قالا قۇرىلىسى تۋرالى كودەكستىڭ جوباسى تالاپقا ساي ەمەس - مەملەكەت باسشىسى

Construction sector
Photo credit: Mukhtor KholdorbekovKazinform

استانا. KAZINFORM - مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا قالا قۇرىلىسى تۋرالى كودەكستى قايتا مۇقيات قاراپ، جەتىلدىرۋدى تاپسىردى.

«ەلىمىزدى ەكونوميكالىق-الەۋمەتتىك دامىتۋ ىسىندە ماڭىزدى ءرول اتقاراتىن قۇرىلىس سالاسىنىڭ ءتيىمسىز باسقارىلۋى وتە وزەكتى ماسەلە بولىپ تۇر. مىسالى، جوبالاردىڭ قۇنىن سمەتالىق ەسەپتەر ارقىلى انىقتاۋ ادىستەمەسى الەمدىك ستاندارتتارعا ساي ەمەس. ينۆەستورلار ۋاقىتىن، قاراجاتىن جانە جۇمىسقا دەگەن قۇلشىنىسىن جوعالتىپ، اقىرى قۇرىلىسقا رۇقسات بەرەتىن قۇجاتتار كوپ تالاپ ەتىلمەيتىن ەلدەرگە كەتىپ قالادى. ۇكىمەت حالىقارالىق تاجىريبەنى نەگىزگە الا وتىرىپ، ينۆەستورلار ءۇشىن جوبالىق-سمەتالىق قۇجاتتاردى بەكىتۋ ءتارتىبىن بارىنشا جەڭىلدەتۋ كەرەك»، - دەدى قاسىم- جومارت توقايەۆ.

مەملەكەت باسشىسى وسىدان ءبىر جارىم جىل بۇرىن الەمدەگى وزىق تاجىريبەگە ساي كەلەتىن قالا قۇرىلىسى تۋرالى كودەكس ازىرلەۋدى تاپسىرعانىن ەسكە سالدى.

«ءبىراق مەنىڭ اتىما ءبىرقاتار ساراپشىلار مەن كاسىپكەرلەردەن وتىنىشتەر كەلىپ جاتىر. ولاردىڭ ايتىپ جاتقان شاعىمدارى مىناداي: قازىرگى كودەكستىڭ جوباسى قويىلعان تالاپقا ساي كەلمەيدى، بۇرىننان بار نورمالار ۇسىنىلعان، جاڭا تاسىلدەر مەن شەشىمدەر جوق. سوندىقتان، كودەكستىڭ جوباسىن قايتادان مۇقيات قاراپ، جەتىلدىرۋ قاجەت»، - دەدى پرەزيدەنت.

مەملەكەت بولاشاقتا ەلىمىزدىڭ ەكونوميكالىق وركەندەۋىنە نەگىز بولاتىن اۋقىمدى ءارى يننوۆاتسيالىق جوبالاردى ءبىرىنشى كەزەكتە قولداۋى قاجەت.

«ەلىمىزدەگى ءوندىرىستىڭ دامۋىنا تىڭ سەرپىن بەرۋ قاجەت. بارشاعا تۇسىنىكتى جانە ءتيىمدى يندۋستريا ساياساتىن جۇرگىزۋ ءۇشىن بىلتىر جەكە مينيسترلىك قۇرىلدى. سودان بەرى ءبىراز ۋاقىت ءوتتى، ەندى جۇمىستىڭ ناتيجەسىن كورسەتۋ كەرەك. مينيسترلىك سالانىڭ دامۋ باعدارىن انىقتاپ، ينۆەستورلارعا جول كورسەتۋى كەرەك. وزىق تەحنولوگيانى قولداناتىن جاڭا وندىرىستەر اشۋ قاجەت. الايدا، ناقتى شارالار مەن ءادىس- تاسىلدەر دايىن ەمەس»، - دەدى قاسىم-جومارت توقايەۆ.

پرەزيدەنتتىڭ ايتۋىنشا، ءوندىرىستىڭ دامۋىنا سەرپىن بەرەتىن جوبالاردىڭ ءتىزىمى بار، دەگەنمەن، بۇل جۇمىس تا تولىق اياقتالماعان.

«بۇل وندىرىستەر ەكونوميكا قۇرىلىمىن وزگەرتۋگە، ەلىمىزدىڭ مىقتى ونەركاسىپتىك نەگىزىن قالاۋعا جانە تەحنولوگيالىق ءوسىمدى قامتاماسىز ەتۋگە ءتيىس. ازىرگە مۇنىڭ ەشقايسىسى ىسكە اسقان جوق. كوپتەگەن جوبانى قارجىلاندىرۋ كوزدەرى ايقىندالعان جوق. مەملەكەت بولاشاقتا ەلىمىزدىڭ ەكونوميكالىق وركەندەۋىنە نەگىز بولاتىن اۋقىمدى ءارى يننوۆاتسيالىق جوبالاردى ءبىرىنشى كەزەكتە قولداۋى قاجەت. وسى تۇستا، جۇمىس ىستەپ تۇرعان وندىرىستەردى جاڭعىرتۋمەن قاتار، ەلىمىز ءۇشىن مۇلدە جاڭا ءوندىرىس ورىندارىن اشۋعا باسا ءمان بەرۋ كەرەك»، - دەدى مەملەكەت باسشىسى.

ايتا كەتەيىك، ۇكىمەت ۇيىندە قايتا جاساقتالعان ۇكىمەتتىڭ كەڭەيتىلگەن وتىرىسى ءوتىپ جاتىر.

اۆتور

رۋسلان عابباسوۆ

سوڭعى جاڭالىقتار