العاشقى بولىگى، كوشىپ كەلۋ جول اقىسى دەپ ءبىر ادامعا 240 مىڭعا جۋىق 3 ادامعا اقشا الدىق. سونىڭ ءبارى كومەك بولدى. قۇجات جيناۋعا، بارلىعىنا. ودان كەيىن كوشىپ كەلگەن ورالماندارعا بەرىلەتىن سەرتيفيكاتقا ەنىپ، سونىڭ العاشقى جارناسىن الىپ، مۇندا ءۇي سالىپ جاتىرمىز.

اتالمىش پيلوتتىق جوبادان بولەك، وڭتۇستىكتىڭ تۇرعىندارى ارنايى كۆوتا ارقىلى 8 وڭىرگە كوشە الادى. بۇل تىزىمدە اقمولا، اباي، قوستاناي، قاراعاندى، ۇلىتاۋ، پاۆلودار، شىعىس قازاقستان جانە سولتۇستىك قازاقستان وبلىستارى بار.

قايرات بازەنوۆ، قالا تۇرعىنى:

- مەن تاراز قالاسىنان وسكەمەن قالاسىنا قونىس اۋداردىم. وسىندا كەلگەلى مانساپ ورتالىعىنا جۇگىندىم. ماماندار تولىق اقپارات بەردى. ودان جۇمىسقا ورنالاسۋىما كومەكتەستى. جۇمىس تاۋىپ بەردى. اقشالاي كومەك الدىم. ۇلىم وسىندا. جۇمىستا. ت ج م- دا جۇمىس ىستەيدى. ول دا كەلدى. كەلىنشەگىم وسى قالادا مەديتسينا سالاسىندا جۇمىس ىستەيدى. ءوزىم - وسىندا بالىق زاۋىتىندا.

بىلتىر شىعىس قازاقستان وبلىسىنا 631 وتباسى كوشىپ بارعان. جەرگىلىكتى بيلىك وكىلدەرىنىڭ ايتۋىنشا، بيىل تاعى 641 وتباسى كەلەدى. ولاردىڭ جول شىعىنى مەملەكەت تاراپىنان وتەلەدى. باسپانا ساتىپ الۋعا نەمەسە تۇرعىزۋعا العاشقى جارنا ەسەبىندە 1160-ايلىق ەسەپتىك كورسەتكىش مولشەرىندە كومەك تاعايىندالادى.

داستان ايتقۇلوۆ، ەتنيكالىق كوشى-قون باسقارماسىنىڭ باسشىسى:

- سوعان بايلانىستى «مانساپ» بيزنەس ورتالىقتارىندا ەتنيكالىق قازاققا جانە قونىس اۋدارۋشىعا كومەكشى تاعايىندالادى. ول كومەكشى قانداس پەن كوشىپ كەلۋشى ازاماتپەن جەكە جوسپارىن جاسايدى. بەيىمدەلۋ جوسپارى. سول بەيىمدەلۋ جوسپارىنا بايلانىستى بارلىق قىزمەتتەردى اتقارادى. ول قىزمەت نەگىزى 24 بولىپ تابىلادى. باستى قاجەتتى قىزمەتتەر، ونىڭ ىشىندە ءبىرىنشى ە س پ كىلتىن اشۋدان باستاپ قىستىق مەرزىمگە دايىندىق. جەر ۇيدە تۇراتىن بولسا، كومىر ءتۇسىرۋ بويىنشا، بالالاردىڭ بالا- باقشاعا ورنالاسۋى، مەكتەپكە بارۋى، ەگەر دە اسكەري قىزمەتتە بولسا، ونى «ۆوەنكوماتقا» تىركەۋ بويىنشا.

وسى كۇنگە دەيىن 21 مىڭنان استام قانداس، ياعني 13 مىڭعا جۋىق وتباسى ەلگە ورالىپ، الەۋمەتتىك كومەككە قول جەتكىزدى. باسىم بولىگى الماتى وبلىسىنا قونىس اۋدارعان. ودان كەيىن ءتىزىمدى ماڭعىستاۋ، پاۆلودار، تۇركىستان جانە شىعىس قازاقستان وبلىستارى جالعايدى. ال ەلورداعا كوشىپ كەلگەندەر سانى - 2 مىڭعا جۋىق.

الەۋمەتتىك كومەك العاندار - 21325

الماتى وبلىسى - 4824

ماڭعىستاۋ وبلىسى - 2058

پاۆلودار وبلىسى - 1766

شىعىس قازاقستان وبلىسى - 402

تۇركىستان وبلىسى - 1264

الماتى قالاسى - 1407

استانا قالاسى - 1909

شىمكەنت قالاسى - 1418.

- قانداستاردىڭ باسىم بولىگى وزبەكستان، قىتاي، تۇركىمەنستان، موڭعوليا، يران، اۋعانستان، تاجىكستان، تۇرىك ەلىنەن كەلەدى.

اتاجۇرتتى اڭساعان ازاماتتارعا قولداۋ تەك باعدارلاما بويىنشا جۇزەگە اسپاۋى ءتيىس. ءاربىر قازاقستاندىق قول ۇشىن سوزىپ، ولاردىڭ وسى ورتاعا بەيىمدەلۋى ءۇشىن يگى ءىس جاساۋعا اسىق بولعاندارى ابزال.