قانات بوزىمبايەۆ قايىرىمدىلىق كومەك بولۋگە قوعامدىق ۇيىمداردى تارتۋدى تاپسىردى
استانا. KAZINFORM - ۆيتسە-پرەمەر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى سالدارىن جويۋ جونىندەگى رەسپۋبليكالىق شتاب مەڭگەرۋشىسىنىڭ ورىنباسارى قانات بوزىمبايەۆ سۋ تاسقىنىنان زارداپ شەككەندەرگە قايىرىمدىلىق كومەك بولۋگە قوعامدىق ۇيىمداردى تارتۋدى تاپسىردى.
ونىڭ ايتۋىنشا، سۋ تاسقىنى ايماعىنداعى 100 مىڭعا جۋىق ادام ۇيلەرىنەن قاۋىپسىز جەرگە كوشىرىلدى. جۇزدەگەن ەۆاكۋاتسيالاۋ پۋنكتتەرى قۇرىلىپ، ونىڭ ءارقايسىسى قاجەتتى زاتتارمەن قامتاماسىز ەتىلگەن. وندا دارىگەرلەر، سانيتارلىق- ەپيدەميولوگيالىق قىزمەتتەر كەزەكشىلىك ەتىپ جاتىر.
وسى قيىن ساتتە مىڭداعان قازاقستاندىق زارداپ شەككەن وڭىرلەرگە كومەك قولىن سوزدى. گۋمانيتارلىق جۇكتەردى جيناۋ ءاربىر قالادا جۇرگىزىلەدى. سونىمەن بىرگە الەۋمەتتىك جەلىلەردە زارداپ شەككەندەرگە كومەكتەسۋ ءۇشىن قاراجات جيناۋ تۋرالى كوپتەگەن حابارلاندىرۋلار پايدا بولدى. وڭاي جولمەن پايدا تابۋدى كوزدەگەندەردىڭ قۇربانىنا اينالۋدان قالاي ساقتانۋعا بولادى؟
رەسمي تۇردە جۇمىس ىستەيتىن جانە اكىمدىكتەر دە، جەرگىلىكتى بەلسەندىلەر قاۋىمداستىعى دا باقىلايتىن ايماقتىق قايىرىمدىلىق قورلارى بار. رەسپۋبليكالىق دەڭگەيدە قازاقستاندا 2 قور بار - ولار «دەمەۋ قازاقستان قورى» كورپوراتيۆتىك قورى جانە «قازاقستان حالقىنا» قورى.
ۆيتسە-پرەمەر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنىنىڭ سالدارىن جويۋ جونىندەگى رەسپۋبليكالىق شتاب مەڭگەرۋشىسىنىڭ ورىنباسارى قانات بوزىمبايەۆ «قازاقستان حالقىنا» قورى اتالعان وڭىرلەردە زارداپ شەككەن تۇرعىندارعا ارناپ 400-500 ءۇي سالۋعا دايىن ەكەنىن ايتتى.
وڭىرلەرگە شەتەلدەن نەمەسە ءىرى كومپانيالاردان كەلگەن بارلىق گۋمانيتارلىق كومەكتى توتەنشە جاعدايلار مينيسترلىگى ۇيلەستىرەدى جانە ول قوعامدىق باقىلاۋدا بولۋعا ءتيىس.
اۆتور
باقىتگۇل اباي قىزى
