قالباتاۋ-مايقاپشاعاي تاس جولىنىڭ 184 شاقىرىمى بيىل قولدانىسقا بەرىلەدى

استانا. قازاقپارات - قالباتاۋ-مايقاپشاعاي تاس جولىنىڭ اباي وبلىسىنداعى كەي ۋچاسكەلەرى دە بيىل پايدالانۋعا بەرىلەدى، دەپ حابارلايدى 24kz.

كۇرە جولدى جاڭعىرتۋ جۇمىستارى ۇزاققا سوزىلىپ، 10 جىلدان بەرى تۇرعىنداردى تيتىقتاتتى. قۇرىلىسقا بولىنگەن اقشا قولدى بولىپ، العاشقى مەردىگەر جۇمىستى اياقسىز قالدىردى. ەندى بىلتىردان بەرى قىتاي كومپانياسى سالىپ جاتىر.

قالباتاۋ-مايقاپشاعاي تاس جولىن جوندەۋگە بيۋدجەتتەن 107 ميلليارد تەڭگە ءبولىندى. قازىر جۇمىستى قىتايلىق قۇرىلىس كومپانياسى جۇرگىزىپ جاتىر. جۇمىس ساپاسىن جول اكتيۆتەرى ۇلتتىق ورتالىعىنىڭ ماماندارى قاداعالاپ، تەكسەرىپ وتىرادى.

سيۋە چايۋ، جوبا جەتەكشىسى:

- قازىر جولداعى جۇمىس قىزۋ ءجۇرىپ جاتىر. جول جيەكتەرى تازالانىپ، تەگىستەلۋدە. بۇعان قوسا، سۋ تاسقىنىنىڭ الدىن الاتىن قۇبىرلار ورناتىلىپ، كوپىرلەر سالىنىپ جاتىر. بۇگىندە جالپى جۇمىستىڭ %40- ءى ورىندالدى.

قازىر قالباتاۋ -مايقاپشاعاي تاس جولىندا جۇمىس قىزۋ. 400-دەن استام تەحنيكا مەن جەتى جۇزدەن استام ادام جۇمىلدىرىلعان. العاشىندا جولدىڭ قۇرىلىسىنا قازاقستاندىق كومپانيا جاۋاپتى بولعان. الايدا مەردىگەر جاۋاپسىز بولىپ شىعىپ، باستالعان ءىس اياقسىز قالعان ەدى.

وتكەن عاسىردىڭ 70-جىلدارى سالىنعان بۇل جول ەشقاشان تولىق جوندەۋدەن وتپەگەن. 2017 -جىلى قولعا الىنىپ، اياقسىز قالدى. جاۋاپسىز مەردىگەر كەزىكتى، سونىمەن جۇمىس توقتادى. بۇگىندە قايتا جاندانعان قۇرىلىس اياقتالۋعا جاقىن. مەردىگەر ۇيىم وكىلدەرى جىل سوڭىنا دەيىن جولدىڭ 184 شاقىرىمىن پايدالانۋعا بەرەمىز دەپ جوسپارلاپ وتىر. اراعا 7 جىل سالىپ، جول قۇرىلىسى قارقىن الدى. حالىقارالىق ماڭىزى بار تراسسانىڭ اشىلۋىن حالىق اسىعا كۇتىپ ءجۇر.

24.kz