قالا اۋماعىندا كۇندىز اۆتوكولىكتىڭ شامىن جاقپاعاندارعا ايىپپۇل سالىنباۋى مۇمكىن
استانا. KAZINFORM - قالا اۋماعىندا كۇندىز اۆتوكولىكتىڭ جارىق شامىن جاقپاعاندار ايىپپۇل سالىنباۋى مۇمكىن، ياعني تەك ەسكەرتۋ جاسالادى.
بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا «جول ءجۇرىسى تۋرالى» زاڭىنا جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە ءمالىم بولدى.
«كولىك جۇرگىزۋشىلەرى اراسىندا ۇلكەن تالقىعا تۇسكەن، قارسىلىق تانىتقان ءبىر ماسەلە بولدى. ياعني كۇندىز جارىق شامىن قالادا جاعىپ جۇرۋگە قاتىستى وسىعان دەيىن ءبىراز ءۋاج ايتىلدى. بارلىعىن مىندەتتەپ، جاقپاعاندارعا ايىپپۇل سالىندى. ەندى قازىر سول ايىپپۇلداردى اكىمشىلىك كودەكستەن الىپ تاستاۋ ۇسىنىلىپ وتىر. جالپى، بۇل شەشىمگە نە سەبەپ؟ راسىمەن، كۇندىز قالادا جارىق شامىن جاعىپ ءجۇرۋ تالابى جىلدار بويى ناتيجە بەرمەسە، قاراپايىم حالىقتى قيناپ، ميلليونداپ ايىپپۇل سالۋ تالابىن ەنگىزۋ بۇعان دەيىن نە ءۇشىن كەرەك بولدى؟»، - دەپ سۇرادى ءماجىلىس دەپۋتاتى نارتاي سارسەنعاليەۆ.
ءوز كەزەگىندە ءماجىلىس دەپۋتاتى ەكاتەرينا سمىشياليەۆا قالا اۋماعىندا كۇندىز جارىق شامىن جاعىپ ءجۇرۋ تالابى وسىعان دەيىن حالىقارالىق قۇقىق اياسىندا ەسكەرىلگەنىن ايتتى.
«حالىقارالىق ستاندارتتارعا سايكەس، بۇل شارا كۇندىز ءجۇرىپ جاتقان اۆتوكولىكتىڭ دۇرىس كورىنۋىن قامتاماسىز ەتۋگە، كولىكتىڭ كولەمىن دۇرىس باعالاۋعا، ياعني جولداعى قاۋىپسىزدىكتى كۇشەيتۋگە قاجەت بولدى. ەندى جاڭا ۇسىنىسقا توقتالساق، وسى نورمانى قولدانۋعا تالداۋ جاسادىق. بۇل رەتتە، ەكى نۇسقا بار - ەسكەرتۋ مەن ايىپپۇل سالۋ. كۇندىز جارىق شامىن جاقپاعاندارعا قاتىستى ەسكەرتۋ جاساۋ ءجيى قولدانىلاتىنىن انىقتادىق. ال ايىپپۇل سالۋ سيرەك كەزدەسەدى. سوندىقتان قالا اۋماعىندا ەسكەرتۋ (پوليتسيا) جاساۋمەن شەكتەلەتىن بولدى. ال تراسسادا بۇرىنعى تالاپتار ساقتالادى»، - دەدى ە. سمىشياليەۆا.
اۆتور
رۋسلان عابباسوۆ
